ನವದೆಹಲಿ: ಬ್ಯಾಟಿಂಗ್ ಕಿಂಗ್ ವಿರಾಟ್ ಕೊಹ್ಲಿಗೆ ಭಾರತ ಮಾತ್ರವಲ್ಲ, ಸಪ್ತಸಾಗರದಾಚೆಗೂ ಅಭಿಮಾನಿಗಳಿದ್ದಾರೆ. ಕ್ರಿಕೆಟ್ ದೇವರು ಎಂದೇ ಕರೆಯಿಸಿಕೊಳ್ಳುವ ಸಚಿನ್ ತೆಂಡೂಲ್ಕರ್ ಬಳಿಕ ವಿರಾಟ್ ಕೊಹ್ಲಿ ಅತಿ ಹೆಚ್ಚು ಖ್ಯಾತಿಯಲ್ಲಿರುವ ಭಾರತದ ಕ್ರಿಕೆಟಿಗ.
ಕೋಟ್ಯಂತರ ಜನರ ಆರಾಧಕರಾಗಿರುವ ವಿರಾಟ್ ವೃತ್ತಿ ಜೀವನದ ಉತ್ತುಂಗದಲ್ಲಿದ್ದಾರೆ. ನಡೆಯುತ್ತಿರುವ ಐಪಿಎಲ್ನಲ್ಲೂ ಅತ್ಯಧಿಕ ರನ್ ಗಳಿಸಿದ ಆಟಗಾರ ಕೂಡ ಹೌದು. ರಾಶಿ ರಾಶಿ ರನ್ ಕಲೆ ಹಾಕಿರುವ ಟೀಂ ಇಂಡಿಯಾದ ರನ್ ಮಶಿನ್ರ ಚಿತ್ರವನ್ನು ಅಭಿಮಾನಿಯೊಬ್ಬ ಈರುಳ್ಳಿ ಮತ್ತು ಬೆಳ್ಳುಳ್ಳಿ ಒಡಮೂಡುವಂತೆ ಮಾಡಿದ್ದಾನೆ.
ಅಭಿಮಾನಿಯ ಕಸರತ್ತು: ಅಪ್ರತಿಮ ಕ್ರಿಕೆಟಿಗನ ಅಭಿಮಾನಿಯೊಬ್ಬ ಖಾಲಿ ಜಾಗದಲ್ಲಿ ಮೊದಲು ವಿರಾಟ್ರ ಚಿತ್ರ ಮೂಡುವಂತೆ ರೇಖೆಗಳನ್ನು ಗೀಚಿದ್ದಾನೆ. ಬಳಿಕ ರೇಖೆಗಳುದ್ದಕ್ಕೂ ಬೆಳ್ಳುಳ್ಳಿ, ಈರುಳ್ಳಿಯನ್ನು ಜೋಡಿಸಿದ್ದಾನೆ. ಇದು ಥೇಟ್ ವಿರಾಟ್ರಂತೆ ಕಾಣುವಂತೆ ಮಾಡಿದ್ದಾನೆ.
ಇದು ನೋಡುಗರನ್ನು ಬೆರಗಾಗುವಂತೆ ಮಾಡಿದೆ. ಈರುಳ್ಳಿ ಮತ್ತು ಬೆಳ್ಳುಳ್ಳಿಯನ್ನು ಜೋಡಿಸಿದ ಬಳಿಕ ದೂರದಿಂದ ಅದನ್ನು ನೋಡಿದಾಗ ಕೊಹ್ಲಿಯ ಚಿತ್ರವೇ ಅಲ್ಲಿ ಕಾಣುತ್ತದೆ. ಇದರ ವಿಡಿಯೋ ಮತ್ತು ಫೋಟೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳಲಾಗಿದ್ದು, ಭಾರೀ ವೈರಲ್ ಆಗುತ್ತಿದೆ.
ಈ ಚಿತ್ರವನ್ನ ಬಿಡಿಸಿದ ಅಭಿಮಾನಿಯ ಬಗ್ಗೆ ಮಾಹಿತಿ ಸಿಕ್ಕಿಲ್ಲವಾದರೂ, ತನುಜ್ ಸಿಂಗ್ ಎಂಬ ಬಳಕೆದಾರರೊಬ್ಬರು ವಿಡಿಯೋವನ್ನು ಹಂಚಿಕೊಂಡಿದ್ದಾರೆ. ವಿರಾಟ್ ಕೊಹ್ಲಿಯ ಅಪ್ಪಟ ಅಭಿಮಾನಿಯೊಬ್ಬ ಈರುಳ್ಳಿ ಮತ್ತು ಬೆಳ್ಳುಳ್ಳಿಯಲ್ಲಿ ಚಿತ್ರ ಬಿಡಿಸಿದ್ದಾನೆ. ವಿರಾಟ್ ಕೊಹ್ಲಿ ಎಂದರೆ ಭಾವನಾತ್ಮಕ ಸಂಬಂಧ ಎಂದು ಬರೆದುಕೊಂಡಿದ್ದಾನೆ.
ಆರ್ಸಿಬಿ ಪ್ಲೇಆಫ್ಗೇರಿಸ್ತಾರಾ ವಿರಾಟ್: ಪ್ರಸ್ತುತ ಐಪಿಎಲ್ನಲ್ಲಿ ಆರ್ಸಿಬಿ ತಂಡ 12 ಪಾಯಿಂಟ್ಸ್ಗಳೊಂದಿಗೆ ಅಂಕಪಟ್ಟಿಯಲ್ಲಿ 6ನೇ ಸ್ಥಾನದಲ್ಲಿದೆ. ಪ್ಲೇಆಫ್ಗೆ ತಲುಪಲು ಕೊನೆಯ ಲೀಗ್ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡವನ್ನು 18 ಕ್ಕಿಂತ ಹೆಚ್ಚು ರನ್ ಅಥವಾ 18 ಓವರ್ ಒಳಗೆ ಗುರಿ ಮುಟ್ಟಬೇಕು. ಆಗ ಸಿಎಸ್ಕೆಗಿಂತ ಹೆಚ್ಚಿನ ರನ್ರೇಟ್ ಆಧಾರದಲ್ಲಿ ನಾಲ್ಕನೇ ಸ್ಥಾನಿಯಾಗಿ ಟಾಪ್ ನಾಲ್ಕರಲ್ಲಿ ಸ್ಥಾನ ಪಡೆಯಲಿದೆ. ಇಲ್ಲವಾದಲ್ಲಿ ಟೂರ್ನಿಯಿಂದ ಅಧಿಕೃತವಾಗಿ ಹೊರಬೀಳಲಿದೆ.
ಕೋಲ್ಕತ್ತಾ ನೈಟ್ ರೈಡರ್ಸ್, ರಾಜಸ್ಥಾನ ರಾಯಲ್ಸ್ ಅಧಿಕೃತವಾಗಿ ಪ್ಲೇಆಫ್ಗೇರಿವೆ. ಸನ್ರೈಸರ್ಸ್ ಹೈದರಾಬಾದ್ ಮೂರನೇ ಸ್ಥಾನ ಪಡೆಯಲಿದೆ. ಕೊನೆಯ ಸ್ಥಾನಕ್ಕಾಗಿ ಸಿಎಸ್ಕೆ ಮತ್ತು ಆರ್ಸಿಬಿ ಮಧ್ಯೆ ಪೈಪೋಟಿ ಇದೆ. ಮೇ 18 ರಂದು ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಮಹತ್ವದ ಪಂದ್ಯ ನಡೆಯಲಿದೆ.
ಇದನ್ನೂ ಓದಿ; "ನಿವೃತ್ತಿ ಬಳಿಕ ನಿಮಗೆ ಕಾಣಿಸಲ್ಲ": ಅಭಿಮಾನಿಗಳಲ್ಲಿ ದುಗುಡ ಹುಟ್ಟಿಸಿದ ಟೀಂ ಇಂಡಿಯಾ ಆಟಗಾರನ ಹೇಳಿಕೆ - VIRAT KOHLI
