স্তন কেন্সাৰৰ পিছত মহিলাৰ ক্ষেত্ৰত ছাৰ্ভাইকেল কেন্সাৰ আটাইতকৈ বেছি দেখা যায় ৷ শৰীৰৰ অতি সুক্ষ্ম অংশত আক্ৰান্ত এই কেন্সাৰটোও অতি মাৰাত্মক হ’ব পাৰে ৷ সাধাৰণতে ছাৰ্ভাইকেল কেন্সাৰৰ স্পষ্ট লক্ষণ দেখা নাযায় ৷ ছাৰ্ভাইকেল কেন্সাৰৰ লক্ষণসমূহ সাধাৰণ নহয় ৷ তথাপিও ছাৰ্ভাইকেল কেন্সাৰত দেখা পোৱা এটা সাধাৰণ লক্ষণ হ’ল যোনিৰ পৰা অনিয়মিত ৰক্তক্ষৰণ ৷ ইয়াৰ বিষয়ে আৰু বিতংভাৱে জানো আহক...
ছাৰ্ভাইকেল কেন্সাৰৰ লক্ষণ
আপুনি জানে যে ছাৰ্ভাইকেল কেন্সাৰৰ এটা সাধাৰণ লক্ষণ হ’ল যোনিৰ পৰা অস্বাভাৱিক ৰক্তক্ষৰণ ৷ ৰজোনিবৃত্তিৰ পিছতো যোনিৰ পৰা ৰক্তক্ষৰণ, যৌন সম্পৰ্কৰ সময়ত বা নিয়মীয়া ঋতুস্ৰাৱৰ মাজত যোনিৰ পৰা তেজ ওলোৱাও ছাৰ্ভাইকেল কেন্সাৰৰ লক্ষণ হ’ব পাৰে ৷ ইয়াৰ উপৰিও যোনিৰ স্ৰাৱৰ পৰিৱৰ্তন, যৌন সম্পৰ্কৰ সময়ত বিষ বা অস্বস্তি অনুভৱ কৰা, কঁকালৰ তলৰ অংশ আৰু শ্ৰোণী অংশত অস্পষ্ট বিষ হোৱা আদিও ছাৰ্ভাইকেল কেন্সাৰৰ ফলত হ’ব পাৰে ৷
ছাৰ্ভাইকেল কেন্সাৰৰ কাৰণ
ছাৰ্ভাইকেল কেন্সাৰৰ মূল কাৰণ হ’ল হিউমেন পেপিলোমা ভাইৰাছ (HPV) ৷ উল্লেখ্য যে, এইচ পি ভি এটা অতি সাধাৰণ সমস্যা আৰু সাধাৰণতে কোনো সমস্যা নোহোৱাকৈ নিজাববীয়াকৈ আৰোগ্য লাভ কৰিব পৰা যায় ৷ কিন্তু কেতিয়াবা ইয়াৰ ফলত ছাৰ্ভাইক্সৰ কোষবোৰত ডাঙৰ পৰিৱৰ্তন ঘটে, যাৰ ফলত ছাৰ্ভাইকেল কেন্সাৰ হ’বলৈ আৰম্ভ কৰে ৷ এই প্ৰক্ৰিয়াটো অতি লেহেমীয়া আৰু এইচ পি ভিৰ বাবে ছাৰ্ভাইকেল কেন্সাৰ হ’বলৈ ৫ৰ পৰা ২০ বছৰ সময় লাগিব পাৰে ৷
গৰ্ভনিৰোধক বড়িৰ ফলত ছাৰ্ভাইকেল কেন্সাৰ হ’ব পাৰে
এইচ পি ভিৰ ফলত ছাৰ্ভাইকেল কেন্সাৰ হ’ব পাৰে ৷ ইয়াৰ উপৰিও কিছুমান কাৰক আছে যিয়ে ছাৰ্ভাইকেল কেন্সাৰৰ সৃষ্টি কৰিব পাৰে ৷ যদি আপুনি ধূমপান কৰে বা ধূমপান কৰা লোকৰ আশে-পাশে থাকে তেন্তে আপুনিও ছাৰ্ভাইকেল কেন্সাৰত আক্ৰান্ত হ’ব পাৰে ৷ কেৱল এয়াই নহয়, যিসকল মহিলাৰ ৰোগ প্ৰতিৰোধ ক্ষমতা দুৰ্বল, তেওঁলোকৰো ছাৰ্ভাইকেল কেন্সাৰ হোৱাৰ সম্ভাৱনা বেছি ৷ মৌখিক গৰ্ভনিৰোধক বড়ি আৰু ডাইথাইলষ্টিলবেষ্ট্ৰল (DES) গ্ৰহণ কৰা মহিলাসকলৰ ছাৰ্ভাইকেল কেন্সাৰ হোৱাৰ সম্ভাৱনা বেছি ৷ উল্লেখ্য যে, ১৯৩৮ চনৰ পৰা ১৯৭১ চনৰ ভিতৰত গৰ্ভপাতৰ ইতিহাস থকা গৰ্ভৱতী মহিলাক ডাইথাইলষ্টিলবেষ্ট্ৰল দিয়া হৈছিল ৷
গৱেষকৰ মতে এইচ পি ভি ভেকচিন নোলোৱা মহিলাৰ ছাৰ্ভাইকেল কেন্সাৰ হোৱাৰ আশংকা সদায় থাকে ৷ যিসকল মহিলা কেতিয়াও ছাৰ্ভাইকেল স্ক্ৰীনিঙৰ বাবে নাযায়, তেওঁলোকো গোটেই জীৱন ছাৰ্ভাইকেল কেন্সাৰ হোৱাৰ আশংকা থাকে ৷ এয়া কম বিপদৰ কথা নহয়, কাৰণ এই পৰিসংখ্যা ২ৰ পৰা ১০০ শতাংশলৈকে হ’ব পাৰে ৷
ভাৰতত এইচ পি ভি সম্পৰ্কীয় কৰ্কট ৰোগী
| কৰ্কট ৰোগৰ প্ৰকাৰ | পুৰুষ | মহিলা |
| ছাৰ্ভাইকেল কেন্সাৰ | – | ১৮.৭ |
| ভলভা কেন্সাৰ | – | ০.৫২ |
| পায়ুপথৰ কৰ্কট ৰোগ | ০.৪৩ | ০.৩৫ |
| যোনিৰ কৰ্কট ৰোগ | – | ০.৮৩ |
| লিংগ কেন্সাৰ | ১.৪৯ | – |
| অৰ’ফেৰিঞ্জিয়াল কেন্সাৰ | ২.৪০ | ০.৫২ |
| মুখগহ্বৰৰ কৰ্কট ৰোগ | ১৪.৬ | ৪.৭২ |
| লেৰিঞ্জিয়াল কেন্সাৰ | ৪.২১ | ০.৬৮ |
ছাৰ্ভাইকেল কেন্সাৰ কেনেকৈ ধৰা পৰে ?
ছাৰ্ভাইকেল স্ক্ৰীনিঙত নমুনা লৈ উচ্চ বিপদজনক এইচ পি ভি পৰীক্ষা কৰা হয় ৷ যদি ভাইৰাছ পোৱা যায়, তেন্তে নমুনা লোৱা হয় যাতে ইয়াৰ ফলত ছাৰ্ভাইকেল কেন্সাৰ কোষত কিবা পৰিৱৰ্তন হৈছে নে নাই ৷ যদিহে ছাৰ্ভাইক্সৰ কোষত কোনো পৰিৱৰ্তন দেখা নাযায়, তেন্তে এবছৰৰ ভিতৰত মহিলাগৰাকীক পুনৰ ছাৰ্ভাইকেল স্ক্ৰীনিঙৰ বাবে মাতি অনা হয় ৷ যাতে এইচ পি ভি নাইকিয়া হোৱাটো নিশ্চিত কৰিব পৰা যায় ৷ যদি কোনো মহিলাৰ জৰায়ুৰ মুখত এইচ পি ভি পোৱা যায় আৰু কোষত পৰিৱৰ্তন দেখা যায়, তেন্তে কলপস্কপি কৰা হয় ৷ কলপস্কপিৰ বাবে মাইক্ৰস্কোপৰ জৰিয়তে জৰায়ুৰ মুখখন ভালদৰে চাই ছাৰ্ভাইকেল কেন্সাৰৰ বিষয়ে অধিক তথ্য সংগ্ৰহ কৰা হয় ৷
প্ৰতি বছৰে ১.২৫ লাখ ৰোগীৰ ছাৰ্ভাইকেল কেন্সাৰ
Human Papillomavirus and Related Cancers, Fact Sheet 2023ৰ তথ্য অনুসৰি ভাৰতত ১৫ বছৰৰ ওপৰৰ মহিলাৰ জনসংখ্যা ৫১ কোটিতকৈও অধিক ৷ এই আটাইকেইগৰাকী মহিলাৰ ছাৰ্ভাইকেল কেন্সাৰ হোৱাৰ আশংকা থাকে ৷ সাম্প্ৰতিক পৰিস্থিতিৰ কথা যদি কওঁ, প্ৰতি বছৰে ১ লাখ, ২৩ হাজাৰ, ৯০৭ গৰাকী মহিলাৰ ছাৰ্ভাইকেল কেন্সাৰ কৰ্কট ৰোগ ধৰা পৰে ৷ কেৱল এয়াই নহয়, প্ৰতিবেদন অনুসৰি প্ৰতি বছৰে এই মাৰাত্মক কৰ্কট ৰোগৰ বাবে ৭৭ হাজাৰ ৩৪৮ গৰাকী মহিলাৰ অকাল মৃত্যু হয় ৷
HPV ভেকচিনে কৰিব সহায়
দৰাচলতে বহু ধৰণৰ HPVৰ ভিতৰত কিছুমানক ‘কম বিপদজনক’ আৰু কিছুমানক ‘অধিক বিপদজনকৰ' শ্ৰেণীত ৰখা হয় । এইবোৰৰ উচ্চ বিপদজনক প্ৰকাৰৰ বাবে কেন্সাৰকে ধৰি আন বিভিন্ন ধৰণৰ গুৰুতৰ ৰোগত ভোগাৰ আশংকা থাকে । HPV ভেকচিনে বিপদজনক এই প্ৰকাৰৰ বিৰুদ্ধে ৰক্ষাকৱচ হিচাপে কাম কৰে, যিটো বহুলাংশে সফল হয় ।
কেৱল ছাৰ্ভাইকেল কেন্সাৰেই নহয়, ভলভাৰ বা অন্যান্য যৌনাংগ আৰু আন কিছুমান প্ৰকাৰৰ কৰ্কট ৰোগ প্ৰতিৰোধ কৰাত HPV ভেকচিন উপকাৰী বুলি গণ্য কৰা হয় । এই ভেকচিনে এই কেন্সাৰ সৃষ্টি কৰা HPVৰ প্ৰকাৰৰ বিৰুদ্ধে যুঁজ দিয়ে । এতিয়ালৈকে ভাৰতত ছাৰ্ভাইকেল কেন্সাৰ প্ৰতিৰোধৰ বাবে দুটা বিশ্বব্যাপী অনুজ্ঞাপত্ৰপ্ৰাপ্ত কোম্পানী (Gardasil, GlaxoSmithKline)ৰ ভেকচিন (Gardasil 9 আৰু Cervarix) উপলব্ধ হৈছে। যাৰ সফলতাৰ পৰিসংখ্যা ৭০% পৰ্যন্ত বুলি বিবেচিত হৈছে । এই ভেকচিনসমূহ স্বাভাৱিক অৱস্থাত ৯ বছৰৰ পৰা ২৬ বছৰলৈ গ্ৰহণ কৰিব পাৰে ।
লগতে পঢ়ক: National Epilepsy Day 2023: মৃগীৰোগ সন্দৰ্ভত সজাগতা সৃষ্টিৰ প্ৰয়াস জিএনআৰচি হাস্পতালৰ
