মৰাণ, 12 ছেপ্তেম্বৰ : থাওৰা সমষ্টিৰ উপ-নিৰ্বাচনক লৈ শাসক দলৰ সমান্তৰালকৈ ৰাইজৰ দলেও উজনি অসমৰ থাওৰা সমষ্টিত নিৰ্বাচনী কুছকাৱাজ আৰম্ভ কৰিছে । ৰাইজৰ দলৰ সভাপতি অখিল গগৈয়ে কংগ্ৰেছৰ সৈতে মিত্ৰতা স্থাপনেৰে উপ-নিৰ্বাচন খেলাৰ বাবে চেষ্টা চলাইছিল যদিও মিত্ৰতাত ব্যৰ্থ হোৱাত ৰাইজৰ দলে অকলেই উপ নিৰ্বাচন খেলাৰ বাবে প্ৰস্তুতি আৰম্ভ কৰিছে ।
থাওৰা সমষ্টিত অখিল গগৈয়ে নিজেই গাঁৱে-গাঁৱে ঘুৰি ৰাইজৰ দলৰ সাংগঠনিক ভেটি শক্তিশালী কৰিবৰ বাবে চেষ্টা চলাইছে । ৰাজ্যৰ উপ-নিৰ্বাচন হ'ব লগা ছটাকৈ সমষ্টিত ৰাইজৰ দলে প্ৰতিদ্বন্দিতা নকৰিলেও থাওৰাত প্ৰতিদ্বন্দিতা কৰাতো প্ৰায় নিশ্চিত কৰিছে ৰাইজৰ দলৰ সভাপতি অখিল গগৈয়ে ।
লগতে নিশ্চিত হৈছে থাওৰাৰ পৰা নিৰ্বাচনী যুঁজত নামিব কৃষক মুক্তি সংগ্ৰাম সমিতিৰ সাধাৰণ সম্পাদক ধৈৰ্য কোঁৱৰ, সেই কথাটো প্ৰায় নিশ্চিত হৈছে ।
কিয়নো অখিল গগৈয়ে থাওৰা সমষ্টিৰ গাঁৱে-গাঁৱে সভা অনুষ্ঠিত কৰি ধৈৰ্য কোঁৱৰক ভোট দিবৰ কাৰণে আহ্বান জনোৱাৰ লগতে 11 ছেপ্তেম্বৰ তাৰিখে ধৈৰ্য কোঁৱৰে কৃষক মুক্তি সংগ্ৰাম সমিতিৰ সাধাৰণ সম্পাদকৰ পদ ত্যাগ কৰিছে ।
এই কথাই নিশ্চিত কৰিছে থাওৰাত ৰাইজৰ দলৰ হৈ এঘড়ী যুঁজিবলৈ সাজু হৈছে ধৈৰ্য কোঁৱৰ । কিন্তু ইয়াৰ বিপৰীতে কংগ্ৰেছ আৰু শাসক দল বিজেপিয়ে থাওৰা সমষ্টিত প্ৰাৰ্থিত্বৰ ক্ষেত্ৰত কোনোধৰণৰ ঘোষণা কৰা নাই যদিও দলৰ ভেটি শক্তিশালী কৰিবলৈ চেষ্টা অব্যাহত ৰাখিছে ।
লগতে পঢ়কঃ অস্ত্ৰধাৰী সংগঠন শেষ নোহোৱালৈকে অসমত থাকিব AFSPA : হিমন্ত বিশ্ব শৰ্মা
