নিউজ ডেস্ক, 13 অক্টোবৰঃ আজি দেশ তথা ৰাজ্যজুৰি পালন কৰা হয় ধনৰ অধিষ্ঠাত্ৰী দেৱী লক্ষ্মী পূজা ৷ সমান্তৰালকৈ কামৰূপ জিলাৰ ঐতিহ্যমণ্ডিত লক্ষ্মী শিলটো উলহ মালহেৰে পালন কৰা হয় মা লক্ষ্মী দেৱীৰ পূজা অৰ্চনা । প্ৰবাদ অনুসৰি ঐতিহ্যমণ্ডিত লক্ষ্মী শিলত নিজে নিজে শিলৰ ওপৰত গজে ধান গছ । শিলৰ ওপৰত গজা ধান গছ জোপা ভাল হ’লে ৰাজ্যত খাদ্য শস্য ভাল হয় আৰু শিলৰ ওপৰত গজা ধান গছ জোপা বেয়া হ'লে ৰাজ্যৰ কৃষিত কু-প্ৰভাৱ পৰে ৷ সেয়ে হাজাৰ হাজাৰ ভক্তই আজি পুৱাৰে পৰা ভিৰ কৰে মন্দিৰ প্ৰাংগণত । মা লক্ষ্মীক সন্তুষ্ট কৰাৰ বাবে ভক্ত সকলে আগবঢ়াই ধূপ চাকি নৈবদ্য ।
ইপিনে শিলচৰ আৰু মহানগৰীতো উলহ মালহেৰে পালন কৰা হয় লক্ষ্মী পূজা ৷ শিলচৰ চহৰৰ শ্বহীদ সুনীল সৰকাৰ লেনৰ বিমলা কুটিৰৰ লক্ষ্মী পূজা হৈছে চহৰখনৰ আকৰ্ষণৰ কেন্দ্ৰবিন্দু ৷ যোৱা 67 বছৰ ধৰি পালন কৰি অহা হৈছে লক্ষ্মী পূজাৰ লগতে নাৰায়ণৰ পূজা ৷
আনহাতে মহানগৰী 2 নং মঠঘৰীয়াস্থিত লক্ষ্মী মন্দিৰৰ সোণালী জয়ন্তী বৰ্ষ উপলক্ষে চাৰিদিনীয়া কাৰ্যসূচীৰে পালন কৰা হয় লক্ষ্মী পূজা ৷ তোৰণ উন্মোচন কৰাৰ লগতে বিগত 49 বছৰৰ 49 খন ধৰ্মাধ্বজা উত্তোলন কৰা হয় ৷ পূৱা এক সাংস্কৃতিক শোভাযাত্ৰাও বাহিৰ কৰা হয় । এই শুভাযাত্ৰাত অংশ লয় গুৱাহাটী লোকসভা সমষ্টিৰ সাংসদ কুইন উজাই । আন তিনিটা দিনত সংস্কৃতিক সন্ধিয়া, স্থানীয় শিল্পীৰ দ্বাৰা নাট, নাগাৰা নাম আদি প্ৰদৰ্শিত কৰা হ’ব ৷
ইপিনে সুৰুজ নগৰ স্থিত আনন্দ নগৰৰ লক্ষ্মী মন্দিৰ প্ৰাংগণত মা লক্ষ্মী পূজা উপলক্ষে কণ কণ শিশুবোৰৰ মাজত চিত্ৰাংকন আদিকে ধৰি নানান ধৰণৰ খেল-ধেমালি অনুষ্ঠিত কৰা হয় ৷ সন্ধিয়াৰ ভাগত দেৱী মা লক্ষ্মীৰ পূজা অৰ্চনা কৰা হয় ৷
