ডিব্ৰুগড় বিশ্ববিদ্যালয়ত উত্তপ্ত পৰিস্থিতি, কন্দোৱা গেছ,লাঠি লৈ সস্তম আৰক্ষী

ডিব্ৰুগড়, 10 ছেপ্টেম্বৰ: বিশ্ববিদ্যালয়ৰ ছাত্ৰ একতা সভাৰ মনোনয়ন দাখিল তথা নিৰ্বাচনী বিষয়াৰ পদত্যাগৰ কথা চলি থকাৰ মাজতে পুনৰ নিৰ্বাচন কেন্দ্ৰীক মাৰপিটৰ ঘটনাই জোঁকাৰি গৈছে ডিব্ৰুগড় বিশ্ববিদ্যালয় ৷ এইবাৰ বিশ্ববিদ্যালয়ৰ নিৰ্বাচনত সভাপতি পদত প্ৰাৰ্থীত্ব আগবঢ়োৱা আছু সমৰ্থিত প্ৰাৰ্থীক অখিল ভাৰতীয় বিদ্যাৰ্থী পৰিষদৰ নেতাই বিশ্ববিদ্যালয়ৰ প্ৰৱেশদ্বাৰ জ্যোতি বাটচ'ৰাৰ সন্মুখত ভয়-ভাবুকিৰ লগতে আক্ৰমণ কৰাৰ গুৰুত্বৰ অভিযোগ । ঘটনা সন্দৰ্ভত দাখিল কৰা হয় এজাহাৰ ৷ সোমবাৰে সন্ধিয়া সংঘটিত এই ঘটনাৰ পাচতে মাজনিশালৈকে উত্তপ্ত হয় বিশ্ববিদ্যালয়ৰ পৰিস্থিতি ৷

আনহাতে, নিৰ্বাচনৰ দিন চমু চাপি অহাৰ লগে লগে আছু আৰু অন্যান্য দলসমূহৰ মাজত সংঘাত বৃদ্ধি পোৱা পৰিলক্ষিত হৈছে ৷ সোমবাৰে সন্ধিয়া এবিভিপিৰ কেইজনমান সদস্যই আছুৰ সমৰ্থিত প্ৰাৰ্থীজনক মাৰধৰ কৰাৰ লগতে টকাৰ প্ৰলোভনেৰে নিৰ্বাচনৰ প্ৰাৰ্থী ক্ৰয় কৰিবলৈ অহাৰো অভিযোগ উঠিছে এবিভিপিৰ বিৰুদ্ধে ৷ এনে ঘটনাৰ বাবেই সৃষ্টি হয় বিশ্ববিদ্যালয় আছু গোট আৰু এবিভিপিৰ মাজত সংঘাত ৷

এই ঘটনাৰ সমান্তৰালকৈ বিশ্ববিদ্যালয়ৰ চৌহদত ৰাজনৈতিক প্ৰভাৱ বিস্তাৰ হ'ব নিদিওঁ বুলি দাবী কৰি প্ৰতিবাদ অব্যাহত ৰাখিছিল বিশ্ববিদ্যালয়ৰ আছু গোটে । দেওবাৰৰ সংঘাতৰ চি চি টিভি ফুটেজ বিচাৰি নিশা বিশ্ববিদ্যালয়ৰ জ্যোতি বাটচ'ৰালৈ ওলাই আহে বিশ্ববিদ্যালয়ৰ স্নাতকোত্তৰ ছাত্ৰ একটা সভাৰ(PGSU) একাংশ সদস্যৰ লগতে বিষয়ববীয়া । কিন্তু ঘটনা সন্দৰ্ভত আৰক্ষীক গোচৰ দিয়াৰ বাবেই আৰক্ষী উপস্থিত হৈ তদন্তৰ বাবে ফুটেজ সমূহ জব্দ কৰাৰ লগতে PGSUক সেই ফুটেজ দেখুওৱাবলৈ অমান্তি হয় আৰক্ষী ৷ ইয়াকে লৈ পুনৰ উত্তপ্ত হৈ পৰে বিশ্ববিদ্যালয় চৌহদ ৷ অন্যহাতে, এবিভিপি সমৰ্থিত এজন যুৱকে বিশ্ববিদ্যালয়ত ভগ্নীৰ নামভৰ্তিৰ বাবে অহাৰ সময়তে আছুৰ একাংশই আক্ৰমণ কৰা বুলি কোৱা এক ভিডিঅও ভাইৰেল হৈছে চচিয়েল মিডিয়াত ৷ মাজনিশা লৈকে নজীৰবিহীন ভাৱে এনেধৰণৰ নিৰ্বাচন কেন্দ্ৰীক সংঘাতৰ ঘটনাই বিশ্ববিদ্যালয়ৰ বিদ্যৎ মহলক গভীৰ প্ৰভাৱ পেলোৱাৰ লগতে এইয়া শিক্ষানুষ্ঠানৰ গৰিমাত যে আঘাত সানিছে সেই কথা অতি স্পষ্ট কৈ পৰিস্ফুট হৈছে ।