मुंबई Cricket World Cup 2023 : भारतीय क्रिकेट संघ इतिहास रचण्यापासून केवळ एक पाऊल दूर आहे. भारत आणि ऑस्ट्रेलिया यांच्यातील विश्वचषक 2023 चा अंतिम सामना आज (19 नोव्हेंबर) गुजरातमधील अहमदाबाद येथील नरेंद्र मोदी स्टेडियमवर खेळला जाणार आहे. दरम्यान, ज्या क्षणाची वाट जवळपास दीड महिना पाहिली गेली, तो क्षण आता अवघ्या काही तासांवर आला आहे. त्यामुळं सर्वत्र उत्साहाच वातावरण पाहायला मिळतंय. याच पार्श्वभूमीवर आता गुगलनं क्रिकेट विश्वचषक 2023 च्या अंतिम सामन्यासाठी एक खास डूडल तयार केलं आहे.
कसं आहे डूडल : भारत-ऑस्ट्रेलियामध्ये आज अहमदाबादच्या नरेंद्र मोदी स्टेडियमवर फायनलचा थरार रंगणार आहे. भारतात क्रिकेटला उत्सवाप्रमाणं साजरं केलं जातं. प्रत्येक क्रिकेटप्रेमी आपल्या स्टाईलमध्ये मेन इन ब्ल्यूला सपोर्ट करतोय. टीम इंडिया जबरदस्त फॉर्ममध्ये असून याच पार्श्वभूमीवर विविध स्तरातून त्यांना आजच्या अंतिम सामन्यासाठी शुभेच्छा दिल्या जात आहेत. यासाठी गुगलनेही खास डूडल तयार केलंय. हे डूडल ॲनिमेटेड स्वरूपात आहे. प्रेक्षकांच्या उपस्थितीत क्रिकेटचे ग्राऊंड अन् ट्रॉफी या डूडलमध्ये दिसत आहे. तसंच तुम्ही या ॲनिमेटेड चित्रावर क्लिक कराल तेव्हा तुम्हाला आजच्या सामन्याची सविस्तर माहिती दिसेल.
आजच्या सामन्याकडं संपूर्ण जगाचं लक्ष- भारत आणि ऑस्ट्रेलिया या दोन्ही संघांनी या विश्वचषकात उत्कृष्ट कामगिरी केलीय. भारतीय संघ आतापर्यंत अजिंक्य राहिलाय. या विश्वचषकात भारताला पराभूत करण्यात कोणत्याही संघाला यश आलेलं नाही. भारतीय संघानं सलग 10 सामने जिंकून अंतिम फेरी गाठलीय. उपांत्य फेरीतही भारतानं न्यूझीलंडला 398 धावांचे लक्ष्य दिलं होतं. हा सामना 70 धावांनी जिंकला होता. ऑस्ट्रेलियन संघानं स्पर्धेतील सुरुवातीचे दोन सामने गमावल्यानंतर अप्रतिम पुनरागमन केलं. त्यानंतर एकही सामना गमावला नाही. कांगारुंनी सलग 8 सामने जिंकून अंतिम फेरी गाठलीय. त्यामुळं आता आजच्या सामन्यात काय होणार याकडं सर्वांचं लक्ष लागलंय.
हेही वाचा -
- 140 कोटी भारतीयांच्या अपेक्षा पूर्ण करण्याकरिता भारतीय संघाचे 11 शिलेदार उतरणार मैदानात; कोण होणार विश्वविजेता?
- India vs Australia cricket Live updates: काँग्रेसच्या माजी अध्यक्षा सोनिया गांधी यांनी भारतीय क्रिकेट संघाला जिंकण्याकरिता दिल्या शुभेच्छा
- अंतिम सामन्यात अश्विनला संधी मिळेल का? रोहित शर्मानं थेट उत्तर दिलं
