Extension of route to Rangia by train: ৰঙিয়ালৈ যাত্ৰাপথ সম্প্ৰসাৰণ শিলচৰ-গুৱাহাটী এক্সপ্ৰেছৰ

ৰঙিয়া,৫ ছেপ্টেম্বৰ: সুদীৰ্ঘ অপেক্ষাৰ অন্তত ১৫৬১১/১৫৬১২ নম্বৰ শিলচৰ-গুৱাহাটী এক্সপ্ৰেছ ৰে'লগাড়ীখনৰ যাত্রাপথৰ সম্প্ৰসাৰণ কৰা হৈছে ৰঙিয়ালৈ । বৰাক আৰু ব্ৰহ্মপুত্ৰ উপত্যকাক সংযুক্ত কৰিবলগীয়া ৰে'লখনৰ নতুন যাত্ৰাৰ সোমবাৰে ৰঙিয়া ষ্টেচনত ফ্লেগ অফ কৰা হয় ।  

ফ্লেগ অফ কৰে ৰাজ‍্যসভাৰ সাংসদ ভুৱনেশ্বৰ কলিতা তথা ৰঙিয়াৰ বিধায়ক ভবেশ কলিতাই । সপ্তাহত তিনিদিনকৈ চলাচল কৰিবলগীয়া এই এক্সপ্ৰেছ ৰে'লগাড়ীখনে এতিয়াৰেপৰা গুৱাহাটীৰ পৰিৱৰ্তে ৰঙিয়াৰ পৰা যাত্ৰা আৰম্ভ কৰিব । সপ্তাহৰ প্ৰতি সোমবাৰ, বৃহস্পতিবাৰ আৰু শনিবাৰে বিয়লি ৩-৪৫ বজাত এই ৰে'লগাড়ীখনে ৰঙিয়া ৰে'ল জংচনৰপৰা যাত্ৰা আৰম্ভ কৰি পাছদিনা পুৱা ৪-৩০ বজাত শিলচৰত উপস্থিত হ'ব ।  

লগতে সপ্তাহৰ প্ৰতি দেওবাৰ, বুধবাৰ আৰু শুকুৰবাৰে নিশা ১০-৪০ বজাত শিলচৰৰপৰা ওভতনি যাত্ৰা আৰম্ভ কৰি পাছদিনা দিনৰ ১০-৪৫ বজাত ৰঙিয়াত উপস্থিত হ'ব ।অসম ৰে'লযাত্রী সংস্থাই বিগত কেইবাবছৰ ধৰি বৰাক উপত্যকাৰ সৈতে সংযোগ ঘটোৱা এই বিশেষ এক্সপ্ৰেছ ৰে'লগাড়ীখন ৰঙিয়ালৈ সম্প্ৰসাৰণৰ বাবে দাবী জনাই আহিছিল । অৱশেষত এই দাবী পূৰণ হোৱাত ৰেলযাত্রী সংস্থাৰ সাধাৰণ সম্পাদক দীপংকৰ শৰ্মাই ৰে'ল বিভাগক ধন্যবাদ জ্ঞাপন কৰে । 

লগতে পঢ়ক: Suspended Inspector Boro: সৰ্বকালৰ ৫০খন শ্ৰেষ্ঠ ভাৰতীয় একচন ছবিৰ ভিতৰত ১৪ নম্বৰত স্থান লাভ এখন অসমীয়া ছবিৰ