গোৱালপাৰা, 8 ডিচেম্বৰ : গোৱালপাৰা জিলাত তীব্ৰ ৰূপ ধাৰণ কৰিছে হাতী-মানুহৰ সংঘাতে ৷ বনৰীয়া হাতীৰ উপদ্ৰৱে দুৰ্বিসহ কৰি তুলিছে গ্ৰামাঞ্চলৰ জনজীৱন ৷ বুধবাৰে পুৱা ৰংজুলি থানাৰ অন্তৰ্গত কুশধোৱা দেউলগুৰিত বন্যহস্তীৰ আক্ৰমণত নিহত হয় দুগৰাকী লোক ৷
মৃত লোক দুগৰাকী ক্ৰমে যামিনী মোহন খাখলাৰী (৫২) আৰু মোহিনী মোহন বসুমতাৰী (২৮) বুলি চিনাক্ত কৰা হৈছে ৷ বুধবাৰে পুৱা পথাৰলৈ ধান চাবলৈ বুলি যাওতেই বনৰীয়া হাতীয়ে খেদি খেদি হত্যা কৰে দুয়োগৰাকী লোকক ৷
সম্প্ৰতি অঞ্চলটোত বিচৰণ কৰি আছে এটা বনৰীয়া হাতীৰ জাকে ৷ মূল জাকৰ পৰা ফালৰি কাটি যোৱা দুটা হাতীয়ে কৰে লোক দুগৰাকীক ৷ যাৰ বাবে থিতাতে নিহত হয় দুয়োগৰাকী ৷ গাঁৱখনত এতিয়াও অব্যাহত আছে তীব্ৰ আতংক ৷
এই ঘটনাৰ খবৰ লাভ কৰা মাত্ৰকে ঘটনাস্থলীত উপস্থিত বন বিভাগ আৰু আৰক্ষীৰ এটা দল ৷ আৰক্ষীয়ে মৃতদেহ দুটা উদ্ধাৰ কৰি মৰণোত্তৰ পৰীক্ষাৰ ব্যৱস্থা কৰে ৷ ৰংজুলিৰ আঞ্চলিক বন বিষয়াৰ নেতৃত্বত হাতীজাক নিয়ন্ত্ৰণৰ চেষ্টা অব্যাহত ৰখা হৈছে যদিও এই পৰ্যন্ত লাভ কৰা নাই কোনো সুফল ৷ হাতীৰ জাকটোৱে গাঁৱখনৰ কেইবাটাও পৰিয়ালৰ ঘৰ-দুৱাৰ ভাঙি লণ্ড-ভণ্ড কৰে ৷
লগতে চাওক: Man elephant conflict : সোণাৰিৰ অসম নাগালেণ্ড সীমান্তত বন্যহস্তীৰ তাণ্ডৱ
