ডিফু, 18 জুলাই : ৰাজ্যজুৰি অব্যাহত থকা ক'ভিড আতংকৰ মাজতে ডিফুৰ বকলীয়াঘাটত সংঘটিত হৈছে এক শিহৰণকাৰী ঘটনা ৷ পাৰিবাৰিক কন্দলৰ পৰিণতিত পত্নীক দাৰে ঘপিয়াই হত্যা কৰিলে স্বামীয়ে ৷ বকলীয়াঘাট থানাৰ পৰা প্ৰায় 15 কিল’মিটাৰ নিলগৰ ক্লুৰডুঙৰ গৌৰবস্তিত সংঘটিত হৈছে এই ঘটনা ৷ ইতিমধ্যে হত্যাকাৰী স্বামীক আটক কৰিছে বকলীয়াঘাট আৰক্ষীয়ে ৷
উল্লেখ্য যে, ক্লুৰডুঙৰ গৌৰবস্তি নিবাসী লক্ষণ মুণ্ডা নামৰ লোকজনে দেওবাৰে পুৱতি নিশা সাধাৰণ কোনো ঘৰুৱা বিষয়ক কেন্দ্ৰ কৰি পত্নীৰ সৈতে কাজিয়াত লিপ্ত হয় ৷ উক্ত কাজিয়াই চৰম ৰূপ ধাৰণ কৰাত খঙত কাণ্ডজ্ঞান হেৰুৱাই লক্ষণ মুণ্ডাই পত্নী জয়ন্তী মুণ্ডাক দাৰে ঘপিয়াই নৃশংসভাৱে হত্যা কৰে ৷ হত্যাকাণ্ড সংঘটিত কৰিয়েই লক্ষণ মুণ্ডাই উক্ত স্থানৰ পৰা পলায়ন কৰে ৷
পৰৱৰ্তী সময়ত ঘটনাৰ বিষয়ে জানিব পাৰি বকলীয়াঘাট থানাৰ ভাৰপ্ৰাপ্ত বিষয়া মনজিৎ তেৰাঙৰ নেতৃত্বত আৰক্ষীৰ এটা দলে ঘটনাস্থলীত উপস্থিত হৈ স্থানীয় লোকৰ সহায়ত অভিযুক্তক আটক কৰিবলৈ সক্ষম হয় ৷
মুণ্ডাৰ পুত্ৰই জনোৱা অনুসৰি বছৰ বছৰ ধৰি পিতৃয়ে প্ৰায়েই ঘৰত কাজিয়া তথা মাৰপিট সংঘটিত কৰি আহিছিল ৷ সৰু সৰু কথাতে পূৰ্বেও মাতৃক মাৰপিট কৰিছিল বুলি জনাইছে পুত্ৰই ৷ ঘটনা সন্দৰ্ভত বৰ্তমান আৰক্ষীয়ে তদন্ত অব্যাহত ৰাখিছে ৷
ধৃত ব্যক্তিজনৰ জিম্মাৰ পৰা আৰক্ষীয়ে হত্যাকাণ্ডত ব্যৱহৃত এখন দা জব্দ কৰিবলৈ সক্ষম হৈছে ৷ দোষীক কঠোৰ শাস্তি প্ৰদান কৰাৰ দাবী তুলিছে স্থানীয় ৰাইজে ৷ এই ঘটনাই বৰ্তমান সমগ্ৰ অঞ্চলটোত শোকৰ ছাঁ পেলাইছে ৷
