লখিমপুৰ, ২৪ জানুৱাৰী : আকৌ ৰণত পৰিল গেৰজাই । দেওবাৰে শনিবাৰে লখিমপুৰ মেডিকেল কলেজৰ পৰা আৰক্ষীৰ বেষ্টনী ফালি পলোৱা দুধৰ্ষ অপৰাধী গেৰজাই ওৰফে ৰাজু বৰুৱাক পলাতক অৱস্থাত সোমবাৰে আৰক্ষীয়ে পুনৰ গ্ৰেপ্তাৰ কৰিবলৈ সক্ষম হয় (Criminal arrested by Lakhimpur police)। হত্যা, ধৰ্ষণ, অপহৰণ, ধনদাবী, ডকাইতিকে আদি কৰি বহুকেইটা অপৰাধৰ লগত জড়িত গেৰজাই ওৰফে ৰাজু বৰুৱাক আৰক্ষীয়ে পুনৰ কৰায়ত্ব কৰিছে ৷
মেডিকেল কলেজৰ পৰা পলায়ন কৰি নিজৰ গাঁৱতে লুকাই থকা অৱস্থাত ঢকুৱাখনা আৰক্ষীয়ে সোমবাৰে বিয়লি স্থানীয় ৰাইজৰ সহযোগত কৰায়ত্ব কৰিবলৈ সক্ষম হয় গেৰজাইক । দুধৰ্ষ গেৰজাইক ২০২১ চনৰ ২৪ ছেপ্টেম্বৰৰ নিশা ৮ বজাত ঢকুৱাখনা সদৰ থানাৰ ভাৰপ্ৰাপ্ত আৰক্ষী বিষয়া নিৰঞ্জন বৰুৱা আৰু মহকুমা আৰক্ষীয়ে গুলীচালনা কৰি গ্ৰেপ্তাৰ কৰিছিল ৷
ঢকুৱাখনা জালভাৰী গাঁও নিবাসী গেৰজাইক বিভিন্ন হত্যাৰ অভিযোগত এনকাউণ্টাৰ কৰি গ্ৰেপ্তাৰ কৰিছিল । পৰৱৰ্তী সময়ত কাৰাগাৰত থকা গেৰজাই ওৰফে ৰাজু বৰুৱা ক’ভিডত আক্ৰান্ত হোৱাৰ বাবে লখিমপুৰ মেডিকেল কলেজত চিকিৎসাধীন হৈ আছিল ৷
আৰক্ষী চকুত ধূলি দি শনিবাৰৰ দিনা পুৱতি নিশা পলায়ন কৰিছিল গেৰেজায়ে (Criminal flees from covid centre) ৷ দুটা দিনৰ অন্তত সোমবাৰে ঢকুৱাখনা আৰক্ষীয়ে স্থানীয় ৰাইজৰ সহযোগত কৰায়ত্ব কৰিবলৈ সক্ষম হয় দুধৰ্ষ অপৰাধীটোক । গেৰজাইক পুনৰ গ্ৰেপ্তাৰ কৰাত অঞ্চলবাসীয়ে স্বস্তিৰ নিশ্বাস পেলাইছে ।
লগতে পঢ়ক: গঁড় হত্যা ৰোধ কৰিবলৈ কাজিৰঙাত ব্যৱহাৰ হ’ব কমাণ্ডো বাহিনী
