আজাৰা, ৯ মাৰ্চ: অসমৰ ক্ৰীড়াক্ষেত্ৰ ক্ৰমান্নয়ে নতুন অধ্যায়ৰ সূচনা কৰাৰ দিশত আগবাঢ়িছে । হিমা দাসৰ দৰে আন্তৰাষ্ট্ৰীয় খ্যাতিসম্পন্ন খেলুৱৈয়ে অসমৰ নাম জিলিকোৱাৰ পাছত এইবাৰ এক নতুন সুখবৰ পোহৰলৈ আহিছে । এইবাৰ পৰ্টুগাললৈ ফুটবলৰ প্ৰশিক্ষণৰ বাবে নিৰ্বাচিত হৈছে নগাঁও জিলাৰ হয়বৰগাঁও বৰভেটি নাথগাঁৱৰ ভৱেন্দ্ৰ নাথৰ পুত্ৰ বাকদ্বীপ নাথ । বাকদ্বীপে এই প্ৰশিক্ষণ সম্পূৰ্ণ কৰাৰ পিছতে ১৫ বছৰ অনুৰ্ধ এছিয়া ফুটবল ক্লাবত খেলিবলৈ সুযোগ লাভ কৰিব ।
সৰুৰে পৰা ফুটবল খেলি ভাল পোৱা বাকদ্বীপক দেউতাক ভৱেন্দ্ৰ নাথে প্ৰশিক্ষনৰ বাবে কলিকতাৰ এটা প্ৰশিক্ষণ শিবিৰত নাম ভৰ্তি কৰাই দিছিল । নিজৰ প্ৰতিভাৰে চমক দেখুৱাবলৈ সক্ষম হোৱা বাকদ্বীপক একাডেমিয়ে পৰ্টুগাললৈ প্ৰশিক্ষণ ল'বলৈ অসমৰ পৰা নিৰ্বাচিত কৰে । কিন্তু এইক্ষেত্ৰত বাধা হিচাপে থিয় দিছে আৰ্থিক অনাটন । ক্ৰীড়াবিভাগৰ পৰা সহায় লাভ কৰাৰ আশা প্ৰকাশ কৰিছে বাকদ্বীপৰ পৰিয়ালে ।
