গুৱাহাটী, 23 জুলাই : আৰম্ভ হৈছে টকিঅ’ অলিম্পিক 2020 (Tokyo Olympics 2020) ৷ শুকুৰবাৰে বিয়লি ভাগত অনুষ্ঠিত হয় টকিঅ’ অলিম্পিকৰ উদ্বোধনী অনুষ্ঠান (Opening Ceremony) । ক’ভিড (Covid) পৰিস্থিতিৰ বাবে এইবাৰ জাকজমকতাহীনভাৱেই আয়োজন কৰা হয় উদ্বোধনী অনুষ্ঠান । টকিঅ’ অলিম্পিকৰ উদ্বোধনী অনুষ্ঠানৰ লগত সংগতি ৰাখি গুৱাহাটীৰ দেশভক্ত তৰুণ ৰাম ফুকন ইন্দোৰ ষ্টেডিয়াম (Tarun Ram Phukan Indore Stadium)ত এক বিশেষ অনুষ্ঠানৰ আয়োজন কৰা হয় ।
ৰাজ্যৰ ক্ৰীড়া বিভাগৰ উদ্যোগত আয়োজিত এই অনুষ্ঠানটোত ভালেসংখ্যক বিশিষ্ট ব্যক্তি আৰু ক্ৰীড়াবিদে অংশ গ্ৰহণ কৰে । উক্ত অনুষ্ঠানত টকিঅ’ অলিম্পিকৰ উদ্বোধনী অনুষ্ঠানৰ পোনপটীয়া সম্প্ৰচাৰ ডাঙৰ স্ক্ৰীণত প্ৰদৰ্শনৰ ব্যৱস্থা কৰা হয় । টকিঅ’ অলিম্পিকত এইবাৰ বিশেষভাৱে অসমবাসীৰ দৃষ্টি নিক্ষেপ হৈ আছে । কিয়নো বক্সিঙত ভাৰতক প্ৰতিনিধিত্ব কৰিছে অসম সন্তান লাভলীনা বৰগোহাঁই (Lovlina Borgohain)এ ৷
উক্ত অনুষ্ঠানত অংশ গ্ৰহণ কৰে ধিং এক্সপ্ৰেছ হিমা দাস (Hima Das) এ নিজৰ মনোভাৱ প্ৰকাশ কৰি লাভলীনাই অসম তথা ভাৰতবৰ্ষলৈ গৌৰৱ কঢ়িয়াই আনিব বুলি মন্তব্য কৰে ৷ সংবাদ মাধ্যমৰ আগত দৌৰবিদ হিমা দাসে কয় যে, লাভলীনা বৰগোহাঁইয়ে অসম তথা ভাৰতবৰ্ষলৈ গৌৰৱ কঢ়িয়াই আনিব আৰু এক নতুন ইতিহাস ৰচনা কৰিব । অনুষ্ঠানত অংশগ্ৰহণ কৰি ক্ৰীড়া আয়ুক্ত মলয় বৰুৱাই কয় যে, উদীয়মান খেলুৱৈসকলক অনুপ্ৰাণিত কৰিবৰ বাবে এই অনুষ্ঠানটোৰ আয়োজন কৰা হৈছে ।
উল্লেখ্য যে, 24 জুলাইত টকিঅ’ অলিম্পিকত অনুষ্ঠিত হ’বলগীয়া বক্সিং (Boxing) খেলৰ প্ৰথম ৰাউণ্ডৰ খেলত বৃহস্পতিবাৰে বিনা প্ৰতিদ্বন্দ্বিতাৰে জয়লাভ কৰিছে অসম কন্যা লাভলীনা বৰগোঁহাই(Lovlina Borgohain)য়ে ৷ প্ৰি-কোৱাৰ্টাৰ ফাইনেলত লাভলীনাৰ বিপৰীতে ৰিঙত অৱতীৰ্ণ হ’ব জাৰ্মানীৰ বক্সাৰ নাদীন এপেজ (Nadeen Apage) ৷ 27 জুলাইত অনুষ্ঠিত হ’ব প্ৰি-কোৱাৰ্টাৰ ফাইনেল মেচ ৷
লগতে পঢ়ক : Tokyo Olympics : প্ৰি-কোৱাৰ্টাৰ ফাইনেললৈ উন্নীত লাভলীনা
