ଭୁବନେଶ୍ବର: କୁହାଯାଏ ତୁଳସୀ ଦୁଇ ପତ୍ରରୁ ବାସେ । ପ୍ରତିଭାର ପ୍ରତିଟି ପାଖୁଡା ପରିପ୍ରକାଶ ହୋଇ ଚର୍ତୁପାର୍ଶ୍ବକୁ ମହକାଏ । ସେମିତି କିଛି ଘଟିଛି ସାଲିଆ ସାହି ସ୍ଥିତ ଆଦିବାସୀ ବସ୍ତିରେ । ଦୁଇ ଭାଇ ରଞ୍ଜନ ଓ ସୁନୀଲଙ୍କ ଫୁଟବଲ ପ୍ରତିଭାକୁ ଏବେ ବେଶ ଚର୍ଚ୍ଚା । ନିଜ ଘର ପାଖ ପଡିଆରେ ଦିନେ ଖେଳୁଥିଲେ ଦୁଇ ଭାଇ ।
ପରେ କୋଚ ଜୟଦେବ ମହାପାତ୍ରଙ୍କ ନଜର ପଡିଥିଲା ତାଙ୍କ ଉପରେ । ସୁନା ଚିହ୍ନେ ବଣିଆ ପରି ଜୟଦେବ ତାଙ୍କ ପ୍ରତିଭାର ଆଭାସ ପାଇଥିଲେ । ଏହାପରେ ଉପଯୁକ୍ତ ପ୍ରଶିକ୍ଷଣ ଦେବାକୁ ପ୍ରୟାସ ଆରମ୍ଭ କଲେ । ଆଦିବାସୀ ଗାଁ ପକ୍ଷରୁ ଫୁଟବଲ ଖେଳୁଥିବା ରଞ୍ଜନ ଖାସି କପରୁ ଆଜି 15ବର୍ଷରୁ କମ ଭାରତୀୟ ଦଳ ପାଇଁ ପ୍ରତିନିଧିତ୍ବ କରୁଛନ୍ତି। ପରେ ଯାତ୍ରା ଜାରି ରହିଥିଲା । ସାଫ କପରେ ନେପାଳକୁ 7-0 ଗୋଲରେ ପରାସ୍ତ କରିଥିଲା ଭାରତ । ଏଥିରେ ଡିଫେଣ୍ଡର ରଞ୍ଜନଙ୍କ ପ୍ରଦର୍ଶନ ଦମଦାର ରହିଥିଲା । ଖାଲି ରଞ୍ଜନ ନୁହଁନ୍ତି, ଭାଇ ସୁନୀଲ ମଧ୍ୟ ପଞ୍ଜାବ ଫୁଟବଲ କ୍ଲବରେ ଖେଳୁଥିବା ବେଳେ ଆଇ ଲିଗରେ ସ୍ଥାନ ପାଇଛନ୍ତି।
ଦୁଇ ପୁଅ ପାଇଁ ବାପା ରାମଚନ୍ଦ୍ର ସୋରେନ ଗର୍ବିତ ବୋଲି କହିଛନ୍ତି । ମାତ୍ର ଝାଟିମାଟିର କୁଡିଆରେ ମୂଲ ଲାଗିଲେ ହିଁ ଘର ଚଳିବ। ସେଥିପାଇଁ ଦୁଇ ପୁଅଙ୍କ ପାଇଁ ବେଶୀ କିଛି ଚିନ୍ତା କରି ପାରିନାହାଁନ୍ତି ରାମଚ଼ନ୍ଦ୍ର । କୋଚ ଦେବଦୂତ ସାଜି ସହଯୋଗ କରିଛନ୍ତି ବୋଲି ପିଲା ଦିଟା ଏଯାଏଁ ପହଞ୍ଚିଛନ୍ତି । ଏମିତିକି ଜୋତା, ଡ୍ରେସ, ଖେଳ ସରଞ୍ଜାମ ସବୁ କୋଚଙ୍କ ପାଇଁ ସମ୍ଭବ ହେଇଛି କହିଛନ୍ତି।
ଏପରି ସ୍ଥିତିରେ ବାପାଙ୍କ ଖୁସି ଯେତିକି କ୍ଷୋଭ ବି ସେତିକି। ରାଜ୍ୟ ଫୁଟବଲ ଆସୋସିଏସନ ପରିବାର ଉପରେ ଏଯାଏଁ ପଡିନି ନଜର । ରାଜ୍ୟ ସରକାର ଓ କ୍ରୀଡା ମନ୍ତ୍ରାଣାଳୟ କେହି ମଧ୍ୟ ଆଡ଼ ଆଖିରେ ଅନାଇ ନାହାନ୍ତି କହିଛନ୍ତି ରଞ୍ଜନଙ୍କ ବାପା।
ତେବେ ସଫଳତାର ସହ ବିଶ୍ବସ୍ତରୀୟ ଟୁର୍ଣ୍ଣାମେଣ୍ଟ ଆୟୋଜନ କରି ଓଡିଶା କ୍ରୀଡା ରାଜଧାନୀ ହୋଇଥିବା କୁହାଯାଉଛି। ରାଜ୍ୟ ସରକାର କ୍ରୀଡୀନୀତି ଆଣି ରାଜ୍ୟରେ ଥିବା ବିଭିନ୍ନ କ୍ରୀଡା ପ୍ରତିଭାଙ୍କୁ ସ୍ବତନ୍ତ୍ର ସହାୟତା କରିବେ ବୋଲି କୁହାଯାଇଛି । ତେବେ ସବୁ ଯେମିତି ପ୍ରତିଶ୍ରୁତିରେ ରହିଥିବା ଚର୍ଚ୍ଚା ହେଉଛି । ସେଥପାଇଁ ତ ରାଜଧାନୀର ଛାତି ଉପରେ ଥିବା ସାଲିଆ ସାହିର ପ୍ରତିଭା ଆଜି ସହାୟତା ଅପେକ୍ଷାରେ ରହିଛି ।
ଭୁବନେଶ୍ବରରୁ ଶତରୂପା ସାମନ୍ତରାୟ, ଇଟିଭି ଭାରତ
