গুৱাহাটী, ২১ ছেপ্টেম্বৰ: কৃষিপ্ৰধান ৰাজ্যখনত কৃষকৰ আয় দুগুণ কৰাৰ বাবে ৰাজ্য চৰকাৰে লক্ষ্য নিৰ্ধাৰণ কৰিছে যদিও বাস্তৱত ইয়াক ফলপ্ৰসু কৰাৰ বাবে কোনো ধৰণৰ উদ্যোগ গ্ৰহণ কৰা নাই । কৃষিখণ্ডৰ উত্তৰণৰ বাবে আন্তঃগাঁঠনি নিৰ্মাণত গুৰুত্ব দিয়া নাই চৰকাৰখনে । তাৰেই অন্যতম উদাহৰণ হৈছে জলসিঞ্চন ব্যৱস্থা ।
কৃষিপ্রধান ৰাজ্য এখনত জলসিঞ্চনৰ গুৰুত্ব অপৰিসীম যদিও ৰাজ্যৰ কৃষকক পর্যাপ্ত জলসিঞ্চনৰ সুবিধা আগবঢ়োৱাত চৰম ব্যৰ্থ হৈছে ৰাজ্যৰ জলসিঞ্চন বিভাগ । আনকি এই কথা শেহতীয়াকৈ অনুষ্ঠিত হৈ যোৱা অসম বিধানসভাৰ শৰৎকালীন অধিৱেশনতো উন্মোচিত হৈছে ।
চৰকাৰী তথ্য মতে ৰাজ্যৰ মুঠ ৩৮.৮৮ লাখ হেক্টৰ কৃষিভূমিৰ ভিতৰত মাত্র ১৪ শতাংশ কৃষিভূমিতহে জলসিঞ্চন বিভাগৰ আঁচনিৰ দ্বাৰা বৰ্তমান জলসিঞ্চনৰ ব্যৱস্থা আছে । জলসিঞ্চন বিভাগৰ অন্তৰ্গত মুঠ ৩৯১৩ প্রকল্প তথা আঁচনিৰ ভিতৰত বৰ্তমান সময়তো বিকল হৈ আছে ১৫৮৫ খন আঁচনি ।
লক্ষণীয় বিষয় যে, বিগত দুবছৰে কেনেকৈ আঁচনিসমূহ বিকল হ'ল তাৰ পৰ্যালোচনা কৰি ৪২০ টা জলসিঞ্চন প্রকল্প ২৪ কোটি টকা ব্যয় কৰি ভাল কৰা হৈছে । চৰকাৰে ৰাজ্যৰ ১০০ শতাংশ কৃষিভূমিত জলসিঞ্চন কৰিব বুলি প্রতিশ্রুতি দিছিল যদিও এইপর্যন্ত মাত্র ১৪ শতাংশ কৃষিভূমিতহে জলসিঞ্চনৰ ব্যৱস্থা কৰিব পাৰিছে । চৰকাৰী তথ্য মতে বর্তমান জলসিঞ্চন বিভাগৰ অধীনত ৰূপায়ণ কৰি থকা আঁচনিসমূহ হৈছে বোৱঁতী জলসিঞ্চন প্রকল্প, বৈদ্যুতিক উত্তোলক জলসিঞ্চন প্রকল্প, গভীৰ নলী-নাদ প্রকল্প, মধ্য গভীৰ নলী-নাদ প্ৰকল্প আৰু অগভীৰ নলী-নাদ প্রকল্প ।
উল্লেখ্য যে, জলসিঞ্চন ব্যৱস্থাৰ নামত প্ৰত্যেক বছৰে পুঁজি ব্যয় কৰি অহা হৈছে যদিও কৃষক ৰাইজ উপকৃত হোৱা নাই । বিগত তিনি বছৰত জলসিঞ্চন বিভাগলৈ মঞ্জুৰ কৰা মুঠ ধনৰ পৰিমাণ হৈছে ৩,৬৮,৭৩৬.৯৩ লাখ টকা । ইয়াৰ ভিতৰত ২০২১-২২ বিত্তীয় বৰ্ষত ১,৪০,২৩৯.৩২ লাখ টকা, ২০২২-২৩ বিত্তীয় বৰ্ষত ১,২৫,১৭৭.২৯ লাখ টকা আৰু ২০২৩-২৪ বিত্তীয় বৰ্ষত ১,০৩,৩২০.৩২ লাখ টকাৰ মঞ্জুৰ কৰা হয় ।
ইফালে জলসিঞ্চনৰ সুব্যৱস্থা নথকাৰ বাবেই ৰাজ্যৰ কৃষক ৰাইজে বতৰৰ ওপৰতে নিৰ্ভৰ কৰি কৃষিকাৰ্য কৰিবলগীয়া হয় । ইফালে জলসিঞ্চনৰ আঁচনিসমূহ কাৰ্যক্ষম কৰি তোলাৰ ক্ষেত্রতো কোনো ধৰণৰ উদ্যোগ গ্ৰহণ কৰা পৰিলক্ষিত হোৱা নাই । বিভাগীয় গাফিলতিৰ বাবেই ৰাজ্যৰ ১৫৮৫ খন জলসিঞ্চন আঁচনিয়েই বন্ধ হৈ আছে ।
মুখ্যমন্ত্রী হিমন্ত বিশ্ব শৰ্মাৰ নেতৃত্বত চৰকাৰ গঠন হোৱাৰ পাছত জলসিঞ্চনৰ বিকল আঁচনিসমূহ কার্যক্ষম কৰি তােলাৰ বাবে বিভাগে বিশেষ কোনো পদক্ষেপ গ্রহণ কৰা নাই । নতুন চৰকাৰ শাসনলৈ অহাৰ পাছত কেৱল জলসিঞ্চনৰ কার্যালয় সমূহৰহে পুনৰ গঠন প্রক্রিয়া চলি আছে । বিধানসভাৰ সমষ্টিভিত্তিত জলসিঞ্চনৰ এটাকৈ কার্যালয় স্থাপন কৰা প্রক্রিয়া চলি আছে ।
বিগত বাজেটত বিভাগটোৰ আঁচনিৰ ৰূপায়ণ আৰু মেৰামতিৰ বাবে পর্যাপ্ত পৰিমাণৰ পুঁজি ধার্য কৰা নাছিল । যাৰ পৰিপ্ৰেক্ষিতত কেন্দ্রীয় চৰকাৰৰ আঁচনিৰ ওপৰত নিৰ্ভৰ কৰি ৰাজ্যৰ জলসিঞ্চন বিভাগ চলি আছে । এনে প্রেক্ষাপটত এতিয়া ৰাজ্য চৰকাৰৰ পুঁজিৰে জলসিঞ্চনৰ নতুন আঁচনি নির্মাণ কৰা বা বিকল আঁচনি মেৰামতি কৰা কাৰ্য অসম্ভৱ হৈ পৰিছে ।
বিভাগীয় সূত্রই সদৰী কৰা অনুসৰি প্রধানমন্ত্রী কৃষি সিঁচাই যােজনাৰ বাহিৰে আন জলসিঞ্চনৰ আন আঁচনিৰ নামত পুঁজি আৱন্টন হােৱা নাই । যাৰ বাবে মেৰামতিৰ অভাৱত ইখনৰ পাছত সিখনকৈ আঁচনি বন্ধ হৈ পৰিছে ।
