ଚୋରା ଚାଲାଣ ବେଳେ ୨୫ ଲକ୍ଷ ଟଙ୍କାର ଗଞ୍ଜେଇ ଜବତ, ୨ ଗିରଫ

ରାୟଗଡା: ଜିଲ୍ଲାରେ ଥମୁନି ଚୋରା ଗଞ୍ଜେଇ ଚାଲାଣ । ବିଭିନ୍ନ ଉପାୟ ଅବଲମ୍ବନ କରି ବାହାର ରାଜ୍ୟକୁ ରାୟଗଡ଼ ଜିଲ୍ଲାରୁ ଚାଲାଣ ହେଉଛି କୋଟି କୋଟି ଟଙ୍କାର ଗଞ୍ଜେଇ । ଧର୍ମକୁ ଆଖି ଠାର ମାରିବା ଭଳି ମଝିରେ ମଝିରେ ଛୋଟ କାଟିଆ ଧରପଗଡ କରି ବାହା ବାହା ନେଉଛି ରାୟଗଡ଼ ପୋଲିସ । ଆଜି (ମଙ୍ଗଳବାର) ରାୟଗଡା ଜିଲ୍ଲା ଗୁଡାରି ଥାନା ଅଞ୍ଚଳରେ ଏକ ବୋଲେର ମ୍ୟାକ୍ସ ପିକଅପ ଭ୍ୟାନକୁ ଯାଞ୍ଚ କରିବା ପରେ ୪୧୭.୪୬୦ କେଜି ଗଞ୍ଜେଇ ଜବତ କରିବାରେ ସଫଳ ହୋଇଛି ଗୁଡାରି ପୋଲିସ । ଯାହାର ଆନୁମାନିକ ବଜାର ମୂଲ୍ୟ ୨୫ ଲକ୍ଷରୁ ଅଧିକ ହେବ ବୋଲି ଜଣାପଡିଛି ।

ଗଞ୍ଜେଇ ଚୋରା ଚାଲାଣ ହେଉଥିବା ଖବର ପାଇ ଆଜି ଭୋର ୪ଟା ସମୟରେ ରାୟଗଡା ବ୍ରହ୍ମପୁର ରାସ୍ତାର ଗୁମୁଡା ନିକଟରେ ପୋଲିସର ଏକ ଟିମ ଛପି ବସିଥିଲେ । ଏହି ସମୟରେ ଆଡବା ପଟରୁ ଏକ ନାଲି ରଙ୍ଗର ବୋଲେର ମ୍ୟାକ୍ସ ପିକଅପ ଭ୍ୟାନ ଦ୍ରୁତ ଗତିରେ ଛତିଶଗଡ ଅଭିମୁଖେ ଯାଉଥିଲା । ଫଳରେ ସନ୍ଦେହ ହେବାରୁ ବାଟରେ ଗୁମୁଡା ନିକଟରେ ଅଟକାଇ ଯାଞ୍ଚ କରିଥିଲା ପୋଲିସ । ଏହି ସମୟରେ ଗାଡି ରେ ୧୨ ଟି ଜରି ବସ୍ତାରେ ୪୧୭.୪୬୦ କେଜି ଗଞ୍ଜେଇ ଜବତ ହୋଇଥିଲା ।

ଏହି ଚୋରା ଗଞ୍ଜେଇ ଚାଲାଣ ମାମଲାରେ ଗଜପତି ଜିଲ୍ଲା ଖିଲାବାଡି ଗାଁର ସଞ୍ଜୟ କୁମାର ରଇତ ଓ ଅଜିତ ରଇତକୁ ପୋଲିସ ଗିରଫ କରିଛି । ସଞ୍ଜୟ କୁମାର ରଇତ ଗାଡିର ଡ୍ରାଇଭର ହୋଇଥିବା ବେଳେ ଅଜିତ ରଇତ ଗଞ୍ଜେଇ ଚୋରା ଚାଲାଣରେ ସହୋଯୋଗ କରୁଥିବା ପୋଲିସ କହିଛି । ଏମାନଙ୍କ ନିକଟରୁ ଦୁଇଟି ମୋବାଇଲ ଫୋନ ଜବତ କରିବା ସହ NDPS ଆଇନ ଧାରା ୨୦(ବି)(୨)(ସି) ଅନୁଯାଇ ଏକ ମାମଲା ରୁଜୁ କରିଛି ପୋଲିସ । ଏହାସହ ଉଭୟଙ୍କୁ ଗୁଣପୁର ବିଚାର ବିଭାଗୀୟ ହାଜତକୁ ପଠାଇ ଦେଇଛି ପୋଲିସ। ଏହି ଘଟଣାରେ ଅନ୍ୟ ମାନଙ୍କ ସମ୍ପୃକ୍ତି ନେଇ ତଦନ୍ତ କରୁଛି ଗୁଡାରି ପୋଲିସ ।

ଇଟିଭି ଭାରତ, ରାୟଗଡା