ಕೋಳಿ ಫಾರಂ ಮಾಲೀಕ ಮೇಲೆ ಹಲ್ಲೆ ಪ್ರಕರಣ: ನಾಲ್ವರು ಆರೋಪಿಗಳ ಬಂಧನ

ನೆಲಮಂಗಲ: ತಾಲೂಕಿನ ಹೆಸರುವಳ್ಳಿ ಗ್ರಾಮದ ಕೋಳಿ ಫಾರಂಗೆ ನುಗ್ಗಿ ಮಾಲೀಕನ ಮೇಲೆ ಮಾರಕಾಸ್ತ್ರಗಳಿಂದ ಹಲ್ಲೆ ಮಾಡಿ ದರೋಡೆ ಮಾಡಿದ್ದ ನಾಲ್ವರು ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ.

ಕೊಡಗು ಜಿಲ್ಲೆಯ ಶಾನಿದ್ ಕೆ.ಯು (29), ಎ.ಹೆಚ್.ಫಿರೋಜ್ (28), ಸಿರಾಜುದ್ದೀನ್ (26) ಹಾಗೂ ಹಾಸನದ ಸೈಯ್ಯದ್ ಬಿಲಾಲ್ (22) ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಅಕ್ಟೋಬರ್ 11ರಂದು ತ್ಯಾಮಗೊಂಡ್ಲು ಬಳಿಯ ಹೆಸರುವಳ್ಳಿ ಗ್ರಾಮದ ಕೋಳಿ ಫಾರಂಗೆ ನುಗ್ಗಿದ ದರೋಡೆಕೋರರು ಮಾಲೀಕ ಹಬೀಬುಲ್ಲಾ ಷರೀಪ್​ಗೆ ಚಾಕುವಿನಿಂದ ಕೈ ಹಾಗೂ ಹೊಟ್ಟೆಗೆ ಇರಿದು, ₹1.32 ಲಕ್ಷ ನಗದನ್ನು ದೋಚಿ ಪರಾರಿಯಾಗಿದ್ದರು.

ಈ ಘಟನೆ ಕುರಿತು ತ್ಯಾಮಗೊಂಡ್ಲು ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ತನಿಖೆ ಕೈಗೊಂಡ ಪೊಲೀಸರು ನಾಲ್ವರು ಆರೋಪಿಗಳನ್ನು ಬಂಧಿಸಿದ್ದಾರೆ. ಬಂಧಿತ ಆರೋಪಿಗಳಿಂದ ₹ 8200 ನಗದು, ಇನೋವಾ ಕಾರು ಹಾಗೂ ಟಾಟಾ ಏಸ್ ವಾಹನ ವಶಕ್ಕೆ ಪಡೆದು ತನಿಖೆ ಮುಂದುವರಿಸಿದ್ದಾರೆ.