ಹೈದರಾಬಾದ್: ಹೆಲಿಕಾಪ್ಟರ್ ಆಗಲಿ, ವಿಮಾನವಾಗಲಿ ಪತನವಾದಾಗ ಮೊದಲು ಹುಡುಕುವುದು ಬ್ಲ್ಯಾಕ್ ಬಾಕ್ಸ್ (ಕಪ್ಪು ಪೆಟ್ಟಿಗೆ) ಯನ್ನು. ಪತನದ ತನಿಖೆಗೆ ಇದನ್ನು ಹುಡುಕುವುದು ಅತ್ಯವಶ್ಯವಾಗಿದೆ. ಏಕೆಂದರೆ ದುರಂತಕ್ಕೂ ಮುನ್ನ ಪೈಲಟ್ ಹಾಗೂ ಕಂಟ್ರೋಲ್ ರೂಂ ಸಿಬ್ಬಂದಿ ನಡುವೆ ನಡೆದ ಸಂಭಾಷಣೆಯನ್ನು ಬ್ಲ್ಯಾಕ್ ಬಾಕ್ಸ್ ಮೂಲಕವೇ ಟ್ರೇಸ್ ಮಾಡಬಹುದಾಗಿದೆ.
ಫ್ಲೈಟ್ ಡಾಟಾ ರೆಕಾರ್ಡರ್:
ಪ್ರತಿಯೊಂದು ಹೆಲಿಕಾಪ್ಟರ್ ಮತ್ತು ವಿಮಾನಗಳಲ್ಲಿ ಬ್ಲ್ಯಾಕ್ ಬಾಕ್ಸ್ ಇರುತ್ತದೆ. ಈ ಕಪ್ಪು ಪೆಟ್ಟಿಗೆಯಲ್ಲಿ 'ಫ್ಲೈಟ್ ಡಾಟಾ ರೆಕಾರ್ಡರ್' ಹಾಗೂ 'ಡಿಜಿಟಲ್ ಕಾಕ್ಪಿಟ್ ವಾಯ್ಸ್ ರೆಕಾರ್ಡರ್' ಎಂಬ ಎರಡು ಸಾಧನಗಳಿರುತ್ತದೆ. ಫ್ಲೈಟ್ ಡಾಟಾ ರೆಕಾರ್ಡರ್ - ಇದು ವಿಮಾನದ ಮಾರ್ಗ, ವೇಗೋತ್ಕರ್ಷ, ಇಂಜಿನ್ನ ತಾಪಮಾನ, ಗಾಳಿಯ ವೇಗ, ವಿಮಾನವಿದ್ದ ಎತ್ತರ ಸೇರಿದಂತೆ ವಿಮಾನದ ಕುರಿತ ಇತರ ಡೇಟಾಗಳನ್ನು ನೀಡುತ್ತದೆ.
ಡಿಜಿಟಲ್ ಕಾಕ್ಪಿಟ್ ವಾಯ್ಸ್ ರೆಕಾರ್ಡರ್ ಕೆಲಸ ಏನು?
ಡಿಜಿಟಲ್ ಕಾಕ್ಪಿಟ್ ವಾಯ್ಸ್ ರೆಕಾರ್ಡರ್- ಇದು ಕಾಕ್ಪಿಟ್ (ಪೈಲಟ್ ಕುಳಿತಿರುವ ಸ್ಥಳ)ನೊಳಗೆ ನಡೆಸಿದ ಎಲ್ಲ ಸಂಭಾಷಣೆಗಳನ್ನೂ ದಾಖಲಿಸುತ್ತದೆ. ಅವಘಡ ನಡೆಯುವ ಸಂದರ್ಭ ಹಾಗೂ ಅದಕ್ಕೂ ಮೊದಲು ಪೈಲಟ್‌ಗಳು ಮಾತನಾಡಿರುವುದು ಇದರಲ್ಲಿ ರೆಕಾರ್ಡ್ ಆಗಿರುತ್ತದೆ. ಆಟೋಮೆಟಿಕ್ ಕಂಪ್ಯೂಟರ್ ಅನೌನ್ಸ್ಮೆಂಟ್ಗಳೂ ಈ ಚಿಪ್ನಲ್ಲಿ ರೆಕಾರ್ಡ್ ಆಗಿರುತ್ತದೆ. ಹೀಗಾಗಿ ಈ ಕಪ್ಪು ಪೆಟ್ಟಿಗೆಯ ಮೂಲಕ ತಜ್ಞರು ಯಾವುದೇ ವಿಮಾನ ದುರಂತವಾದರೂ ಅದು ಹೇಗಾಯಿತು ಎಂಬುದನ್ನು ಪತ್ತೆ ಹಚ್ಚುತ್ತಾರೆ.
ಇದನ್ನೂ ಓದಿ: IAF Helicoptor Black box: ತಮಿಳುನಾಡಿನಲ್ಲಿ ಪತನಗೊಂಡ ಹೆಲಿಕಾಪ್ಟರ್ನ ಬ್ಲ್ಯಾಕ್ ಬಾಕ್ಸ್ ಪತ್ತೆ
ಇದೀಗ ತಮಿಳುನಾಡಿನ ನೀಲಿಗಿರಿಯ ಕೂನೂರಿನಲ್ಲಿ ನಡೆದ ಸೇನಾ ಹೆಲಿಕಾಪ್ಟರ್ ದುರಂತ ಸಂಬಂಧ ಮಹತ್ವದ ಮಾಹಿತಿ ನೀಡಬಹುದಾದ ರಷ್ಯಾ ನಿರ್ಮಿತ Mi-17V5 ಹೆಲಿಕಾಪ್ಟರ್ನ ಬ್ಲ್ಯಾಕ್ ಬಾಕ್ಸ್ ಪತ್ತೆಯಾಗಿದೆ. ಈ ಬ್ಲ್ಯಾಕ್ ಬಾಕ್ಸ್ ಮತ್ತು ದುರಂತದಲ್ಲಿ ಬದುಕುಳಿದು ಚಿಕಿತ್ಸೆ ಪಡೆಯುತ್ತಿರುವ ಗ್ರೂಪ್ ಕ್ಯಾಪ್ಟನ್ ವರುಣ್ ಸಿಂಗ್ರಿಂದ ಮಾತ್ರವೇ ಅವಘಡಕ್ಕೆ ಕಾರಣ ತಿಳಿದು ಬರಲಿದೆ ಎಂದು ಹೇಳಲಾಗುತ್ತಿದೆ.
ಈಗಾಗಲೇ ಸರ್ಕಾರ ಮೂರು ದಳಗಳಿಂದ ತನಿಖೆಗೆ ಆದೇಶಿಸಿದೆ. ಈಗಾಗಲೇ ಬ್ಲ್ಯಾಕ್ ಬಾಕ್ಸ್ ಕೂಡಾ ಸಿಕ್ಕಿದೆ. ತನಿಖೆಯ ಬಳಿಕವೇ ಈ ಹೆಲಿಕಾಪ್ಟರ್ ದುರಂತಕ್ಕೆ ಕಾರಣ ಏನು ಎಂಬುದು ತಿಳಿದು ಬರಬೇಕಿದೆ.
