চাংসাৰি, 30 এপ্ৰিলঃ কৰ'ণাত আক্ৰান্ত হৈ দিল্লীত মৃত্যু হোৱা CRPF ৰ বিষয়া ইমাম হুছেইনৰ পাছতে শেহতীয়াকৈ পুনৰ কৰ'ণা ভাইৰাছত আক্ৰান্ত হৈছে দিল্লীত কৰ্মৰত কুমুদ কলিতা নামৰ এজন ৩৭ বছৰীয়া সেনা জোৱান । ময়ুৰ বিহাৰ ৩১ নং বেটেলিয়ানৰ চি আৰ পি এফ জোৱান কুমুদ কলিতা জালুকবাৰী সমষ্টিৰ চাংসাৰি থানাৰ অন্তৰ্গত আঠিয়াবৈ গাঁৱৰ নিবাসী ৷ বৰ্তমান দিল্লীৰ মাণ্ডলী জেইলৰ সন্মুখৰ পুলিছ বিল্ডিঙত কোৱাৰেন্টাইন কৰা হৈছে কুমুদ কলিতাক ।
আনহাতে, স্বামী কুমুদ কলিতা কৰ'ণাত আক্ৰান্ত হোৱা বুলি খবৰ পোৱাৰ পাছতে এতিয়া পাঁচমহীয়া অন্তঃসত্বা পত্নী তথা পৰিয়ালৰ লোকে সমষ্টিটোৰ বিধায়ক ড° হিমন্ত বিশ্ব শৰ্মাৰ লগতে মুখ্যমন্ত্ৰীক জোৱানজনক শীঘ্ৰে ৰাজ্যলৈ উভতাই আনি চিকিৎসাৰ ব্যৱস্থা কৰিবলৈ অনুৰোধ জনাইছে ৷ লগতে দিল্লীত থকা পৰ্যন্ত জোৱানজনৰ খাদ্যৰ লগতে স্বাস্থ্যৰ দিশটোত গুৰুত্ব দিবলৈয়ো কেন্দ্ৰ চৰকাৰক আহ্বান জনাই আত্নীয়ই।
