फोटो काढायला गेली अन् अवघ्या दोन सेकंदात दागिन्यांची पर्स लंपास, वऱ्हाडी बनून आलेल्या चोराचा प्रताप

कोल्हापूर Kolhapur Robbery : लग्न समारंभासाठी बेळगावहून कोल्हापुरात आलेली एक महिला नातेवाईकांसोबत फोटो काढण्यासाठी काही सेकंदासाठी पर्स ठेवून बाजूला गेली आणि 35 तोळ्यांच्या दागिन्यांना मुकली. लग्न समारंभात वऱ्हाडी म्हणून आलेल्या चोरट्याने पर्समधील सुमारे 35 तोळ्यांचे सोन्याचे दागिने, रोख 8 हजार आणि मोबाईल असा सुमारे 24 लाख रुपये किमतीचा ऐवज हातोहात लांबवला. सोमवारी शिरोली नाक्याजवळील एका मंगल कार्यालयात ही चोरीची घटना घडली. (Kolhapur purse theft incident)

अज्ञात चोरट्याने लांबवली पर्स : पोलिसांनी दिलेल्या माहितीप्रमाणे, सोमवारी रात्री कोल्हापुरातील शिरोली नाक्याजवळ असलेल्या एका मंगल कार्यालयात लग्न समारंभ आयोजित करण्यात आला होता. या समारंभासाठी बेळगाव येथील केतन नंदेशवन हे कुटुंबीयांसोबत रात्री दहा वाजण्याच्या सुमारास स्वागत समारंभात फोटो काढण्यासाठी गेले. केतन यांच्या आई मीना यांनी त्यांच्या पायाजवळ पर्स ठेवली आणि फोटो क्लिक व्हायच्या आतच अवघ्या काही सेकंदात ही पर्स अज्ञात चोरट्याने लांबवली. फोटो काढून येताच हा प्रकार नंदेशवन यांच्या ध्यानात आला. यानंतर सर्वांनी शोधाशोध केली पण उपयोग झाला नाही. या पर्समध्ये सुमारे 35 तोळ्याचे दागिने, रोख रक्कम आणि मोबाईल होता.

सीसीटीव्हीच्या आधारे चोरट्याचा शोध : लग्न समारंभातील चोरीच्या घटनेची माहिती पोलिसांना देण्यात आली. दरम्यान पोलिसांनी आणि नातेवाईकांनी कार्यालयातील सीसीटीव्ही कॅमेऱ्यांमधून संशयितांचा शोध घेण्याचा प्रयत्न केला. यावेळी सीसीटीव्हीमध्ये हा चोरटा सूटबुटामध्ये येऊन चोरी करून गेल्याचं निदर्शनास येत आहे. चोरीला गेलेल्या मुद्देमालाची बाजारभावाप्रमाणे किंमत २४ लाख रुपये इतकी आहे; परंतु पोलीस रेकॉर्डवर १५ लाख ८० हजार रुपयांचा ऐवज लंपास झाल्याची नोंद करण्यात आली आहे. या चोरीची नोंद शाहूपुरी पोलीस ठाण्यात झाली असून पोलीस निरीक्षक अजय सिंदकर यांच्या मार्गदर्शनाखाली तपास सुरू करण्यात आला आहे.

घटना सीसीटीव्हीत कैद : सुटा-बुटाचा पेहराव करून आलेल्या संशयित चोरट्याने केलेली चोरी मंगल कार्यालयातील सीसीटीव्ही कॅमेऱ्यात कैद झाली आहे. अंदाजे 25 ते 30 वयोगटातील तरुण लग्न समारंभामध्ये संशयितरित्या वावरत असल्याचं दिसत असून पाळत ठेवून त्याने चोरी केल्याचं सीसीटीव्ही फुटेज पोलिसांना मिळालं आहे. या फुटेजच्या आधारे चोरट्याचा शोध घेण्याचं काम सध्या सुरू आहे.

पर्समध्ये हे होते दागिने : ७.५ तोळ्यांचा हार, ५ तोळ्यांचा कोयरी हार, ३ तोळ्यांचे मंगळसूत्र, ६ तोळ्यांच्या बांगड्या, ५ तोळ्यांचे तोडे (२ नग), ५ तोळ्यांचे बाजूबंद, ६.८ ग्रॅमच्या अंगठ्या (३ नग), १.५ तोळा वजनाच्या सोन्याच्या रिंग, कर्णफुले, मोबाईल फोन असा 24 लाखांचा मुद्देमाल लंपास करण्यात आला आहे.

हेही वाचा: