ನವದೆಹಲಿ : ಮಹಿಳಾ ಹಾಕಿ ತಂಡದ ನಾಯಕಿ ರಾಣಿ ರಾಂಪಾಲ್ ಮತ್ತು ಗೋಲ್ ಕೀಪರ್ ಸವಿತ ಪೂನಿಯಾ ಹಾಗೂ ಪ್ಯಾರಾಲಿಂಪಿಕ್ಸ್ ಪದಕ ವಿಜೇತರಾದ ಮರಿಯಪ್ಪನ್ ತಂಗವೇಲು ಮತ್ತು ಶರದ್ ಕುಮಾರ್ ಅವರು ಟೋಕಿಯೋ ಒಲಿಂಪಿಕ್ಸ್ನಲ್ಲಿ ಅದ್ಭುತ ಪ್ರದರ್ಶನ ತೋರಿದ್ದಕ್ಕಾಗಿ ಭಾರತೀಯ ಕ್ರೀಡಾ ಪ್ರಾಧಿಕಾರ ಪ್ರಮೋಷನ್ ನೀಡಿದೆ.
ಇವರ ಜೊತೆಗೆ ಟೋಕಿಯೋದಲ್ಲಿ ಕಂಚಿನ ಪದಕ ಗೆದ್ದ ಹಾಕಿ ತಂಡದ ಕೋಚ್ ಪಿಯೂಷ್ ದುಬೆ ಅವರಿಗೂ ಪ್ರಮೋಷನ್ ನೀಡುವುದಾಗಿ 55ನೇ SAI ಸಭೆಯಲ್ಲಿ ನಿರ್ಧರಿಸಲಾಗಿದೆ. ಸವಿತಾ ಪೂನಿಯಾ ಸಹಾಯಕ ಕೋಚ್ ಸ್ಥಾನದಿಂದ ಕೋಚ್ ಸ್ಥಾನಕ್ಕೆ, ರಾಣಿ ರಾಂಪಾಲ್ ಮತ್ತು ದುಬೆ ಸೀನಿಯರ್ ಕೋಚ್ ಸ್ಥಾನಕ್ಕೆ ಬಡ್ತಿ ನೀಡಲಾಗಿದೆ. ರಾಣಿ ಮತ್ತು ಸವಿತ ಟೋಕಿಯೋ ಒಲಿಂಪಿಕ್ಸ್ನಲ್ಲಿ 4ನೇ ಸ್ಥಾನ ಪಡೆದ ಮಹಿಳಾ ಹಾಕಿ ತಂಡದ ಸದಸ್ಯರಾಗಿದ್ದರು.
ಸತತ 2ನೇ ಒಲಿಂಪಿಕ್ಸ್ನಲ್ಲಿ ಪದಕ ಗೆದ್ದ ಪ್ಯಾರಾ ಹೈಜಂಪರ್ ಮರಿಯಪ್ಪನ್ ಅವರನ್ನು ಸೀನಿಯರ್ ಕೋಚ್ ಸ್ಥಾನದಿಂದ ಚೀಫ್ ಕೋಚ್ ಸ್ಥಾನಕ್ಕೆ ಬಡ್ತಿ ನೀಡಲಾಗಿದೆ. ಕಂಚು ಗೆದ್ದಿದ್ದ ಶರದ್ ಕುಮಾರ್ ಅವರನ್ನು ಕೋಚ್ ಹುದ್ದೆಗೆ ಬಡ್ತಿ ನೀಡಲಾಗಿದೆ.
ಇನ್ನು, ತಮ್ಮ 42ನೇ ವಯಸ್ಸಿಗೆ ಲಿವರ್ ಕ್ಯಾನ್ಸರ್ನಿಂದ ಮೃತಪಟ್ಟ ಮಾಜಿ ಕಾಮನ್ವೆಲ್ತ್ ಚಿನ್ನದ ಪದಕ ವಿಜೇತ ಮತ್ತು ಅರ್ಜುನ ಅವಾರ್ಡ್ ಪುರಸ್ಕೃತ ಡಿಂಕೊ ಸಿಂಗ್ ಅವರ ಕುಟುಂಬಕ್ಕೆ 6.87 ಲಕ್ಷ ರೂ.ಗಳನ್ನು ಗೌರವಾರ್ಥವಾಗಿ ನೀಡುವುದಕ್ಕೆ ಸಭೆಯಲ್ಲಿ ನಿರ್ಧರಿಸಲಾಗಿದೆ.
ಇದನ್ನು ಓದಿ:ಪ್ಯಾರಾಲಿಂಪಿಕ್ಸ್ ಕಂಚು ವಿಜೇತ ಶರದ್ಗೆ ಹೃದಯ ಸಂಬಂಧಿ ಸಮಸ್ಯೆ, AIIMSನಲ್ಲಿ ತಪಾಸಣೆ
