मुंबई No Mobile For ST Bus Driver: महाराष्ट्रात एसटी महामंडळाच्या हजारो गाड्या आहेत. कोट्यवधी प्रवासी बसने प्रवास करतात; परंतु बस चालवताना काही बस चालक मोबाईलवर संभाषण करत असतानाची बाब काही लोकप्रतिनिधींना आढळली. त्यांनी महामंडळाच्या प्रशासनाकडे याबाबत तक्रार केली. या तक्रारीची दखल घेत महामंडळाने याबाबत आता महाराष्ट्र राज्य परिवहन बस चालक वाहन चालवत असताना मोबाईलचा वापर करणार नाही, अशी बंदी त्यावर आणली गेलेली आहे.
बस चालकांवरील नवीन नियम: प्रवाशांची सुरक्षितता, त्यांच्या जीवाची हमी याबाबतच हा निर्णय घेतला असल्याचं महामंडळाचं म्हणणं आहे. प्रवाश्यांकडून अनेकदा तक्रारी प्राप्त होतात. प्रसारमाध्यमांवर देखील याबाबत तीव्र प्रतिक्रिया व्यक्त होत असतात. त्यामुळे बस चालवताना मोबाईल हा कंडक्टरकडे देण्यात यावा. विना वाहक फेरीवरील चालकानं वाहन चालविताना आपला मोबाईल बॅगमध्ये ठेवावा. वाहन चालवणाऱ्या ड्रायव्हरनं ब्लूटूथ, हेडफोन इत्यादी उपकरणाचा वापर करू नये. तसेच ही सूचना भाडेतत्त्वावरील बस चालकांना आणि शासकीय एसटी महामंडळ बस चालकांना देखील लागू असणार आहे.
तर होणार नियमभंग केल्याची कारवाई: महामंडळाच्या सूचना आदेशानुसार एसटी महामंडळाच्या बस ज्या मार्गाने जातात त्या मार्ग तपासणी पथकांनी सुरक्षा व दक्षता खाते यांनी दैनंदिन याबाबत निरीक्षण करावे. तसा अहवाल देखील सादर करण्याचे आदेश यामध्ये नमूद केलेले आहे. आदेशानुसार दोषी आढळल्यास त्याच्यावर खातेनिहाय नियमभंग केल्याची कारवाई देखील करण्यात येईल.
जनतेनं केलं स्वागत: यासंदर्भात बसने प्रवास करणारे राष्ट्रवादी काँग्रेस पक्षाचे युवक अध्यक्ष एड. अमोल मातेले पाटील म्हणाले की, हा निर्णय चांगला आहे. अनेकदा बस चालक कानामध्ये हेडफोन, ब्लूटूथ लावून गाणे ऐकत असतात किंवा त्यांच्या आवडीच्या गोष्टी ऐकत असतात. परंतु, त्यावेळेला सर्व लक्ष बसवर असलं पाहिजे. 100 लोकांचा जीव त्यांच्या हातामध्ये असतो. एका बस चालकाने याबाबत नाव न सांगण्याच्या अटीवर प्रतिक्रिया दिली की, हा निर्णय चांगला आहे; परंतु तातडीच्या वेळी अपघात प्रसंगी मोबाईल वापरू देण्याची परवानगी असली पाहिजे.
अपघातांवर नियंत्रण येणार: महाराष्ट्र राज्य परिवहन महामंडळाचे उपाध्यक्ष व्यवस्थापकीय संचालक शेखरचंद म्हणाले की, या नियमांचा वापर केल्यास अपघातांवर नक्कीच नियंत्रण येईल. याचा प्रवाशांना आणि राज्याला देखील लाभ होईल आणि तक्रारीस वाव राहणार नाही. त्यामुळेच या सूचनांची काटेकोर अंमलबजावणी महाराष्ट्रात सर्व बस स्थानकामध्ये सर्व बस चालकांनी केली पाहिजे.
हेही वाचा:
