मुंबई : तब्बल 38 हजार कोटींच्या विविध कामांच्या भूमिपूजन, लोकार्पण सोहळ्यासाठी मुंबईत आलेले पंतप्रधान नरेंद्र मोदीच्या सभेला गर्दी जमवण्यासाठी बृहन्मुंबई महानगरपालिकेच्या अतिक्रमण विरोधी पथकाच्या गाड्यांमध्ये भरून फेरीवाल्यांना नेलं जात असल्याची घटना कुर्ल्यात घडली आहे. मुंबईत सुमारे 38 हजार 800 कोटी रुपयांच्या प्रकल्पांचे लोकार्पण, भूमिपूजन समारंभात पंतप्रधान नरेंद्र मोदी सहभागी झाले होते. यावेळी राज्यपाल भगतसिंग कोश्यारी, मुख्यमंत्री एकनाथ शिंदे, उपमुख्यमंत्री देवेंद्र फडणवीस आदी नेते उपस्थित होते.
सभेला कुर्ल्यातील फेरीवाले - पंतप्रधान नरेंद्र मोदी यांची सभा मुंबईतील बांद्रा कुर्ला कॉम्प्लेक्स येथे घेण्यात आली. ज्या मैदानावर पंतप्रधानांची सभा घेण्यात आली त्या मैदानाची क्षमता साधारण एक लाख लोक जमू शकतील इतकी आहे. ह्या मैदानावर गर्दी जमवण्यासाठी शिंदे फडणवीस सरकारकडून ठिकठिकाणी बसेस मधून कार्यकर्ते आणण्यात आले. मात्र, या सभेला आता कुर्ल्यातील काही फेरीवाल्यांना सुद्धा बृहन्मुंबई महानगरपालिकेच्या अतिक्रमण विभागाच्या गाड्यांमधून भरून सभास्थळी नेल्याची घटना समोर आली आहे. हे फेरीवाले कुर्ला पश्चिम येथील काजूपाडा पाईपलाईन जवळील असल्याची माहिती मिळते.
फेरीवाल्यांसाठी आत्मनिर्भर निधी - कोविड19 आणि लॉकडाऊननंतर फेरीवाल्यांना त्यांच्या व्यवसायासाठी सुलभतेने भांडवल उपलब्ध व्हावे यासाठी जून 2020 मध्ये प्रधानमंत्री पथविक्रेता आत्मनिर्भर निधी ही योजना सुरू करण्यात आली. या योजनेंतर्गत मुंबईतील १ लाखाहून अधिक फेरीवाल्यांना प्रधानमंत्री स्वानिधी योजनेअंतर्गत कर्ज वाटपाचा लाभ मिळणार आहे. या योजनेसाठी बृहन्मुंबई महानगरपालिकेने आपल्या 24 विभागांमध्ये 2301 शिबिरे आयोजित केली होती.
विविध विकास कामांचे उद्घाटन - पंतप्रधान नरेंद्र मोदी यांनी गुरुवारी मुंबईत मेट्रो रेल्वे लाईन्स 2Aतसेच 7 देशाला समर्पित केली. यानंतर त्यांनी 38 हजार 800 कोटी रुपयांहून अधिक किमतीच्या प्रकल्पांची पायाभरणी, उद्घाटन केले. यामध्ये सांडपाणी प्रक्रिया प्रकल्पांची पायाभरणी, रस्ते काँक्रिटीकरण प्रकल्प, मुंबईतील छत्रपती शिवाजी महाराज टर्मिनसचा पुनर्विकास यांचा समावेश आहे.
हेही वाचा - PM Modi In Mumbai : शिंदे-फडणवीस जोडी येताच विकासाला गती; पंतप्रधानांकडून सरकारचे कौतूक
