সমস্যা সমাধানৰ দাবীত নগাঁও কাগজ কল ঠিকাদাৰ সন্থাৰ সংবাদমেল

শেহতীয়াকৈ সন্মুখীন বিভিন্ন সমস্যাৰাজি দাঙি ধৰি তথা ইয়াৰ সমাধানৰ দাবীৰে সোমবাৰে দিছপুৰ প্ৰেছ ক্লাৱত এখন সংবাদমেল সম্বোধন কৰে নগাঁও কাগজ কলৰ ঠিকাদাৰ সন্থাই ৷ সংবাদমেল সম্বোধন কৰি সন্থাৰ সদস্য অতনু বৰাই কয় যে, নগাঁও আৰু কাছাৰ কাগজ কল দুটাৰ প্ৰায় ছয় শতাধিক ঠিকাদাৰ প্ৰত্যক্ষ আৰু পৰোক্ষভাৱে জড়িত হৈ আছে ৷ কাগজ কল দুটাৰ লগত জড়িত দুই লাখ ঠিকাদাৰ আৰু বিভিন্ন পৰ্যায়ৰ শ্ৰমিক কৰ্মচাৰী ক্ষতিগ্ৰস্ত হৈছে ৷ এই কাগজ কল দুটাত 654 গৰাকী ঠিকাদাৰ জড়িত হৈ আছিল ৷ কামৰ বাবদ ঠিকাদাৰ সকলে 440 কোটি টকা পাবলৈ আছে ৷ পাবলগীয়া ধন নোপোৱাৰ ফলত অভাৱনীয় আৰ্থিক সংকটত পৰিছে ঠিকাদাৰসকল ৷ আনহাতে, কাগজ কল দুটা সূচাৰুৰূপে পৰিচালনা নোহোৱাৰ বাবেই বন্ধ হৈ যোৱা বুলি মন্তব্য কৰে সন্থাৰ সদস্য সকলে ৷ ইতিমধ্য কাগজ কল দুটাৰ বিষয়টো ৰাষ্ট্ৰীয় কোম্পানী ল’ ট্ৰিব্যুনালত বিচাৰধীন হৈ আছে ৷ ন্যায়ালয়ে কাগজ কল দুটাৰ নিলাম ঘোষণা কৰিছে ৷ এই ঘোষণাত নগাঁও কাগজ কল ঠিকাদাৰ সন্থাই আশ্চৰ্য প্ৰকাশ কৰি, এই সিদ্ধান্তৰ বাবে তেওঁলোকৰ ভৱিষ্যত অন্ধকাৰ হৈ পৰিছে বুলি মন্তব্য কৰে ৷ মুখ্যমন্ত্ৰীয়ে যিদৰে কৰ্মচাৰী সকলৰ বাবে ব্যৱস্থা কৰি দিছে সেইদৰে ঠিকাদাৰ সকলৰ বাবেও এটা ব্যৱস্থা কৰিবলৈ সংবাদমেল যোগে মুখ্যমন্ত্ৰীলৈ আহ্বান জনাইছে নগাঁও কাগজ কলৰ ঠিকাদাৰ সন্থাই ৷