ବ୍ରହ୍ମପୁର: କୋରୋନା ଭଳି ମହାମାରୀ ସମୟରେ ଏହାର ମୁକାବିଲା କରିବା ପାଇଁ ଦୀର୍ଘ ଦିନ ଧରି ସାଧାରଣ ଜନତାଙ୍କୁ ସମସ୍ତ ପ୍ରକାର ସ୍ବାସ୍ଥ୍ୟସେବା ଯୋଗାଇ ଆସୁଛନ୍ତି ରାଜ୍ୟର ଆୟୁଷ ଡାକ୍ତର ମାନେ । ଏପରିକି ଜିଲ୍ଲାରେ ସରକାରଙ୍କ ସଙ୍ଗରୋଧ କେନ୍ଦ୍ର ଠାରୁ ଆରମ୍ଭ କରି ଘର ଘର ବୁଲି କୋରୋନା ଲକ୍ଷଣ ଦେଖି ରୋଗୀ ଚିହ୍ନଟ କରିବା ଏବଂ କୋଭିଡ ନିୟମ ଅନୁଯାୟୀ ସମସ୍ତ କାର୍ଯ୍ୟ କରି ଏକ ପ୍ରମୁଖ ଭୂମିକା ଗ୍ରହଣ କରିଛନ୍ତି । ତେବେ ଏମାନଙ୍କୁ କୋରୋନା ଯୋଦ୍ଧାର ମାନ୍ୟତା ପ୍ରଦାନ କରିବା ଦାବିରେ ଗଞ୍ଜାମ ଜିଲ୍ଲାପାଳଙ୍କ ସହ ଆଲୋଚନା କରିଛନ୍ତି ଜିଲ୍ଲାର ଆୟୁଷ ଡାକ୍ତର ସଙ୍ଘ ।
ଏଭଳି ସମୟରେ କୋରୋନା ଯୁଦ୍ଧରେ ନିଜକୁ ଉତ୍ସର୍ଗୀକୃତ କରିଥିବା ଏହି ଆୟୁଷ ଡାକ୍ତର ମାନଙ୍କ ପ୍ରତି ସରକାର ତୁରନ୍ତ ସ୍ବତନ୍ତ୍ର ଦୃଷ୍ଟି ଦେବା ଆବଶ୍ୟକ । ଏହାସହ ଏଭଳି ସମୟରେ ସରକାର ସେମାନଙ୍କ ପ୍ରତି ଗୁରୁତ୍ବ ନଦେଲେ ସେମାନେ ଏବଂ ତାଙ୍କ ପରିବାର କେତେ ସୁରକ୍ଷିତ ତାହାକୁ ନେଇ ପ୍ରଶ୍ନ ଉଠାଯାଇଛି ।
ଏଣୁ ସରକାରଙ୍କ ପକ୍ଷରୁ ଏହି ଡାକ୍ତର ମାନଙ୍କୁ ତୁରନ୍ତ କୋରୋନା ଯୋଦ୍ଧାର ମାନ୍ୟତା ପ୍ରଦାନ କରିବା, ଦୈନିକ ୧୫୦୦ ଟଙ୍କାର ଅତିରିକ୍ତ ପ୍ରୋତ୍ସାହନ ରାଶି ପ୍ରଦାନ କରିବା, କୋଭିଡ-୧୯ର ଜୀବନ ବୀମା ଭୁକ୍ତ କରିବା, ଦାୟିତ୍ବରେ ଥିବା ଡାକ୍ତରଙ୍କ ସ୍ବାବ ନମୁନା ପରୀକ୍ଷଣ ଓ ସଙ୍ଗରୋଧ ରହିବାର ବ୍ୟବସ୍ଥା ସହ ସ୍ବାସ୍ଥ୍ୟାବସ୍ଥା ଠିକ ନଥିବା ଡାକ୍ତରଙ୍କୁ କୋଭିଡ-୧୯ ଦାୟିତ୍ବରୁ ଦୂରେଇ ରଖିବା ପାଇଁ ବ୍ୟବସ୍ଥା କରିବା ଲାଗି ଦାବି କରିଯାଇଛି । ଏନେଇ ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେଙ୍କୁ ଏକ ଦାବି ପତ୍ର ପ୍ରଦାନ କରିବା ସହ ଏହି ଦାବି ପୂରଣ ହୋଇପାରିଲେ ସେମାନେ ଆହୁରି ଅଧିକ ଆଗ୍ରହୀ ଓ ଉତ୍ସାହର ସହ କୋରୋନା ଯୁଦ୍ଧରେ ସାମିଲ ହୋଇ ଏହାକୁ ପ୍ରତିହତ କରିବାରେ ସହାୟକ ହୋଇପାରିବେ ବୋଲି ଗଣମାଧ୍ୟମକୁ ଅବଗତ କରାଇଛନ୍ତି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭ ଭାରତ
