ৰঙিয়া,18 মাৰ্চঃ কৰ’ণা ভাইৰাছে বিশ্বব্যাপী আতংক সৃষ্টি কৰাৰ সময়তে ৰে’ল বিভাগে ৰঙিয়া ষ্টেচনত যাত্ৰীৰ মাজত সজাগতা বৃদ্ধিৰ বাবে পৰ্যবেক্ষণৰ ব্যৱস্থা কৰিছে । বিশেষকৈ বহিঃৰাজ্যৰ পৰা অসমত প্ৰৱেশ কৰা ৰে’লযাত্ৰী সকলৰ শৰীৰৰ তাপমাত্ৰা জোখাৰ ব্যৱস্থা কৰিছে ষ্টেচন কৰ্তৃপক্ষই। কোনো যাত্ৰীৰ শৰীৰৰ তাপমাত্ৰা 98° ডিগ্ৰী ফাৰেণহাইটতকৈ বেছি হোৱাৰ লগতে কৰ’ণাৰ লক্ষণ স্পষ্ট হয়,তেন্তে ততালিকে চিকিৎসালয়লৈ নিয়াৰ ব্যৱস্থা কৰা হৈছে । এতিয়াৰে পৰা বহিঃৰাজ্যৰ প্ৰতিগৰাকী যাত্ৰীকে এনেদৰে বিশেষ যন্ত্ৰৰে ৰে’ল বিভাগৰ স্বাস্থ্যকৰ্মীৰ এটা দলে পৰীক্ষা কৰি আছে।
আনহাতে,ৰঙিয়া মহকুমা প্ৰশাসনৰ ফালৰ পৰা চিকিৎসক আৰু স্বাস্থ্যকৰ্মীৰ এটা দলে যাত্ৰীসকলৰ মাজত কৰ’ণা ভাইৰাছ সন্দৰ্ভত সজাগতা অভিযান চলাই থকা দেখা গৈছে । উল্লেখ্য যে,কৰ’ণা ভাইৰাছ সম্পৰ্কে উৰাবাতৰি বিয়পি পৰাৰ সময়তে ৰে’ল বিভাগ তথা স্থানীয় প্ৰশাসনে চেষ্টা অব্যাহত ৰাখিছে সজাগতা সৃষ্টি কৰাৰ ।
