ನವದೆಹಲಿ: ಅದಾನಿ-ಹಿಂಡನ್ಬರ್ಗ್ ಪ್ರಕರಣದಲ್ಲಿ ಅಚ್ಚರಿಯ ಸಂಗತಿಯೊಂದು ಬೆಳಕಿಗೆ ಬಂದಿದೆ. ಮಾರುಕಟ್ಟೆ ನಿಯಂತ್ರಕವಾದ ಸೆಬಿ ಕೇಸ್ನ ಪ್ರಮುಖ ಅಂಶಗಳನ್ನು ಬಚ್ಚಿಟ್ಟಿದೆ. ಆದಾಯ ಗುಪ್ತಚರ ನಿರ್ದೇಶನಾಲಯದ (ಡಿಆರ್‌ಐ) ತನಿಖೆಯ ಸಾರಾಂಶವನ್ನು ಕೋರ್ಟ್ ಗಮನಕ್ಕೆ ತಂದಿಲ್ಲ ಎಂಬ ಆರೋಪ ಕೇಳಿಬಂದಿದೆ.
ಈ ಬಗ್ಗೆ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯೊಂದು ಸಲ್ಲಿಕೆಯಾಗಿದ್ದು, ಅದರಲ್ಲಿ ಈ ಆರೋಪ ಮಾಡಲಾಗಿದೆ. ಅದಾನಿ ಸಮೂಹ ದುಬೈ ಮತ್ತು ಮಾರಿಷಸ್ ಮೂಲದ ಘಟಕಗಳ ಮೂಲಕ ಅದಾನಿ ಕಂಪನಿಗಳಲ್ಲಿ ಹೂಡಿಕೆ ಮಾಡಿರುವ ಬಗ್ಗೆ ಜನವರಿ 2014 ರ ಡಿಆರ್‌ಐ ಎಚ್ಚರಿಕೆಯನ್ನು ಸೆಬಿ ಮರೆಮಾಚಿದೆ ಎಂದು ದೂರಲಾಗಿದೆ. 2014 ರಲ್ಲಿ ಯುಎಇ ಮೂಲದ ಅಂಗಸಂಸ್ಥೆಯಿಂದ ಅದಾನಿ ಗ್ರೂಪ್‌ನ ಸಂಸ್ಥೆಗಳು ಉಪಕರಣ ಮತ್ತು ಯಂತ್ರೋಪಕರಣಗಳ ಆಮದಿನಲ್ಲಿ ನಡೆಸಿದ ಅವ್ಯವಹಾರ ಪ್ರಕರಣವನ್ನು ಡಿಆರ್‌ಐ ತನಿಖೆ ನಡೆಸುತ್ತಿದೆ. ಈ ಸಂಬಂಧ ಡಿಆರ್‌ಐ ಮೇ 15, 2014 ರಂದು ಶೋಕಾಸ್ ನೋಟಿಸ್ ಸಹ ನೀಡಿದೆ ಎಂದು ಅಫಿಡವಿಟ್‌ನಲ್ಲಿ ಹೇಳಲಾಗಿದೆ.
ಸೆಬಿ ಈ ಮಹತ್ವದ ಮಾಹಿತಿಯನ್ನು ನ್ಯಾಯಾಲಯದಿಂದ ಮರೆಮಾಚಿರುವುದು ಮತ್ತು ಡಿಆರ್‌ಐ ನೀಡಿದ ನೋಟಿಸ್ ಬಗ್ಗೆಯೂ ಯಾವುದೇ ತನಿಖೆ ನಡೆಸದಿರುವುದು ಆಘಾತಕಾರಿಯಾಗಿದೆ ಎಂದು ಪಿಐಎಲ್ ಹೇಳಿದೆ. ಅದಾನಿ ಗ್ರೂಪ್ನಿಂದ 2,323 ಕೋಟಿ ರೂ.ಗಳ ವಂಚನೆ ಆರೋಪ ಇರುವ ಸಿಡಿ ಮತ್ತು ಡಿಆರ್‌ಐ ತನಿಖೆ ನಡೆಸುತ್ತಿರುವ ಪ್ರಕರಣದ ಕುರಿತು ಎರಡು ಟಿಪ್ಪಣಿಗಳನ್ನು ಒಳಗೊಂಡಿದೆ. ಡಿಆರ್‌ಐನ ಮುಂಬೈ ವಲಯ ಘಟಕದಿಂದ ಹೆಚ್ಚಿನ ದಾಖಲೆಗಳನ್ನು ಪಡೆಯಬಹುದು ಎಂದು ಅದು ಹೇಳಿದೆ.
ಡಿಆರ್‌ಐನ ನೋಟಿಸ್ನಲ್ಲಿನ ಸತ್ಯವನ್ನು ಸೆಬಿಯು ರಹಸ್ಯವಾಗಿಟ್ಟಿದೆ. ಅಲ್ಲದೇ ಕೋರ್ಟ್ಗೆ ಸುಳ್ಳು ಮಾಹಿತಿಯನ್ನು ಒದಗಿಸಿದೆ. ಅಂದಿನ ಸೆಬಿ ಅಧ್ಯಕ್ಷರಾದ ಯು.ಕೆ. ಸಿನ್ಹಾ ಅವರು ಡಿಆರ್‌ಐ ನೋಟಿಸ್ ಮೇಲೆ ಕಾರ್ಯನಿರ್ವಹಿಸುವ ಬದಲು ಅದಾನಿ ಗುಂಪಿನ ಬಗ್ಗೆ ನಡೆಯುತ್ತಿರುವ ತನಿಖೆಗಳನ್ನು ಮುಚ್ಚಿ ಹಾಕಲಾಗಿದೆ ಎಂದು ಹೇಳಳಾಗಿದೆ.
SEBI ಯ 13 ಶಂಕಿತ ವಿದೇಶಿ ಬಂಡವಾಳ ಹೂಡಿಕೆಗಳು/ಸಾಗರೋತ್ತರ ಘಟಕಗಳ ಪಟ್ಟಿಯಲ್ಲಿ ಮಾರಿಷಸ್ ಮತ್ತು ದುಬೈ ಕಂಪನಿಗಳ ಹೆಸರುಗಳಿವೆ. ಆದರೆ, ಸೆಬಿ ಅದರ ಮಾಲೀಕರು ಅಥವಾ ಷೇರುದಾರರನ್ನು ಪತ್ತೆಹಚ್ಚಲು ಸಾಧ್ಯವಾಗಿಲ್ಲ ಎಂದು ಆರೋಪಿಸಲಾಗಿದೆ.
ಅದಾನಿ-ಹಿಂಡೆನ್‌ಬರ್ಗ್ ಪ್ರಕರಣದಲ್ಲಿ ಸೆಬಿ ನಡೆಸಿದ 24 ತನಿಖೆಗಳಲ್ಲಿ 22 ಅಂತಿಮ ಹಂತಕ್ಕೆ ಬಂದಿವೆ. ಇನ್ನೆರಡು ತನಿಖೆ ಹಂತದಲ್ಲಿವೆ ಎಂದು ಸುಪ್ರೀಂ ಕೋರ್ಟ್ಗೆ ವರದಿ ನೀಡಲಾಗಿದೆ. ತನಿಖೆಯಲ್ಲಿರುವ ಕೇಸ್ ಅದಾನಿ ಕಂಪನಿಗಳ 13 ಸಾಗರೋತ್ತರ ಸಂಸ್ಥೆಗಳನ್ನು ಒಳಗೊಂಡಿವೆ.
ಇದನ್ನೂ ಓದಿ: ಖೋಟಾನೋಟು ಸಾಗಣೆ: ಮಹಿಳೆಗೆ ಅಪರಾಧಿ ಎಂದು ಘೋಷಿಸಿ ನಾಳೆಗೆ ಶಿಕ್ಷೆ ಪ್ರಮಾಣ ಪ್ರಕಟಿಸಲಿಸಿರುವ ಎನ್ಐಎ ಕೋರ್ಟ್
