ଭୁବନେଶ୍ବର: ନୟାଗଡର ୫ ବର୍ଷୀୟ ଝିଅ ପରୀ ହତ୍ୟାକାଣ୍ଡକୁ ନେଇ ସବୁ ମହଲରେ ଚର୍ଚ୍ଚା ଆରମ୍ଭ ହୋଇଥିବା ବେଳେ ରାଜନୈତିକ ବୟାନବାଜି ବି ଜୋରଧରିଛି । ଗତକାଲି ବିଜେପି ପକ୍ଷରୁ କଂଗ୍ରେସ ପ୍ରତି ଦିଆଯାଇଥିବା ମନ୍ତବ୍ୟର କଡା ପ୍ରତିକ୍ରିୟା ରଖିଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ ।
ପିସିସି ସଭାପତି ଏକ ଭିଡିଓ ବାର୍ତ୍ତାରେ କହିଛନ୍ତି ପରୀ ପ୍ରସଙ୍ଗ ପ୍ରଥମେ କଂଗ୍ରେସ ଦଳ ହିଁ ଉଠାଇଥିଲା । ନୟାଗଡରେ ଏହି ପ୍ରସଙ୍ଗକୁ ନେଇ ଦଳ ପକ୍ଷରୁ ସତ୍ୟାଗ୍ରହ କରାଯାଇଥିଲା । ସେତେବେଳେ ବିଜେପି କେଉଁଠି ଥିଲା ବୋଲି ସେ ପ୍ରଶ୍ନ କରିଛନ୍ତି । ଏବେ ବିଜେପି କଂଗ୍ରେସ ଉପରେ ଯେଉଁ ଆରୋପ ଲଗାଉଛି ତାହା ହାସ୍ୟାସ୍ପଦ ବୋଲି ନିରଞ୍ଜନ ପଟ୍ଟନାୟକ କହିଛନ୍ତି । ରାଜ୍ୟର ରାୟଗଡାର ଇତିଶ୍ରୀ ଘଟଣା, କୋରାପୁଟ ସସ୍ମିତା ଘଟଣା ଓ ମାଲକାନଗିରିରେ ପୋଲିସ କ୍ୟାଣ୍ଟନରେ ଗଣଧର୍ଷଣ ଘଟଣା ଓ ନବରଙ୍ଗପୁର କଷାଗୁମୁଡା ନାବାଳିକା ଦୁଷ୍କର୍ମ ଘଟଣା ତଥା ମହିଳା ମାନଙ୍କ ପ୍ରତି ହେଉଥିବା ଅତ୍ୟାଚାର ଉପରେ କଂଗ୍ରେସ ଦଳ ହିଁ ପ୍ରଥମେ ଆନ୍ଦୋଳନକୁ ଓହ୍ଲାଇଥିଲା ବୋଲି କହିଛନ୍ତି ।
ସେପଟେ ବିଜେପି ବିଧାୟକ ଦଳ ଟିମ ପକ୍ଷରୁ ଆଜି ନୟାଗଡରେ ପରୀର ଗ୍ରାମ ଯଦୁପୁର ଗସ୍ତ କରିଛନ୍ତି । ସେହିପରି ଦିଲ୍ଲୀରେ ବିଜେପି ନେତା ତଥା ଜାତୀୟ ପ୍ରବକ୍ତା ସମ୍ବିତ ପାତ୍ର ଜାତୀୟ ଶିଶୁ ଅଧିକାର ସୁରକ୍ଷା କମିଶନଙ୍କ ଦ୍ବାରସ୍ଥ ହୋଇଛନ୍ତି । ପରୀର ପରିବାରକୁ ଉପଯୁକ୍ତ ନ୍ୟାୟ ପ୍ରଦାନ କରିବା ପାଇଁ ନିବେଦନ କରିଛନ୍ତି ।
ଭୁବନେଶ୍ବରରୁ ତପନ କୁମାର ଦାସ,ଇଟିଭି ଭାରତ
