টিংখাং,১২ আগষ্ট : স্বাধীনতা দিৱসলৈ (Independence day) মাজত মাত্ৰ দুটা দিন বাকী ৷ ৭৫ সংখ্যক স্বাধীনতা দিৱস উদযাপনক কেন্দ্ৰ কৰি চৌদিশে চলিছে এতিয়া ব্যাপক প্ৰস্তুতি । ঠায়ে ঠায়ে স্বাধীনতা দিৱস উদযাপনৰ বাবে প্ৰস্তুতি চলিছে । ৰাজ্যৰ চাৰিওফালে কটকটীয়া নিৰাপত্তা বেষ্টনীও গঢ়ি তোলা হৈছে ।
বজাৰতো দেখা গৈছে স্বাধীনতা দিৱসৰ প্ৰভাৱ । জাতীয় পতাকা (National flag) আৰু বিভিন্ন ধৰণৰ সামগ্ৰীৰে বজাৰ ভৰিছে । পিছে ইয়াৰ মাজতে ডিব্ৰুগড় জিলাৰ টিংখাঙৰ এগৰাকী শিল্পীয়ে সকলোৰে দৃষ্টি আকৰ্ষণ কৰিছে ।
টিংখাঙৰ শালমাৰি দীঘলীয়াৰ দেৱজিৎ চেতিয়াই বাঁহেৰে নিৰ্মাণ কৰি আহিছে বিভিন্ন সামগ্ৰী । কিন্তু স্বাধীনতা দিৱসৰ লগত সংগতি ৰাখি দেৱজিৎ চেতিয়াই বাঁহ, বেত আৰু কাঠেৰে প্ৰস্তুত কৰিছে ৰাষ্ট্ৰীয় পতাকা । স্বাধীনতা দিৱসৰ প্ৰাকক্ষণত ইতিমধ্যে বাঁহ শিল্পৰে (Bamboo industry) জড়িত শিল্পীগৰাকীয়ে বিক্ৰী কৰিছে এনেধৰণৰ বহু পতাকা ।
বাঁহ, বেতৰ শিল্পকৰ্মৰে স্বাৱলম্বীতাৰ নিদৰ্শন দাঙি ধৰা দেৱজিৎ বিগত ১০ বছৰে বাঁহ বেতৰ শিল্পকৰ্মৰ সৈতে জড়িত হৈ আছে । পেলনীয়া সামগ্ৰীৰ পৰা বিভিন্ন আটকধুনীয়া সামগ্রীও প্ৰস্তুত কৰে শিল্পীগৰাকীয়ে । শিল্পীগৰাকীৰ যাদুকৰী হাতত প্ৰাণ পাই উঠিছে বাঁহ আৰু কাঠৰ বিভিন্ন জীৱ জন্তু ।
ইতিমধ্যে বাঁহ,কাঠ আৰু বেতেৰে সাজি উলিয়াইছে চকী, টেবুল, বিচনা, কাপ, ট্ৰে ,শৰাই ইত্যাদি । দেৱজিতে ইতিমধ্যে অসমৰ বিভিন্ন ঠাইৰ প্ৰদৰ্শনী (Exhibition) সমূহতো অংশগ্ৰহণ কৰি যথেষ্ট সমাদৰ লাভ কৰিছে । অৱশ্যে তেওঁ নিৰ্মাণ কৰা সেই সকলোবোৰ সামগ্ৰীৰ ভিতৰত এতিয়া ব্যতিক্ৰম হৈছে এই ৰাষ্ট্ৰীয় পতাকা ।
লগতে পঢ়ক : গাঁঁওবুঢ়াৰ নিযুক্তিক লৈ তিনিচুকীয়াত প্ৰতিবাদ
