ৰঙিয়া, 12 আগষ্ট: ৰঙিয়াৰ উদিয়ানাত চাঞ্চল্যকৰ ঘটনা ৷ শুকুৰবাৰে দিন-দুপৰতে এগৰাকী বিশেষভাৱে সক্ষম কিশোৰীক অপহৰণ কৰাৰ এক ঘটনা সংঘটিত হয় ৰঙিয়াৰ উদিয়ানাত । কিশোৰীগৰাকী হৈছে উদিয়ানাৰ দিলোৱাৰ হুছেইন আৰু মজিদা বেগমৰ কন্যা জেছমিন চুলতানা (17) ।জানিব পৰা মতে, দিব্যাংগ কিশোৰীগৰাকীৰ মাতৃ মজিদা বেগমে এটি গোচৰত প্ৰায় এবছৰ পূৰ্বে কাৰাবাস খাটিবলগীয়া হৈছিল । সেই সময়তে কাৰাগাৰৰ ভিতৰত লগ পাইছিল বৰপেটাৰ মামনি দাসক ।
উক্ত চিনাকি সূত্ৰে শুকুৰবাৰে মামনি দাসে মজিদা বেগমৰ ঘৰ বিচাৰি উদিয়ানালৈ আহিছিল । কিন্তু সেইখিনি সময়ত ঘৰত মাক নথকাৰ সুযোগ বুজি মামনি দাসে বিশেষভাৱে সক্ষম কিশোৰীগৰাকীক চলাহি কথা কৈ অপহৰণ কৰি লৈ যায় বুলি পৰিয়ালৰ লোকে অভিযোগ তুলিছে । পৰিয়ালবৰ্গই জানিবলৈ দিয়া অনুসৰি কিশোৰীগৰাকীৰ পিতৃৰ আগত সোনকালে উভতি আহিম বুলি কৈ মামণি দাসে কিশোৰীগৰাকীক ঘৰৰ পৰা লৈ যায় । কিন্তু প্ৰায় এঘণ্টা সময় ধৰি কিশোৰীগৰাকী ওভতি নহাত পৰিয়ালবৰ্গই কিশোৰীগৰাকীৰ বিচাৰিবলৈ আৰম্ভ কৰে ।
তেতিয়া ওচৰ চুবুৰীয়া লোকে পৰিয়ালটোক কিশোৰী গৰাকী মামণি দাসৰ লগত কিছুসময় পূৰ্বে দেখিবলৈ পোৱা গৈছে বুলি উল্লেখ কৰাৰ লগতে কিশোৰীগৰাকী কান্দি কান্দি মামণি দাসৰ লগত ই-ৰিক্সাত যোৱা প্ৰত্যক্ষ কৰিছে বুলি জানিবলৈ দিয়ে । পৰিয়ালবৰ্গই জানিবলৈ দিয়া অনুসৰি উক্ত সময়ত অপহৰণকাৰী মহিলাগৰাকীৰ কোলাত আন এটা শিশু আছিল । উল্লেখ্য যে, এবছৰ পূৰ্বেও এই মামনি দাসে আন এগৰাকী 9 বছৰীয়া কিশোৰীক অপহৰণ কৰিছিল । তাৰ পিছত ৰঙিয়া থানাৰ ভাৰপ্ৰাপ্ত আৰক্ষী বিষয়া ভাস্কৰ মল্ল পাটোৱাৰীৰ নেতৃত্বত যোৱা দলে কিশোৰীক উদ্ধাৰ কৰিবলৈ সক্ষম হৈছিল । লগতে মামনি দাসক জেল হাজোতলৈ প্ৰেৰণ কৰিছিল বুলি জানিবলৈ দিয়ে পৰিয়ালটোৱে ।
আনহাতে শুক্ৰবাৰে অপহৃত কিশোৰীগৰাকীৰ অভিভাৱকে নিজ সন্তানৰ কোনো শুংসূত্ৰ নাপাই ৰঙিয়া আৰক্ষীৰ কাষ চাপিছে । আৰক্ষীয়ে ঘটনা সন্দৰ্ভত তদন্ত আৰম্ভ কৰিছে বৰ্তমান পৰ্যন্ত লাভ কৰিবলৈ সক্ষম হোৱা নাই কিশোৰীগৰাকীৰ কোনো শুং সূত্ৰ ।
