नागपूर Nagpur Crime : हॉटेल मालकाच्या हत्येचा तपास सुरू असताना नागपूर पोलिसांनी बंदूक तस्करांच्या टोळीचा पर्दाफाश केला आहे. तहसील पोलिसांनी मध्य प्रदेशातील बालाघाट येथून एका तस्कराला, तर नागपुरातून एका तस्कराला अटक केली आहे. पोलिसांनी आरोपींकडून एकूण नऊ पिस्तुल जप्त केल्या आहेत. याशिवाय 84 जिवंत काडतुसंही पोलिसांनी जप्त केली आहेत. मुख्य आरोपीचं नाव इमरान आलम असून दुसऱ्या आरोपीचं नाव फिरोज खान असं आहे.
आरोपींना ठोकल्या बेड्या : तहसील पोलीस ठाण्याच्या हद्दीतील मोमीनपुरा येथील अल्करीम गेस्ट हाऊसचे मालक जमील अहमद यांची गेल्या महिन्याच्या 25 तारखेला गोळ्या झाडून हत्या करण्यात आली होती. या प्रकरणी तहसील पोलिसांनी आरोपी मोहम्मद परवेज मोहम्मद हारूनसह त्याच्या साथीदारांना अटक केली.
बंदूक तस्करी उघड : जमील अहमदची हत्या करताना आरोपींनी वापरलेली बंदूक कुठून खरेदी केली याचा तपास पोलीस करत होते. तेव्हा मोहम्मद परवेझ मोहम्मद हारून यानं फिरोज खान नावाच्या तस्कराकडून पिस्तुल विकत घेतल्याची कबुली पोलिसांना दिली. त्यानंतर पोलिसांनी फिरोज खानला अटक करून मध्य प्रदेशातील बालाघाट येथे चौकशी केली. तेव्हा आरोपीनं इम्रान आलम नावाच्या आरोपीचं नाव पोलिसांना सांगितलं.
नऊ पिस्तुल जप्त : पोलिसांनी इम्रान आलमला सापळा रचून अटक केल्यानंतर त्यानं धक्कादायक माहिती पोलिसांनी दिली. त्यानं नागपूर येथील फिरोज खान नामक तस्कराला अनेक पिस्तुल पुरवल्याची कबुली दिली. त्यानंतर पोलिसांनी आतापर्यंत ९ पिस्तुलसह ८४ कडतुस जप्त केली आहेत.
नागपुरात तस्करीचा धंदा : मध्य प्रदेशातील बालाघाट येथील रहिवासी असलेला इम्रान आलम अनेक वर्षांपासून नागपूरच्या फिरोजला पिस्तुल पुरवत होता. फिरोज नागपुरात पिस्तुल विकायचा. हे दोघे मिळून तस्करीचा व्यवसाय करत होते. नागपुरात आतापर्यंत किती गुन्हेगारांना त्यांनी पिस्तुल पुरवल्या आहेत, याची माहिती पोलीस घेत असून सध्या नऊ पिस्तुल आणि 84 काडतुसे जप्त करण्यात आली आहेत.
हेही वाचा -
Two Murders In Nagpur : नागपुरात दोघांची हत्या, प्रॉपर्टी डीलरच्या डोक्यात झाडली गोळी
