ପୁରୀ: ଶ୍ରୀକ୍ଷେତ୍ରରୁ ଶୁଭାରମ୍ଭ ହେଲା ବିଜେପିର 'ବିଜୟ ଅଭିଯାନ ଯାତ୍ରା' । ଓଡ଼ିଶାର ସବୁ ବିଜେପି ପ୍ରାର୍ଥୀଙ୍କ ପାଇଁ ଗଲା ମହାପ୍ରଭୁ ଶ୍ରୀଅଙ୍ଗ ଲାଗି ବସ୍ତ୍ର, ମାଳ ଓ ମହାପ୍ରସାଦ । ମହାପ୍ରଭୁଙ୍କ ଆଶୀର୍ବାଦ ନେଇ ଆଗାମୀ ନିର୍ବାଚନରେ ଲଢେଇ କରି ଜିତିବା ଲକ୍ଷ୍ୟରେ ମଇଦାନକୁ ଓହ୍ଲାଇବାକୁ ପ୍ରସ୍ତୁତ ପ୍ରାର୍ଥୀ । ପୁରୀରୁ ଆରମ୍ଭ ହୋଇଛି ବିଜେପିର ବିଜୟ ଅଭିଯାନ କାର୍ଯ୍ୟକ୍ରମ । ଦଇତାପତି ସେବକ ତଥା ରାଜ୍ୟ ବିଜେପି ଉପସଭାପତି ଭବାନୀ ଦାସ ମହାପାତ୍ରଙ୍କ ନେତୃତ୍ଵରେ ଏହି 'ବିଜୟ ଅଭିଯାନ ଯାତ୍ରା' ଶୁଭାରମ୍ଭ ହୋଇଛି । ଶ୍ରୀମନ୍ଦିର ସିଂହଦ୍ୱାର ସମ୍ମୁଖରେ ମହାପ୍ରଭୁଙ୍କ ଉଦ୍ଦେଶ୍ୟରେ ଦୀପଦାନ କରାଯାଇଛି । ପରେ ପାରମ୍ପରିକ ଘଣ୍ଟ ଘଣ୍ଟା, ମୃଦଙ୍ଗ ଆଦି ବାଦ୍ୟର ତାଳରେ ପୁରୀରେ ଏକ ଶୋଭାଯାତ୍ରା ଅନୁଷ୍ଠିତ ହୋଇଛି ।
ଦଇତାପତି ସେବକ ଭବାନୀ ଦାସ ମହାପାତ୍ର କହିଛନ୍ତି, "ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସ୍ବପ୍ନ ଓ ଲକ୍ଷ୍ୟକୁ ସାକାର କରିବା ପାଇଁ ମହାପ୍ରଭୁଙ୍କ ଆଶୀର୍ବାଦ ନିଆଯାଇ ପୁରୀରୁ ଏହି ବିଜୟ ଅଭିଯାନ ଯାତ୍ରା ଆରମ୍ଭ ହୋଇଛି । ସାରା ଓଡ଼ିଶା ପାଇଁ ଦଳ ଆରମ୍ଭ କରିଛି ଏହି ଅଭିଯାନ । ମହାପ୍ରଭୁଙ୍କ ଆଶୀର୍ବାଦ ବିନା କୌଣସି କାର୍ଯ୍ୟ ସଫଳ ହୋଇପାରିବନାହିଁ । ଏଣୁ ମହାପ୍ରଭୁଙ୍କ ଶକ୍ତି ଓ ଆଶୀର୍ବାଦ ନିଆଯାଇ ଚଳିତ ନିର୍ବାଚନରେ ବିଜେପି ଓଡି଼ଶାରେ ଜୋରଦାର ଲଢେଇ କରିବ । ଆଗାମୀ ନିର୍ବାଚନରେ ବିଜେପି ସରକାର ଗଠନ କରିବ । ମୋଦିଙ୍କ ସୁଶାସନ ଓଡ଼ିଶାରେ ପ୍ରତିଷ୍ଠା କରାଯିବ । ବିଜେଡିର ଅପାରଗ, ଦୁର୍ନୀତିଗ୍ରସ୍ତ ସରକାରଙ୍କୁ ପରାସ୍ତ କରାଯିବ।"
ସେ ଆହୁରି କହିଛନ୍ତି, "ବିଜେପିର ଯୋଦ୍ଧା ତଥା ପ୍ରାର୍ଥୀଙ୍କ ନିକଟରେ ମହାପ୍ରଭୁଙ୍କ ଆଶୀର୍ବାଦ ପହଞ୍ଚାଇବା ପାଇଁ ଆରମ୍ଭ ହୋଇଛି ବିଜୟ ଅଭିଯାନ ଯାତ୍ରା । ଓଡ଼ିଶାର ସମସ୍ତ ନିର୍ବାଚନ ମଣ୍ଡଳୀକୁ ମହାପ୍ରଭୁଙ୍କ ଶ୍ରୀଅଙ୍ଗ ଲାଗି ବସ୍ତ୍ର, ମାଳ, ମହାପ୍ରସାଦ ନିଆଯାଉଛି । ଏହାସହ ବିଜେପିର ସବୁ ପ୍ରାର୍ଥୀଙ୍କୁ ମହାପ୍ରଭୁଙ୍କ ସାମଗ୍ରୀ ପ୍ରଦାନ କରାଯାଇ ଆଗାମୀ ନିର୍ବାଚନ ଲଢେଇ ପାଇଁ ଉତ୍ସାହିତ କରାଯିବ।" ନିର୍ବାଚନକୁ ଖୁବ କମ୍ ଦିନ ଥିବାବେଳେ ସବୁ ଦଳର ପ୍ରାର୍ଥୀ ନିଜ ନିଜ ପ୍ରସ୍ତୁତି ଚଳାଇଛନ୍ତି । ଏହି ପରିପ୍ରେକ୍ଷୀରେ ବିଜେପି ମଧ୍ୟ ମହାପ୍ରଭୁଙ୍କ ଆଶୀର୍ବାଦ ନେଇ ପ୍ରାର୍ଥୀଙ୍କୁ ମଇଦାନକୁ ଓହ୍ଲାଇବା ପାଇଁ ନିଷ୍ପତ୍ତି ନେଇଛି ।
ଇଟିଭି ଭାରତ, ପୁରୀ
