ନୂଆଦିଲ୍ଲୀ: ଦାମୀ ମୋବାଇଲ୍ ଏବଂ ଅନ୍ୟାନ୍ୟ ଇଲେକ୍ଟ୍ରୋନିକ୍ସ ସାମଗ୍ରୀ ଚୋରା ଚାଲାଣ କରୁଥିବା 3 ଯାତ୍ରୀଙ୍କୁ ଗିରଫ କଲା ଅବକାରୀ ବିଭାଗ । ବୁଧବାର ଦିଲ୍ଲୀ ଆଇଜିଆଇ ବିମାନ ବନ୍ଦରରେ ଦାମୀ ମୋବାଇଲ ଏବଂ ଅନ୍ୟାନ୍ୟ ଇଲେକ୍ଟ୍ରୋନିକ୍ସ ସାମଗ୍ରୀ ଚୋରା ଚାଲାଣ କରୁଥିବା 3 ଜଣ ଯାତ୍ରୀଙ୍କୁ ଦିଲ୍ଲୀ ଅବକାରୀ ବିଭାଗ ଗିରଫ କରିଛି। ତେବେ ଏହି ତିନି ଯାତ୍ରୀ ପ୍ୟାରିସରୁ ଦିଲ୍ଲୀ ଆସିଥିଲେ।
ଅବକାରୀ ବିଭାଗର ମୁଖପାତ୍ରଙ୍କ କହିବା ଅନୁସାରେ, ଏହି ତିନି ଯାତ୍ରୀ ଗ୍ରୀନ ଚ୍ୟାନେଲ ଅତିକ୍ରମ କରିବା ସମୟରେ ଅଧିକାରୀମାନଙ୍କୁ ସେମାନଙ୍କ ଉପରେ ସନ୍ଦେହ ହୋଇଥିଲା । ତୁରନ୍ତ ଅଧିକାରୀମାନେ ସେମାନଙ୍କୁ ରୋକି ସେମାନଙ୍କ ଜିନିଷପତ୍ର ଯାଞ୍ଚ କରିଥିଲେ। ଯେଉଁଥିରେ ସେମାନଙ୍କଠାରୁ ବହୁ ଆଇଫୋନ୍, କ୍ୟାମେରା, ଆଇପ୍ୟାଡ୍ ଏବଂ ଅନ୍ୟାନ୍ୟ ଇଲେକ୍ଟ୍ରୋନିକ୍ ଜିନିଷ ଅଧିକାରୀମାନେ ଜବତ କରିଥିଲେ ।
ତେବେ ଜବତ ହୋଇଥିବା ମୋବାଇଲ ଫୋନ ଏବଂ ଇଲେକ୍ଟ୍ରୋନିକ୍ସ ସାମଗ୍ରୀର ପାଖାପାଖି ମୂଲ୍ୟ 27 ଲକ୍ଷ ଟଙ୍କା ହେବ ବୋଲି ଅନୁମାନ କରାଯାଉଛି । ପଚରାଉଚରା ବେଳେ ଏହି ତିନିଜଣ ଏହି ସାମଗ୍ରୀ ବିଷୟରେ କୌଣସି ଉତ୍ତର ଦେଇପାରିନଥିଲେ। ଏହାପରେ ଅଧିକାରୀମାନେ ସେମାନଙ୍କୁ ଗିରଫ କରିଥିଲେ । ବର୍ତ୍ତମାନ ସେମାନଙ୍କୁ ପଚରାଉଚରା କରାଯାଉଛି।
ବ୍ୟୁରୋ ରିପୋର୍ଟ, ଇଟିଭି ଭାରତ
