গুৱাহাটী,২২ আগষ্টঃ অব্যাহত আছে শাসক-বিৰোধীৰ আক্ৰমণ আৰু প্ৰত্যাক্ৰমণ । এইবাৰ ৰাজ্যিক বিজেপিৰ মহিলা মৰ্চাক উভতি ধৰিলে প্ৰদেশ মহিলা কংগ্ৰেছে । উল্লেখ্য যে বিজেপি নেত্রী ইন্দ্ৰাণী তহবিলদাৰৰ আত্মহত্যাৰ ঘটনাৰ পাছতে বিজেপিত নাৰীৰ সুৰক্ষাক লৈ প্ৰদেশ কংগ্ৰেছ তথা প্ৰদেশ মহিলা কংগ্ৰেছে প্ৰশ্ন উত্থাপন কৰিছিল । ইয়াৰ পাছতে ৰাজ্যিক বিজেপিৰ একাংশ মহিলা নেত্রীয়ে সংবাদমেল সম্বোধন কৰি কংগ্ৰেছক আক্ৰমণৰ লক্ষ্য কৰি লৈছিল । বিজেপিৰ মহিলা নেত্রীৰ আক্ৰমণৰ প্ৰত্যুত্তৰত মঙলবাৰে প্ৰদেশ মহিলা কংগ্ৰেছৰ সভানেত্রী মীৰা বৰঠাকুৰ গোস্বামীয়ে গুৱাহাটীৰ ৰাজীৱ ভৱনত এখন সংবাদমেল সম্বোধন কৰে ।
তেওঁ কয় যে বিজেপি নেত্রীয়ে ইন্দ্ৰাণী তহবিলদাৰৰ মৃত্যুৰ ঘটনাটোক আমি উদযাপন কৰা বুলি অত্যন্ত দুৰ্ভাগ্যজনক মন্তব্য কৰিছে । এগৰাকী মহিলাৰ আত্মহত্যাৰ কথা কেতিয়াও চেলিব্ৰেচন হ'ব নোৱাৰে । এই ঘটনাক লৈ বোকা ছটিওৱাৰ ৰাজনীতি কৰাটো সমীচিন নহয় বুলি সদৰী কৰি তেওঁ কয় যে নাৰীৰ সুৰক্ষাৰ প্ৰসংগত দলৰ কথা নাহে । মহিলাৰ সমস্যাৰ ক্ষেত্রত মাত মাতি যাম বুলি সদৰী কৰি তেওঁ কয় যে মহিলা বিপদত পৰা সময়ত দলৰ উৰ্দ্ধত গৈ মহিলাসকলে মাত মতা উচিত । ইয়াত কোনো দলৰ কথা নাই ।
তেওঁ লগতে কয় যে কংগ্ৰেছত কাম কৰা মহিলাই যোগ্য সন্মান লাভ কৰিছে আৰু কংগ্ৰেছত মহিলাসকল সুৰক্ষিত । ঘটনা এটা হ'লে গাপ দিয়াৰ বিপৰীতে তদন্তৰ ব্যৱস্থা কৰিব লাগে বুলি তেওঁ কয় । সংবাদমেলত প্ৰদেশ মহিলা কংগ্ৰেছৰ কেইবাগৰাকী নেত্রী উপস্থিত থাকে ।
