IND Vs AUS Final Live : ऑस्ट्रेलिया सहाव्यांदा विश्वविजेता; भारताचा पराभव

ऑस्ट्रेलिया सहाव्यांदा विश्वविजेता ठरला आहे. 241 धावांचा पाठलाग करताना ऑस्ट्रेलियाने सहज हे लक्ष्य गाठलं.

ऑस्ट्रेलियन फलंदाज हेडनं शानदार शतक झळकवलं. ऑस्ट्रेलिया विजयाच्या उंबरठ्यावर आहे.

ऑस्ट्रेलियाच्या दीडशे धावा पूर्ण झाल्या आहेत. हेड-लाबुशेनची दमदार खेळी केली. या दोघांनी चांगली भागेदारी करत संघाला सांभाळलं.

ऑस्ट्रेलियाने शंभर धावा पूर्ण केल्या आहेत. संघाच्या पडत्या काळात ट्रॅविस हेडने चांगली खेळी करत अर्धशतक पूर्ण केले आहे.

भारतीय गोलंदाजांची धार दिसून येत आहे. सुरुवातीलाचा ऑस्ट्रेलियाचे तीन विकेट घेतल्यानंतर भारतीय गोलंदाजांनी कांगारुंना प्रेशरमध्ये टाकले आहे. त्यामुळं ऑस्ट्रेलियाचे फलंदाज सावध फलंदाजी करत आहेत.

ऑस्ट्रेलियाला तिसरा सर्वात मोठा धक्का बसला आहे. स्टिव्ह स्मिथ चार धावांवर बाद झाला. बुमराहने ही विकेट घेतली आहे.

ऑस्ट्रेलियाला दुसरा धक्का बसला आहे. मिशेल मार्शला जसप्रीत बुमराहने गुमराह केले आहे. मिशेल मार्श 15 बॉलवर 15 धावा करुन बाद झाला.

ऑस्ट्रेलियाची चांगली सुरुवात झाली होती. पहिल्याच ओव्हरमध्ये तीन चौकार लगावण्यात आले होते. मात्र, नंतर शमीने ओव्हरच्या दुसऱ्याच बॉलवर वॉर्नर आऊट झाला.

ऑस्ट्रेलियाची चांगली सुरुवात झाली आहे. पहिल्याच ओव्हरमध्ये तीन चौकार मारले आहेत.

विश्वचषकाच्या अंतिम सामन्यात प्रथम फलंदाजी करताना भारताच्या ५० षटकात सर्वबाद २४० धावा झाल्या आहेत. आता ऑस्ट्रेलियासमोर विजयासाठी २४१ धावांचं माफक आव्हान आहे. भारताकडून केएल राहुलनं १०७ चेंडूत सर्वाधिक ६६ धावा केल्या, तर विराट कोहलीनं ६३ चेंडूत ५४ आणि कर्णधार रोहित शर्मानं ३१ चेंडूत ४७ धावांचं योगदान दिलं. ऑस्ट्रेलियाकडून मिशेल स्टार्कनं ५५ धावा देत ३ बळी घेतले.

विश्वचषकाच्या अंतिम सामन्यात प्रथम फलंदाजी करताना भारताच्या ५० षटकात सर्वबाद २४० धावा झाल्या आहेत. आता ऑस्ट्रेलियासमोर विजयासाठी २४१ धावांचं माफक आव्हान आहे.

भारताला नववा धक्का बसला आहे. सूर्यकुमार यादव २८ चेंडूत १८ धावा करून बाद झाला.

भारताला आठवा धक्का बसला आहे. बुमराह तीन बॉलमध्ये एक धाव करुन आऊट झाला आहे.

भारताला सातवा धक्का बसला आहे. मोहम्मद शमी सहा धावांवर बाद झाला आहे.

भारताला सहावा धक्का बसला आहे. केएल राहुल 66 धावांवर बाद झाला आहे.

भारताच्या 200 धावा पूर्ण झाल्या आहेत. केएल राहुलची उत्तम खेळी आणि त्याला सुर्याने दिलेली साथ यामुळं भारताने 200 धावांचा टप्पा पूर्ण केला आहे.

भारताला पाचवा धक्का बसलाय. रविंद्र जडेजाने 22 बॉलमध्ये 9 धावा करुन बाद झाला.

केएल राहुलनं अर्धशतक पूर्ण केले आहे. त्यानं 86 बॉलमध्ये अर्धशकत पूर्ण केले. संघाची सुरुवातीची बॅटिंग ऑर्डर पडत असताना केएल राहुलने डाव सांभाळला.

विराट कोहली आऊट झाल्यानंतर रविंद्र जडेजावर आता जबाबदारी आहे. केएल राहुल आणि रविंद्र जडेजा आता ख्रिजवर आहेत. भारतानं 150 धावा पूर्ण केल्या आहेत.

भारताला चौथा धक्का बसलाय. विराट कोहली 56 धावा करुन आऊट झालाय. पॅट कमिन्सने विराटला बोल्ड केलंय.

विराट कोहलीने आपले ODI 72 वं अर्धशतक पूर्ण केले आहे. त्यानं 56 बॉलमध्ये 50 धावा पूर्ण केल्या आहेत.

भारत विरुद्ध ऑस्ट्रेलिया आयसीसी विश्वचषक 2023 फायनल मॅच दरम्यान अहमदाबादमध्ये सुरक्षेत मोठी चूक झाली आहे. यावेळी एक पॅलेस्टाईन समर्थक प्रेक्षक विराट कोहलीला भेटण्यासाठी मैदानात उतरला होता.

भारताच्या शंभर धावा पूर्ण झाल्या आहेत. सुरुवातीला चांगली फलंदाजी करत असतानाचा मध्यंतरी भारताला तीन धक्के बसले होते. त्यानंतर विराट आणि केएल राहुलने हा डाव सांभाळलाय.

सुरुवातीला फटकेबाजी केल्यानंतर रोहित शर्मा आऊट झाला. त्यानंतर श्रेयसचीही विकेट पडली. आता सध्या विराट कोहली आणि केएल राहुल खेळत आहेत.

प्रथम फलंदाजी करताना भारताच्या १०.२ षटकात ८१-३ धावा झाल्या आहेत. सध्या विराट कोहली आणि केएल राहुल क्रिजवर आहेत.

प्रथम फलंदाजी करताना भारताच्या ९.४ षटकात ७६-२ धावा झाल्या आहेत. सध्या विराट कोहली आणि श्रेयस अय्यर क्रिजवर आहेत.

भारतीय संघाला पहिला धक्का बसला आहे. शुभमन गिल ४ धावात तंबुत परतला आहे. ३० धावावर भारताची पहिली विकेट गेली आहे.

रोहित शर्माने जोश हेजलवूडच्या षटकात चौकार मारले. दोन षटकं संपल्यानंतर भारताची धावसंख्या १३ धावा राहिली. रोहित शर्मा १३ धावांवर तर शुभमन गिल शून्य धावांवर खेळत आहे. त्यानंतर चार षटकात भारतानं ३० धावा केल्या आहेत.

आयसीसी विश्वचषक फायनल सुरू होण्यापूर्वी भारतीय हवाई दलाच्या सूर्यकिरण एरोबॅटिक संघानं नरेंद्र मोदी स्टेडियमवर एअर शो केला.

भाररत आणि ऑस्ट्रेलिया यांच्यातील विश्वचषक फायनलसाठी गायिका आशा भोसले या अहमदाबादला पोहोचल्या आहेत. अभिनेता विवेक ओबेरॉय हादेखील सामना पाहण्यासाठी अहमदाबादमध्ये पोहोचला. विवेक ओबेरॉयनं म्हटलं की, आम्ही आता तयार आहोत. मी व माझा लकी चार्म विश्वचषक सामना पाहणार आहोत. भारत जिंकणार आहे. रोहितनं शतक करावे अशी प्रार्थना आहे.

भारतीय क्रिकेटपटू इशान किशनची आई सुचित्रा सिंग बिहारमध्ये माध्यमांशा बोलताना म्हणाल्या, भारतीय संघ विश्वचषक आणेल, अशी छठी मैयाकडं प्रार्थना आहे. भारतीय संघाकडून खूप अपेक्षा आहेत. आज छठ असून त्याच दिवशी सामना आहे. त्यामुळे आज धमाका होणारच आहे. भारतीय क्रिकेटपटू मोहम्मद सिराजची आई शबाना बेगम हैदराबादमध्ये माध्यमांशी बोलताना म्हणाल्या, टीम इंडियाला शुभेच्छा आहेत.

भारत ऑस्ट्रेलिया संघात थोड्याच वेळात सामना सुरू होणार आहे. ऑस्टेलियानं गोलंदाजी करण्याचा निर्णय घेतला आहे. भारताला फलंदाजी करावी लागणार आहे. दोन्ही संघाच्या खेळाडूमध्ये कोणताच बदल होणार नाही.

भारतीय क्रिकेट संघ ऑस्ट्रेलियाविरुद्धच्या आयसीसी क्रिकेट विश्वचषकाच्या अंतिम सामन्यासाठी अहमदाबादच्या नरेंद्र मोदी स्टेडियमवर पोहोचला आहे. थोड्याच वेळात नाणेफेक होणार आहे. ही नाणेफेक जिंकण्यावरून दोन्ही क्रिकेट संघाची रणनीती ठरणार आहे.

अहमदाबादमधील नरेंद्र मोदी स्टेडियममध्ये मोठ्या संख्येनं क्रिकेटप्रेमी पोहोचले आहेत. थोड्याच वेळापूर्वी भारतीय क्रिकेट संघ ऑस्ट्रेलियाविरुद्धच्या आयसीसी क्रिकेट विश्वचषक अंतिम सामन्यासाठी अहमदाबादच्या नरेंद्र मोदी स्टेडियमकडे रवाना झाला. टीम इंडियाचे समर्थक आणि सचिन तेंडुलकरचे चाहते सुधीर कुमार चौधरी म्हणाले की, टीम इंडिया 2011 च्या विजयाप्रमाणेच आज पुन्हा विजय मिळवेल. रोहित शर्मा आणि शुभमन गिल यांनी शतक पूर्ण करावं. भारतानं ऑस्ट्रेलियाला 450 धावांचे लक्ष्य देऊन फायनल सहज जिंकावी, अशी माझी इच्छा आहे.

भारतीय वेगवान गोलंदाज मोहम्मद शामी हा उत्तर प्रदेशमधील अमरोहा या गावातील रहिवाशी आहे. त्यानं मागील सामन्यात दमदार कामगिरी केली आहे. अमरोहा गावातील मुस्लिम बांधवांनी टीम इंडियाच्या विजयासाठी प्रार्थना केली आहे.

अहमदाबादमधील नरेंद्र मोदी स्टेडियमच्या प्रवेशद्वाराबाहेर क्रिकेटप्रेमींची प्रचंड गर्दी जमली आहे. गर्दीला नियंत्रणाकरिता पोलिसांचा तगडा बंदोबस्त ठेवण्यात आला आहे.

पुण्यातील श्री सिद्धिविनायक मंदिरात भारतीय क्रिकेट संघाच्या विजयासाठी विशेष आरती करण्यात आली आहे.

गुजरात: अहमदाबादमधील नरेंद्र मोदी स्टेडियमबाहेर चाहत्यांनी पहाटेपासूनच गर्दी केली. ऑस्ट्रेलियाविरुद्ध आयसीसी विश्वचषक फायनलमध्ये टीम इंडियानं जिंकण्यासाठी भारतीय क्रिकेटप्रेमींनी जल्लोष केला.

माजी भारतीय क्रिकेटपटू सचिन तेंडुलकर हा अहमदाबादला पोहोचला आहे. माध्यमाशी बोलताना सचिननं अंतिम सामन्याबाबत प्रतिक्रिया दिली. सचिन म्हणाला, मी शुभेच्छा देण्यासाठी येथे आलो आहे. आशा आहे की, आम्ही आज विश्वचषक उचलू. प्रत्येकजण या दिवसाची वाट पाहत आहेत.

भारत आणि ऑस्ट्रेलिया यांच्यातील आयसीसी विश्वचषक फायनलच्या आधी अभिनेत्री उर्वशी रौतेलानं प्रतिक्रिया दिली. ती म्हणाली, मी खूप उत्साहित आहे. भारत विश्वचषक जिंकेल, याची मला खात्री आहे.

स्ट्रेलियाविरुद्धच्या आयसीसी विश्वचषक अंतिम सामन्यात भारताच्या विजयासाठी मध्य प्रदेशमधील उज्जैन महाकाल मंदिरात भस्म आरती करण्यात आली.

काँग्रेसच्या माजी अध्यक्षा सोनिया गांधी यांनी भारतीय क्रिकेट संघाला अंतिम सामन्यासाठी शुभेच्छा दिल्या आहेत. त्यांनी शुभेच्छा संदेशात म्हटले की, प्रिय टीम इंडिया, या विश्वचषक स्पर्धेतील तुमच्या अतुलनीय कामगिरीबद्दल आणि उत्कृष्ट कामगिरीबद्दल मी प्रथम तुमचे अभिनंदन करते. तुम्ही सातत्याने देशाचा सन्मान केला. जगज्जेते होण्यासाठी जे काही लागते ते तुमच्याकडे आहे. मी तुम्हाला माझ्या शुभेच्छा पाठवते.

भारतीय क्रिकेट संघाचा कॅप्टन रोहित शर्माचे बालपणीचे प्रशिक्षक दिनेश लाड म्हणाले की, विश्वचषक सुरू झाल्यापासून आपण विश्वचषक जिंकणार आहोत, असं मी म्हटलेले आहे. आपले सर्व खेळाडू चांगल्या फॉर्ममध्ये आहेत. निश्चितपणे, आपण विश्वचषक जिंकणार आहोत. रोहित शर्मा हा निस्वार्थीपणानं संघासाठी खेळतो. तो पहिल्या दहा षटकांचा सर्वाधिक चांगला उपयोग करण्याचा नेहमी विचार करतो.

मुंबई: आयसीसी पुरुष क्रिकेट विश्वचषक 2023 च्या अंतिम सामन्याबद्दल माजी भारतीय क्रिकेटर डायना एडुलजी यांनी मत व्यक्त केलयं. त्या म्हणाल्या, आमच्यासाठी हा खूप महत्त्वाचा दिवस आहे. 2011 नंतर आपण पुन्हा अंतिम सामन्यात प्रवेश मिळविलाय. भारतीय संघातील ११ खेळाडू फलंदाजी, गोलंदाजी आणि क्षेत्ररक्षणातही चांगली कामगिरी करत आहेत. हे खूप चांगले चिन्ह आहे.

अहमदाबाद- जगातील सर्वात मोठे क्रिकेट स्टेडियम असलेल्या नरेंद्र मोदी स्टेडियमवर आज भारत विरुद्ध ऑस्ट्रेलियाचा अंतिम सामन्यात महामुकाबला होणार आहे. ऑस्ट्रेलियन संघ यापूर्वी पाच वेळा विश्वचषकाचा विजेता ठरला आहे. तर भारताला केवळ दोन वेळा विश्वचषकावर दोन वेळा नाव कोरण्यात यश आलयं. असे असले तरी यंदा विश्वचषकात भारतानं एकही सामना गमावला नाही. तर ऑस्ट्रेलिया दोन सामन्यात पराभूत झाला आहे. घरच्या मैदानावर भारताचं मनोबल आधीच उंचावलयं. जगभरातील क्रिकेटप्रेमींचे आजच्या सामन्याकडं लक्ष लागलेलं आहे.