ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ପୁଣି କ୍ରମାଗତ ଭାବେ ବଢିବାରେ ଲାଗିଲାଣି କୋରୋନା ସଂକ୍ରମଣ । ଗତ ୨୪ ଘଣ୍ଟାରେ ୫୧୭ ନୂଆ ଆକ୍ରାନ୍ତ ଚିହ୍ନଟ ହେବା ପରେ ଚିନ୍ତା ବଢିଛି । ଆଜିର ସଂକ୍ରମଣ ସଂଖ୍ୟାକୁ ମିଶାଇ ଦୈନିକ ସଂକ୍ରମଣ ହାର ୪.୨୧ ପ୍ରତିଶତରେ ପହଞ୍ଚିଛି । ଦିଲ୍ଲୀ ସ୍ବାସ୍ଥ୍ୟ ବିଭାଗର ତଥ୍ୟ ଅନୁସାରେ ସହରର ମୋଟ ସଂକ୍ରମଣ ସଂଖ୍ୟା ୧୮,୬୮,୫୫୦କୁ ବୃଦ୍ଧି ପାଇଛି । ସେହିପରି ଏବେ ଯାଏ ମୋଟ ମୃତ୍ୟୁ ସଂଖ୍ୟା ୨୬,୧୬୦ ରହିଛି ।
ଗତ କିଛି ଦିନର ବ୍ୟବଧାନ ମଧ୍ୟରେ ଦିଲ୍ଲୀରେ ସଂକ୍ରମଣର ଗ୍ରାଫ୍ କ୍ରମାଗତ ଭାବେ ବୃଦ୍ଧି ପାଇବାରେ ଲାଗିଛି । ଗତକାଲି (ଶନିବାର) ୪୧୬ କୋଭିଡ ମାମଲା ସାମ୍ନାକୁ ଆସିଥିଲା । ତେବେ ଏପରି ସ୍ଥିତିରେ ଭୟଭୀତ ହେବାର କୌଣସି ଆବଶ୍ୟକତା ନଥିବା କହିଛନ୍ତି ଦିଲ୍ଲୀ ସ୍ବାସ୍ଥ୍ୟମନ୍ତ୍ରୀ ସତୈନ୍ଦ୍ର ଜୈନ । ଦିଲ୍ଲୀର ହସ୍ପିଟାଲ ଗୁଡିକରେ ଭିତ୍ତିଭୂମି ଉପରେ ମଧ୍ୟ ଦୃଷ୍ଟି ଦିଆଯାଉଛି । ଏଥିସହ ସଂକ୍ରମଣ ହାର ବର୍ତ୍ତମାନ ନିୟନ୍ତ୍ରଣାଧୀନ ରହିଥିବା ସେ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
