ডিফু, ১৩ নৱেম্বৰ : বকলীয়াঘাটত বন বিভাগে শুকুৰবাৰে সন্ধিয়া অভিযান চলাই বুজন পৰিমাণৰ চোৰাং কাঠ জব্দ কৰিবলৈ সক্ষম হয় । বকলীয়াঘাটত বন বিভাগে শুকুৰবাৰে সন্ধিয়া বকলীয়াঘাট হৈ চোৰাং কাঠ বোজাই কৰা এখন টাটা ম’বাইল বাহন পাৰ হৈ যোৱাৰ তথ্য লাভ কৰে । উক্ত তথ্যৰ ভিত্তিত বন বিভাগৰ নৰ্দাৰ্ণ ৰেঞ্জৰ বকলীয়াঘাটস্থিত কাৰ্যালয়ৰ সহকাৰী বন সংৰক্ষক হৰিনাথ ৰংহাঙৰ নেতৃত্বত বনকৰ্মীৰ এটা দলে চোৰাং কাঠৰ সন্ধানত অভিযান চলায় ।
ইফালে, বন বিভাগৰ অভিযানৰ বিষয়ে জানিব পাৰি চোৰাং কাঠৰ সৰবৰাহকাৰী দলটোৱে ৰজাপথাৰ তিনিআলি পাৰ হৈ অন্য এক সুকীয়া পথেৰে হোজাই জিলাৰ চিতলমাৰী অভিমুখে পলায়নৰ চেষ্টা কৰে ৷ কিন্তু অভিযানকাৰী বনকৰ্মীৰ দলটোৱে তৎপৰতাৰে অভিযান চলাই এ এছ-০৯-চি-৪৩৯১ নম্বৰৰ টাটা ম’বাইল বাহনখন জব্দ কৰিবলৈ সক্ষম হয় ।
টাটা ম’বাইলখনৰ পৰা বনকৰ্মীৰ দলটোৱে প্ৰায় ৬২ ডাল মূল্যবান কাঠৰ ফাণ্টা উদ্ধাৰ কৰিবলৈ সক্ষম হয় । জব্দ হোৱা কাঠখিনিৰ আনুমানিক বজাৰ মূল্য অৰ্ধ লক্ষাধিক টকা হ’ব বুলি অনুমান কৰা হৈছে । এই সন্দৰ্ভত বনকৰ্মীৰ দলটোৱে চোৰাং কাঠৰ সৰবৰাহৰ সৈতে জড়িত চাৰি দুৰ্বৃত্তক আটক কৰিবলৈ সক্ষম হয় । ধৃত কাঠ সৰবৰাহকাৰী কেইটা ক্ৰমে প্ৰণৱ টেৰণ, বিষ্ণু গোৱালা, চাৰছিং টেৰণ আৰু জগু টেৰণ বুলি চিনাক্ত কৰা হৈছে ।
লগতে পঢ়ক : Robbery attempt foiled: হস্তনিৰ্মিত পিষ্টল সহ পাঁচজনীয়া ডকাইতৰ দল আটক
