লখিমপুৰ, 27 আগষ্ট: শুকুৰবাৰে লখিমপুৰত উত্তাল প্ৰতিবাদ সাব্যস্ত কৰে সদৌ অসম ছাত্ৰ সন্থাই ৷ এনএইচপিচিৰ বিৰুদ্ধে প্ৰতিবাদত নামিছে সংগঠনটো ৷ উল্লেখযোগ্য যে, দীৰ্ঘ দিনৰ পৰা সংগঠনটোৱে এনএইচপিচিৰ বিৰুদ্ধে প্ৰতিবাদ কৰি আহিছে ৰাইজৰ সহযোগত ৷ কিন্তু আজিকোপতি কেন্দ্ৰ কি ৰাজ্য চৰকাৰ, কোনো এখন চৰকাৰে গুৰুত্ব প্ৰদান কৰা নাই এই সমস্যাটোৰ ওপৰত ৷
সেয়েহে উপায়ন্তৰ হৈ শুকুৰবাৰে পুনৰ ৰাজপথলৈ উলাই আহিবলৈ বাধ্য হৈছে সংগঠনটো ৷ উত্তৰ লখিমপুৰ আঞ্চলিক ছাত্ৰ সন্থাই লখিমপুৰ নগৰৰ মাজত মুখ্যমন্ত্ৰী, কেন্দ্ৰীয় শক্তি মন্ত্ৰী, এনএইচপিচিৰ প্ৰতিকৃতি দাহ কৰি প্ৰতিবাদস্থলী উত্তাল কৰি তুলে ৷ সংগঠনটোৱে অতি শীঘ্ৰে সোৱণশিৰি জলবিদ্যুৎ প্ৰকল্পটো বন্ধৰ দাবী জনাই কেন্দ্ৰীয় আৰু ৰাজ্য চৰকাৰক ৷
ইয়াৰ লগতে বিভিন্ন প্ৰতিবাদী শ্ল’গান যেনে, বিজেপি গ’ বেক, এনএইচপিচি হুচিয়াৰ, শক্তিমন্ত্ৰী গ’ বেক, অসম চৰকাৰ হায় হায় আদি শ্ল’গান দি চৰকাৰৰ বিৰুদ্ধে ক্ষোভ প্ৰকাশ কৰে ৷ ছাত্ৰ সংগঠনটোৰ দাবী, যেতিয়ালৈকে জলবিদ্যুৎ প্ৰকল্পটোৰ নামনিৰ ৰাইজৰ জীৱন সম্পত্তিৰ নিৰাপত্তা নিশ্চিত নহয় তেতিয়ালৈকে প্ৰতিবাদ সাব্যস্ত কৰি যাব সংগঠনটোৱে ৷
লগতে পঢ়ক: লেটেকুপুখুৰীত মাধৱদেৱৰ ৪২৫ সংখ্যক তিৰোভাৱ তিথি পালন
প্ৰতিবাদকাৰী ছাত্ৰ সংগঠনটোৰ নেতৃত্বই কয়, ছাত্ৰ সন্থাই 2001 চনৰ পৰাই এই প্ৰকল্পটোৰ বিৰুদ্ধে যুঁজ দি আহিছো ৷ এই প্ৰকল্পটোৱে পৰৱৰ্তী সময়ত নামনি অঞ্চলৰ ৰাইজক ভয়ংকৰ বিপদত পেলাব ৷ ইয়াৰৰ লগে লগে ভূমিকম্প প্ৰৱণ অঞ্চলত বৃহৎ নদী বান্ধ নিৰ্মাণ কৰা ব্যৱস্থাটো নিৰাপদ নহয় বুলি বিশেষজ্ঞ সকলে ইতিমধ্যে প্ৰতিবেদনৰ জৰিয়তে উল্লেখ কৰিছে ৷ তাৰ পাচতো প্ৰকল্পটোৰ নিৰ্মাণ কাৰ্য অব্যাহত ৰাখিছে এনএইচপিচিয়ে ৷
লগতে ছাত্ৰ সংগঠনটোৰ নেতৃত্বই কয় যে, বিগত নিৰ্বাচনৰ পূৰ্ৱে বৰ্তমানৰ কেন্দ্ৰীয় প্ৰতিৰক্ষা মন্ত্ৰী ৰাজনাথ সিঙসহ বিজেপি দলেও এই প্ৰকল্পটো নিৰ্মাণৰ বিৰোধীতা কৰিছিল ৷ বিৰোধীতা কৰাই নহয়, জন সমৰ্থন লৈ পৰৱৰ্তী সময়ত চৰকাৰ দখল কৰিবলৈও সক্ষম হৈছিল বিজেপি দল ৷ শাসনৰ গাদী দখল কৰাৰ পাচতো ওলোটা খৰ মাৰি বিজেপি নেতৃত্বাধীন চৰকাৰখনে প্ৰকল্পটো নিৰ্মাণ কৰাতহে উঠি পৰি লাগিছে ৷ যিটো অসমৰ জনসাধাৰণৰ বাবে দুৰ্ভাগ্যপূৰ্ণ বুলি কয় ছাত্ৰ সন্থাইৰ নেতৃত্বই ৷
সম্প্ৰতি ছাত্ৰ সংগঠনটোৱে পুনৰ চৰকাৰক সকিয়াই দিছে, সময় থাকোতে যদি চৰকাৰে প্ৰকল্পটোৰ নিৰ্মাণ কাৰ্য বন্ধ নকৰিলে অতি শীঘ্ৰে ৰাজ্যজুৰি তীব্ৰ গণতান্ত্ৰিক আন্দোলন গঢ়ি তুলিব ৷
লগতে পঢ়ক: আজৱ কাণ্ড: দলং নিৰ্মাণত ৰডৰ বিপৰীতে বাঁহৰ শলা ব্যৱহাৰ
