ಆಂಟ್ವೆರ್ಪ್ (ಬೆಲ್ಜಿಯಂ): ಭಾರತೀಯ ಪುರುಷರ ಹಾಕಿ ತಂಡವು ಶುಕ್ರವಾರ ಎಫ್‌ಐಎಚ್ ಹಾಕಿ ಪ್ರೊ ಲೀಗ್ 2023-24 ರ ಯುರೋಪಿಯನ್ ಹಂತದ ತನ್ನ ಎರಡನೇ ಪಂದ್ಯದಲ್ಲಿ ಬೆಲ್ಜಿಯಂ ವಿರುದ್ಧ 1-4 ಗೋಲುಗಳಿಂದ ಸೋತಿದೆ. ಭಾರತದ ಪರ ಅಭಿಷೇಕ್ (55') ಏಕೈಕ ಗೋಲು ದಾಖಲಿಸಿದರೆ, ಬೆಲ್ಜಿಯಂ ಪರ ಫೆಲಿಕ್ಸ್ ಡೆನಾಯರ್ (22'), ಅಲೆಕ್ಸಾಂಡರ್ ಹೆಂಡ್ರಿಕ್ಸ್ (34', 60') ಮತ್ತು ಸೆಡ್ರಿಕ್ ಚಾರ್ಲಿಯರ್ (49') ಅದ್ಭುತ ಗೋಲು ಗಳಿಸಿ ಮಿಂಚಿದರು.
ಪಂದ್ಯದ ಆರಂಭದಿಂದಲೇ ಬೆಲ್ಜಿಯಂ ಉತ್ತಮ ಪ್ರದರ್ಶನ ನೀಡುತ್ತಲೇ ಸಾಗುತ್ತಿತ್ತು. ಇದರಿಂದ ಭಾರತ ತಂಡಕ್ಕೆ ಹೆಚ್ಚು ಅಪಾಯಕಾರಿ ಎನಿಸಿತು. ಆದರೂ ಅವರು ಬಲವಾದ ಭಾರತೀಯ ರಕ್ಷಣಾತ್ಮಕ ಘಟಕವನ್ನು ಎದುರಿಸಿದರು, ಅದು ಒತ್ತಡದಲ್ಲಿ ಉತ್ತಮವಾಗಿ ಕಾರ್ಯನಿರ್ವಹಿಸಿತು. ಮೊದಲ ಕ್ವಾರ್ಟರ್‌ನ ಸಮಯದ ನಂತರ ಭಾರತ ತಂಡವು ಕೆಲವು ದಾಳಿಗಳನ್ನು ಪ್ರಾರಂಭಿಸಿತು. ಬಳಿಕ ಎರಡೂ ತಂಡಗಳು ಗೋಲು ಗಳಿಸಲು ಸಾಧ್ಯವಾಗಲಿಲ್ಲ ಮತ್ತು ಮೊದಲ ಕ್ವಾರ್ಟರ್ 0-0 ಕೊನೆಗೊಂಡಿತು.
ಇದಾದ ಬಳಿಕ ಎರಡನೇ ಕ್ವಾರ್ಟರ್‌ಗೆ ಉಭಯ ತಂಡಗಳು ಶುಭಾರಂಭ ಮಾಡಿದವು. ಕ್ವಾರ್ಟರ್‌ನ ಮೊದಲ 3 ನಿಮಿಷಗಳಲ್ಲಿ ಭಾರತಕ್ಕೆ ಪೆನಾಲ್ಟಿ ಕಾರ್ನರ್ ಸಿಕ್ಕಿತು. ಆದರೆ ಹರ್ಮನ್‌ಪ್ರೀತ್ ಅವರ ಹೊಡೆತವನ್ನು ಬೆಲ್ಜಿಯಂ ಗೋಲ್‌ಕೀಪರ್ ಸಖತ್ ಆಗಿ ಕ್ಯಾಚ್ ಮಾಡಿದರು. ಇದರಿಂದ ಭಾರತಕ್ಕೆ ಗೋಲು ಗಳಿಸಲು ಸಾಧ್ಯವಾಗಲಿಲ್ಲ. ಆದರೂ 8 ನಿಮಿಷಗಳು ಬಾಕಿ ಇರುವಾಗ, ಫೆಲಿಕ್ಸ್ ಡೆನಾಯರ್ (22') ಅವರು ಗೋಲ್ ಬಾರಿಸಿ ಬೆಲ್ಜಿಯಂಗೆ 1–0 ಮುನ್ನಡೆ ತಂದುಕೊಟ್ಟರು. ಪದೇ ಪದೇ ದಾಳಿ ನಡೆಸಿದರೂ ಪಂದ್ಯದ ಅರ್ಧದ ಆಟದಲ್ಲಿ ಭಾರತಕ್ಕೆ ಸಮಬಲ ಸಾಧಿಸಲು ಸಾಧ್ಯವಾಗಲಿಲ್ಲ.
ಅರ್ಧ ಸಮಯದ ನಂತರ ಭಾರತ ಆಕ್ರಮಣಕಾರಿ ಆಟ ಆರಂಭಿಸಿತು. ಆದರೆ ಬೆಲ್ಜಿಯಂನ ಬಲಿಷ್ಠ ರಕ್ಷಣಾ ಕೋಟೆಯಲ್ಲಿ ತನ್ನ ಹಿಡಿತವನ್ನು ಉಳಿಸಿಕೊಂಡಿತು. ಮೂರನೇ ಕ್ವಾರ್ಟರ್ನಲ್ಲಿ ಎರಡೂ ತುದಿಗಳಲ್ಲಿ ಸಾಕಷ್ಟು ಕ್ರಮಗಳು ಕಂಡು ಬಂದವು. ಬೆಲ್ಜಿಯಂನ ಅಲೆಕ್ಸಾಂಡರ್ ಹೆಂಡ್ರಿಕ್ಸ್ (34') ಪೆನಾಲ್ಟಿ ಕಾರ್ನರ್ ಅನ್ನು ಯಶಸ್ವಿಯಾಗಿ ಪರಿವರ್ತಿಸುವ ಮೂಲಕ ತಮ್ಮ ತಂಡದ ಮುನ್ನಡೆಯನ್ನು ದ್ವಿಗುಣಗೊಳಿಸಿದರು. ಇದರೊಂದಿಗೆ ಮೂರನೇ ಕ್ವಾರ್ಟರ್ ಅಂತ್ಯದ ವೇಳೆಗೆ ಬೆಲ್ಜಿಯಂ ಭಾರತದ ವಿರುದ್ಧ 2-0 ಮುನ್ನಡೆ ಸಾಧಿಸಿತು.
ಕೊನೆಯ ಕ್ವಾರ್ಟರ್ನಲ್ಲಿ ಭಾರತ ತಂಡವು ಆವೇಗವನ್ನು ತೋರಿಸಲು ಪ್ರಾರಂಭಿಸಿತು. ಆದರೆ ಸೆಡ್ರಿಕ್ ಚಾರ್ಲಿಯರ್ (49') ಅವರ ಅದ್ಭುತ ಫೀಲ್ಡ್ ಗೋಲ್‌ನೊಂದಿಗೆ ಬೆಲ್ಜಿಯಂ ತನ್ನ ಮುನ್ನಡೆಯನ್ನು 3-0 ಗೆ ಹೆಚ್ಚಿಸಿತು. ನಂತರ ಆಟ ಮುಗಿಯಲು 5 ನಿಮಿಷ ಬಾಕಿ ಇರುವಾಗ ಅಭಿಷೇಕ್ (55’) ಗೋಲು ಗಳಿಸಿದರು. ಪಂದ್ಯದ ಕೊನೆಯಲ್ಲಿ, ಬೆಲ್ಜಿಯಂ ಪೆನಾಲ್ಟಿ ಸ್ಟ್ರೋಕ್ ಅನ್ನು ಅಲೆಕ್ಸಾಂಡರ್ ಹೆಂಡ್ರಿಕ್ಸ್ (60') ಯಶಸ್ವಿಯಾಗಿ ಪರಿವರ್ತಿಸಿದರು ಮತ್ತು ಬೆಲ್ಜಿಯಂನ 4-1 ಗೆಲುವನ್ನು ಖಚಿತಪಡಿಸಿದರು.
ಈ ಪಂದ್ಯದಲ್ಲಿ ಭಾರತದ ಜರ್ಮನ್‌ಪ್ರೀತ್ ಸಿಂಗ್ 100 ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಪೂರ್ಣಗೊಳಿಸಿದರು. ಭಾರತೀಯ ಪುರುಷರ ಹಾಕಿ ತಂಡವು ಮೇ 25 ರಂದು ಭಾರತೀಯ ಕಾಲಮಾನ ರಾತ್ರಿ 7:45 ಕ್ಕೆ ಮತ್ತೊಮ್ಮೆ ಬೆಲ್ಜಿಯಂ ಅನ್ನು ಎದುರಿಸಲಿದೆ.
ಓದಿ: ಇಂದು IPL ಕ್ವಾಲಿಫೈಯರ್‌ 2: ಹೈದರಾಬಾದ್ vs ರಾಜಸ್ಥಾನ್ ಫೈಟ್; ಯಾರಿಗೆ ಫೈನಲ್‌ ಟಿಕೆಟ್? - IPL Qualifier 2
