ଭୁବନେଶ୍ବର: ଧର୍ମେନ୍ଦ୍ର ପ୍ରଧାନଙ୍କୁ ବିଜେଡିର ଟାର୍ଗେଟ ପରେ ତୁରନ୍ତ କାଉଣ୍ଟର ଆଟାକ୍ କଲା ବିଜେପି । ଆଜି ପ୍ରେସମିଟରେ କେନ୍ଦ୍ରମନ୍ତ୍ରୀ ତଥା ବିଜେପି ସମ୍ବଲପୁର ସାଂସଦ ପ୍ରାର୍ଥୀ ଧର୍ମେନ୍ଦ୍ର ପ୍ରଧାନଙ୍କୁ ମହିଳା ବିରୋଧୀ କହି ଟାର୍ଗେଟ କରିଥିଲେ ବିଜେଡି ସାଂସଦ ସୁଲତା ଦେଓ । ଜବାବରେ ବିଜେଡି ନେତ୍ରୀ ସୁଲତା ଦେଓ ଡାହା ମିଛ କହୁଛନ୍ତି ବୋଲି ଅଭିଯୋଗ ଆଣିଛନ୍ତି ରାଜ୍ୟ ବିଜେପି ସମ୍ପାଦିକା କସ୍ତୁରୀ ମହାପାତ୍ର ।
ରାଜ୍ୟ ବିଜେପି କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ କସ୍ତୁରୀ ମହାପାତ୍ର କହିଛନ୍ତି, "ବିଜେଡି ନେତ୍ରୀ ସୁଲତା ଦେଓ ଡାହା ମିଛ କହୁଛନ୍ତି । ପଣସ ଖାଇ ଅନ୍ୟ ମୁଣ୍ଡରେ ଅଠା ବୋଳିବା ବିଜେଡି ନେତ୍ରୀ ସୁଲତା ଦେଓଙ୍କ ଅଭ୍ୟାସ । ଏସଏଚଜି ମହିଳାଙ୍କ ଭୋଟ ବ୍ୟାଙ୍କ ଭାଙ୍ଗିଯିବା ଭୟରେ ମିଶନ ଶକ୍ତି ସଚିବ ସୁଜାତା କାର୍ତ୍ତିକେୟନ ସୁଲତା ଦେଓଙ୍କୁ ମିଛ କହିବା ପାଇଁ ପଠାଇଥିଲେ । ସୁଜାତା କାର୍ତ୍ତିକେୟନଙ୍କ ଚାଟୁକାରିତା କରିବା ପାଇଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବିରୋଧରେ କହିଛନ୍ତି ସୁଲତା ଦେଓ । ଆଦର୍ଶ ଆଚରଣ ବିଧି ଲାଗୁ ସମୟରେ ଏସଏଚଜି ମହିଳାମାନଙ୍କୁ ସରକାରୀ ଖର୍ଚ୍ଚରେ ଦୁବାଇ ପଠାଇବା ପାଇଁ ଯୋଜନା କରିଥିଲେ ବିଜେଡି ସରକାର । ଯାହାକୁ ନେଇ ଇସିଆଇଙ୍କୁ ଜଣାଇଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ପରେ ଇସିଆଇ ଏସଏଚଜି ମହିଳାଙ୍କ ଦୁବାଇ ଗସ୍ତ ଉପରେ ରୋକ ଲଗାଇଛନ୍ତି । ଅର୍ଥାତ ବିଜେଡି ଆଦର୍ଶ ଆଚରଣ ବିଧିର ଉଲ୍ଲଙ୍ଘନ କରୁଥିଲା ବୋଲି ସ୍ପଷ୍ଟ ହୋଇଛି ।"
ସେହିଭଳି ମହିଳାଙ୍କ ବିକାଶ ପାଇଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅବଦାନ ସମସ୍ତେ ଜାଣିଛନ୍ତି ବୋଲି କହିଛନ୍ତି ରାଜ୍ୟ ବିଜେପି ସମ୍ପାଦିକା କସ୍ତୁରୀ ମହାପାତ୍ର । ସେ କହିଛନ୍ତି, "55 ଲକ୍ଷ ମହିଳାଙ୍କୁ ଉଜ୍ବଳା ଯୋଜନାରେ ମାଗଣା ଗ୍ୟାସ ଦେଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସେଥିପାଇଁ ଧର୍ମେନ୍ଦ୍ରଙ୍କୁ 'ଉଜ୍ବଳା ମ୍ୟାନ୍' ବୋଲି କୁହାଯାଉଛି । ମିଶନ ଶକ୍ତି ଯୋଜନା କେନ୍ଦ୍ର ସରକାରଙ୍କ ଯୋଜନା ।" ସାଧାରଣ ନିର୍ବାଚନକୁ ନେଇ ରାଜ୍ୟ ରାଜନୀତି ସରଗରମ ରହିଥିବବେଳେ ଏବେ ବିଜେଡି ଓ ବିଜେପି ମଧ୍ୟରେ ଆରୋପ ପ୍ରତ୍ୟାରୋପ ଜୋର ଧରିଛି ।
ଇଟିଭି ଭାରତ, ଭୁବନେଶ୍ବର
