হোজাই,26 মাৰ্চ: শনিবাৰে ৰাজ্যত অনুষ্ঠিত হ'ব প্ৰথম পৰ্যায়ৰ নিৰ্বাচন ৷ প্ৰথম পৰ্যায়ৰ নিৰ্বাচনৰ বাবে নিৰ্বাচনী প্ৰচাৰ ইতিমধ্যে অন্ত পৰাৰ সমান্তৰালকৈ দ্বিতীয় পৰ্যায়ৰ নিৰ্বাচনলৈ ৰাজনৈতিক দলসমূহে প্ৰস্তুতি চলাইছে ৷ ইয়াৰ মাজতে নিকা আৰু স্বচ্ছ নিৰ্বাচন অনুষ্ঠিত কৰাৰ স্বাৰ্থত হোজাই জিলা প্ৰশাসনে বিশেষ তৎপৰতা অৱলম্বন কৰা দেখিবলৈ পোৱা গৈছে ৷
জানিব পৰা মতে, হোজাই জিলাৰ অন্তৰ্গত যমুনামুখ, হোজাই আৰু লামডিং সমষ্টিৰ বাবে অহা ইভিএম সমূহৰ ইতিমধ্যে প্ৰথম পৰ্যায়ৰ পৰীক্ষা সম্পন্ন কৰি দ্বিতীয় পৰ্যায়ৰ ৰেণ্ডাৰিং সমাপ্ত কৰা হৈছে ৷ তিনিওটা সমষ্টিৰ ভোটগ্ৰহনলৈ যাব লগা ইভিএম সমূহো কাউন্সেলিং আৰু চীল কৰাৰ কামো প্ৰায় সমাপ্ত হোৱাৰ পথত ৷
ইতিমধ্যে ভোটগ্ৰহন কৰাৰ বাবে নিয়োজিত পুলিং, প্ৰিজাইডিং বিষয়া সকলকো দুবাৰকৈ প্ৰশিক্ষণ দিয়া হৈছে ৷ নিৰ্বাচনৰ যাৱতীয় কোষ সমূহ গঠন কৰাৰ পাছতে কোষ সমূহত নিয়োজিত বিষয়া কৰ্মচাৰী সকলেও নিজৰ নিজৰ কাম সমূহ কৰি গৈছে ৷ হোজাই জিলাৰ উপাযুক্ত ড৹ সাদনেক সিঙে জানিবলৈ দিয়া মতে, নিৰ্বাচনত ব্যৱহৃত হ'ব লগীয়া যান বাহন সমূহ প্ৰথম পৰ্যায়ৰ নিৰ্বাচন শেষ হোৱাৰ পাছত কাষতে থকা গোলাঘাট আৰু শোণিতপুৰ জিলাৰ পৰা অনা হ'ব ৷
