ಹೈದರಾಬಾದ್: ಕನ್ನಡದಲ್ಲಿ ಏಳನೇ ಆವೃತ್ತಿಯ ಬಿಗ್ಬಾಸ್ ಕಾರ್ಯಕ್ರಮ ಒಂದು ತಿಂಗಳು ಪೂರೈಸಿದ್ದರೆ ಅತ್ತ ಹಿಂದಿಯಲ್ಲಿ 13ನೇ ಆವೃತ್ತಿಯ ಬಿಗ್ಬಾಸ್ 9 ವಾರ ಕಂಪ್ಲೀಟ್ ಮಾಡಿದೆ. ಇದೇ ವೇಳೆ, ಹಿಂದಿ ಬಿಗ್ಬಾಸ್ ಅಡ್ಡದಿಂದ ಹೊಸ ಸುದ್ದಿ ಹೊರಬಿದ್ದಿದೆ.
ಬಿಗ್ಬಾಸ್ ನೂರು ದಿನದ ಕಾರ್ಯಕ್ರಮವಾಗಿದ್ದು, ಕನ್ನಡದಲ್ಲಿ ಒಂದು ಆವೃತ್ತಿ ಮಾತ್ರ 120 ದಿನಗಳ ಕಾಲ ನಡೆದಿತ್ತು. ಪ್ರಸ್ತುತ ಹಿಂದಿ ಬಿಗ್ಬಾಸ್ ಸಹ ಇದೇ ದಾರಿಯನ್ನು ಅನುಸರಿಸಲು ಮುಂದಾಗಿದೆ. ಲಭ್ಯ ಮಾಹಿತಿ ಪ್ರಕಾರ ಹಿಂದಿ ಬಿಗ್ಬಾಸ್ ಐದು ವಾರಗಳ ಕಾಲ ವಿಸ್ತರಣೆ ಮಾಡಲು ನಿರ್ಧರಿಸಲಾಗಿದೆ.
ಹಿಂದಿ ಬಿಗ್ಬಾಸ್ ಐದು ವಾರಗಳ ಕಾಲ ವಿಸ್ತರಣೆಯಾದಲ್ಲಿ ಗ್ರ್ಯಾಂಡ್ ಫಿನಾಲೆ ಮುಂದಿನ ಫೆಬ್ರವರಿಯಲ್ಲಿ ನಡೆಯಲಿದೆ. ಈ ಕಾರ್ಯಕ್ರಮದ ನಿರ್ವಹಣೆ ಜವಾಬ್ದಾರಿಯನ್ನು ಸಲ್ಮಾನ್ ಖಾನ್ ವಹಿಸಿದ್ದು, ಐದು ವಾರದ ವಿಸ್ತರಣೆಯಲ್ಲೂ ಅವರನ್ನೇ ಉಳಿಸಿಕೊಳ್ಳಲು ಚಾನೆಲ್ ಭಾರಿ ಸಂಭಾವನೆ ನೀಡಲು ಮುಂದಾಗಿದೆ.
'ದಬಾಂಗ್ 3' ಪ್ರಚಾರ ಹಾಗೂ 'ರಾಧೆ: ಯುವರ್ ಮೋಸ್ಟ್ ವಾಂಟೆಡ್ ಭಾಯ್' ಚಿತ್ರೀಕರಣಕ್ಕೆ ಬಿಗ್ಬಾಸ್ ಅವಧಿ ವಿಸ್ತರಣೆ ಅಡ್ಡಿಯಾಗಲಿದ್ದು, ಈ ಹಿನ್ನೆಲೆಯಲ್ಲಿ ಬಿಗ್ ಆಫರ್ ನೀಡಿದೆ. ಪ್ರಸ್ತುತ ಒಂದು ಸಂಚಿಕೆಗೆ ಸಲ್ಲುಮಿಯಾ ₹6.5 ಕೋಟಿ ಪಡೆಯುತ್ತಿದ್ದು, ವಿಸ್ತರಣೆಯಾದ ವಾರದಲ್ಲಿ ₹8.5 ಕೋಟಿ ಜೇಬಿಗಿಳಿಸಲಿದ್ದಾರೆ ಎಂದು ತಿಳಿದು ಬಂದಿದೆ.
ಕಳೆದ ಕೆಲ ಬಿಗ್ಬಾಸ್ ಆವೃತ್ತಿಗೆ ನಿರೀಕ್ಷಿತ ಪ್ರಮಾಣದಲ್ಲಿ ಟಿಆರ್ಪಿಯಲ್ಲಿ ಬಂದಿರಲಿಲ್ಲ. ಆದರೆ ಈ ಬಾರಿಯ ಸೀಸನ್ ಭಾರಿ ಪ್ರಮಾಣದಲ್ಲಿ ವೀಕ್ಷಕರನ್ನು ಸೆಳೆಯುತ್ತಿದ್ದು, ಇದನ್ನೇ ಬಂಡವಾಳವಾಗಿಸಿಕೊಂಡು ಅವಧಿ ವಿಸ್ತರಣೆಗೆ ಚಾನೆಲ್ ಮುಂದಾಗಿದೆ ಎಂಬ ಮಾಹಿತಿ ಲಭ್ಯವಾಗಿದೆ.
