ধুবুৰী,22 জানুৱাৰী : গঁড়ৰ চোৰাং খৰ্গৰ বিৰুদ্ধে ধুবুৰী আৰক্ষীৰ অভিযান ৷ অভিযানত উদ্ধাৰ হয় প্ৰায় দুই কিলো ওজনৰ গঁড়ৰ খৰ্গ আৰু লগতে চাৰি জন লোকক গ্ৰেপ্তাৰ কৰে ধুবুৰী আৰক্ষীয়ে ৷ ধুবুৰীৰ ঝগৰাৰপাৰ অঞ্চলত আৰক্ষীয়ে চলাইছিল এই অভিযান ৷ জিলা অতিৰিক্ত আৰক্ষী অধীক্ষক হিৰণ্য কুমাৰ বৰ্মনৰ নেতৃত্বত আৰক্ষীৰ এটা দলে এক গোপন তথ্যৰ ভিত্তিত ঝগৰাৰপাৰৰ ভাঙাৰপাৰৰ নুৰ মহম্মদ নামৰ এজন লোকৰ ঘৰত অভিযান চলায় ৷ এই অভিযানতে উদ্ধাৰ হয় প্ৰায় দুই কিলো ওজনৰ গঁড়ৰ খৰ্গ আৰু ইয়াৰ পাছতেই নুৰ মহম্মদ নামৰ লোকজনক আটক কৰে আৰক্ষীয়ে ৷
ইপিনে এই ঘটনাৰ সৈতে জড়িত থকাৰ সন্দেহত ঝগৰাৰপাৰ চতুৰ্থ খণ্ড গাঁওৰ আজাহাৰুল ইছলাম আৰু জিয়াউল হকক আটক কৰাৰ লগতে গৌৰীপুৰৰ পৰা ৰাজু সৰকাৰ নামৰ আন এজনক আটক কৰে আৰক্ষীয়ে । ধুবুৰী আৰক্ষীয়ে বৰ্তমান গড়ৰ খৰ্গৰ চাৰি চোৰাং ব্যাৱসায়ীৰ বিৰুদ্ধে ধুবুৰী সদৰ আৰক্ষী থানাত ১১১/২১ নম্বৰত এক গোচৰ ৰুজু কৰি চাৰি চোৰাং খৰ্গ ব্যৱসায়ীক গ্ৰেপ্তাৰ কৰে আৰু ধুবুৰী আদালতত হাজিৰ কৰায় ৷ প্ৰাপ্ত তথ্য অনুসৰি, এই ক্ষেত্ৰত আৰু অধিক তথ্য উদঘাটনৰ বাবে চাৰি চোৰাংকাৰীক পুনৰ তিনিদিনৰ বাবে নিজৰ জিম্মালৈ নিয়ে ধুবুৰী আৰক্ষীয়ে ৷
উল্লেখ্য যে, আৰক্ষীয়ে উদ্ধাৰ কৰা এই গড়ৰ খৰ্গৰ বৰ্তমান বজাৰ মূল্য প্ৰায় ১ কোটি টকাৰ ওপৰত হ'ব বুলি জানিব পৰা গৈছে ।
লগতে পঢ়ক : লাঠিৰে কোবাই কোবাই হত্যা শুকুৰ আলীক
