গুৱাহাটী, ৬ ছেপ্টেম্বৰ : ‘‘ৰাষ্ট্ৰীয় নাগৰিকপঞ্জীৰ পুনৰীক্ষণক লৈ মুখ্যমন্ত্ৰী সৰ্বানন্দ সোণোৱাল আৰু ৰাজ্য চৰকাৰে ৰাইজৰ মাজত বিভ্ৰান্তিৰ সৃষ্টি কৰিছে আৰু মিছা মাতিছে’’ । এই অভিযোগ উচ্চতম ন্যায়ালয়ৰ জ্যেষ্ঠ অধিবক্তা উপমন্যু হাজৰিকাৰ । এক ভিডিঅ' বাৰ্তাত দেওবাৰে হাজৰিকাই কয় যে, " চৰকাৰে কৈছে উচ্চতম ন্যায়ালয়ত এই বিষয়টো বিচাৰাধীন হৈ আছে । দ্বিতীয়তে NRC পুনৰীক্ষণৰ ক্ষমতা ৰাজ্য চৰকাৰৰ হাতত’’ ৷ কিন্তু বাংলাদেশী সুৰক্ষিত কৰিবলৈ উচ্চতম ন্যায়ালয়লৈ চৰকাৰে দায়িত্ব ঠেলি দিছে বুলি অভিযোগ উত্থাপন কৰে উপমন্যু হাজৰিকাই । ৪ ছেপ্টেম্বৰত ৰাজ্যিক বিজেপিৰ কাৰ্যনিৰ্বাহকত মুখ্যমন্ত্ৰী সৰ্বানন্দ সোণোৱালে ভাষণত উল্লেখ কৰিছে যে NRC ৰ পুনৰীক্ষণৰ আৱেদন উচ্চতম ন্যায়ালয়লত বিচাৰধীন হৈ আছে । একে সন্দৰ্ভত বিধান সভাত বিধায়ক শ্বেৰমান আলিৰ প্ৰশ্নৰ উত্তৰত মুখ্যমন্ত্ৰীৰ হৈ চন্দ্রমোহন পাটোৱাৰীয়ে জনায় যে উচ্চতম ন্যায়ালয়লত চৰকাৰে দাখিল কৰা পুনৰীক্ষণৰ আবেদন বিচাৰাধীন হৈ আছে । সদন আৰু ভাষণত কোৱা কথা সম্পূৰ্ণ মিছা বুলি কয় উচ্চতম ন্যায়ালয়ৰ অধিবক্তাগৰাকীয়ে ।
সদনত দিয়া উত্তৰত উল্লেখ কৰা হৈছে যে জুলাই ২০১৯ ত NRCৰ পুনৰীক্ষণৰ বাবে অসম চৰকাৰৰ ফালৰ পৰা ন্যায়ালয়ত শপতনামা দাখিল কৰা হৈছে । কিন্তু মুখ্যমন্ত্ৰীৰ ভাষণত বা সদনত উল্লেখ কৰা নহ’ল যে উচ্চতম ন্যায়ালয়ে পুনৰীক্ষণৰ দাবী নাকচ কৰিলে ২৩ জুলাই ২০১৯ ত । এই সন্দৰ্ভত প্ৰব্ৰজন বিৰোধী মঞ্চৰ ফালৰ পৰা প্ৰধান মন্ত্ৰী, গৃহমন্ত্ৰীক আবেদন জনোৱাত ২০১৯ ৰ ২ ডিচেম্বৰত গৃহ মন্ত্ৰণালয়ৰ ফালৰ পৰা দিয়া পত্ৰত দ্বিতীয় প্ৰেৰাগ্ৰাফত স্পষ্টভাৱে কোৱা হৈছে যে উচ্চতম ন্যায়ালয়ে কেন্দ্রীয় আৰু ৰাজ্যচৰকাৰৰ পুনৰীক্ষণৰ আবেদন নাকচ কৰিছে । প্ৰকৃতাৰ্থত চূড়ান্ত NRC প্ৰকাশ পোৱাৰ পাছত তাৰ পুনৰীক্ষণৰ ক্ষমতা কেন্দ্ৰীয় আৰু ৰাজ্য চৰকাৰৰ হাততে আছে ।
চূড়ান্ত NRCৰ ক্ষেত্ৰত নাগৰিকত্ব আইনৰ অন্তর্গত ঘোষণা কৰা ২০০৩ অধিনিয়মৰ ১০ নং দফাই পঞ্জীয়ন কৰ্তৃপক্ষক অধিকাৰ দিছে ,যি সকল ব্যক্তিয়ে ভুল বা মিছা তথ্য দি NRC ত নাম অন্তৰ্ভুক্ত কৰিছে, তেওঁলোকৰ নাম কৰ্তন কৰিব পাৰে । আইন অনুসাৰে চূড়ান্ত NRC পুনৰীক্ষণৰ ক্ষমতা স্বয়ং চৰকাৰৰ আছে । তাৰ বাবে উচ্চতম ন্যায়ালয়লত আবেদন কৰাৰ প্ৰয়োজন নাই । যি সময়ত কেন্দ্ৰীয় আৰু ৰাজ্য চৰকাৰে উচ্চতম ন্যায়ালয়লত আবেদন কৰিছিল সেই সময় আছিল জুলাই ২০১৯ । যি আবেদন নাকচ হ’ল সেয়া আছিল NRCৰ খচৰাৰ ক্ষেত্ৰত । ৩১ আগষ্ট ২০১৯ ত চূড়ান্ত NRC প্ৰকাশ হ’ল আৰু সেই চূড়ান্ত NRC পুনৰীক্ষণৰ বাবে ২০০৩ অধিনিয়মে ক্ষমতা প্ৰদান কৰিছে পঞ্জীয়ক কৰ্তৃপক্ষক অৰ্থাৎ চৰকাৰক ।
প্ৰব্ৰজন বিৰোধী মঞ্চৰ ফালৰ পৰা এই বিষয় সমূহ আৰু আইনী স্থিতি উল্লেখ কৰি প্ৰধান মন্ত্ৰী নৰেন্দ্ৰ মোদী, গৃহ মন্ত্ৰী অমিত শ্বাহ, মুখ্যমন্ত্ৰী সৰ্বানন্দ সোণোৱালক দিয়া হৈছে । কিন্তু সোণোৱালৰ পৰা উত্তৰতো নাহিলেই বৰঞ্চ তেওঁ আৰু তেওঁৰ চৰকাৰে ৰাইজৰ মাজত মিছা কথা কৈ বিভ্ৰান্তিৰহে সৃষ্টি কৰিছে বুলি অভিযোগ তুলিছে অধিবক্তাজনে । UPA চৰকাৰে ২০০৪ চনতে অসমত ৫০ লাখ বাংলাদেশী আছে বুলি সংসদত তথ্য দিছিলে । ২০১৬ চনত নৱেম্বৰ মাহত বৰ্তমান বিজেপি চৰকাৰে সংসদত দিয়া তথ্যত ৮০ লাখ বৃদ্ধি পালে । কিন্তু NRC ত মুঠতে বাদ পৰিলে ১৯ লাখ । অসমত থকা বাংলাদেশীয়ে ২০৪০ চনৰ ভিতৰত খিলঞ্জীয়াক সংখ্যলঘু কৰিব বুলি মন্তব্য কৰে উপমন্যু হাজৰিকাই ৷
লগতে পঢ়ক : কিহৰ বাবে বাৰে বাৰে ভাঙোনমুখী হয় অগপ ! কেৰোণ ক’ত ?
