ধুবুৰী, ১৫ ফেব্ৰুৱাৰী : ধুবুৰীত অব্যাহত ড্ৰাগছৰ ৰমৰমীয়া বেহা। চিকিৎসা বিভাগৰ বাহনেৰে ড্ৰাগছ সৰবৰাহত লিপ্ত চিকিৎসা কৰ্মী। ৰাইজৰ ৰোষত পৰিল ড্ৰাগছ সৰবৰাহকাৰী।
দীৰ্ঘ দিনৰে পৰা ধুবুৰী জিলাত চলি আহিছে ড্ৰাগছৰ বেহা। আৰক্ষীৰ অভিযানত কেবাবাৰো ড্ৰাগছ সৰবৰাহকাৰী গ্ৰেপ্তাৰ হৈছে যদিও বৰ্তমানেও আৰক্ষীৰ চকুত ধুলি চটিয়াই ড্ৰাগছৰ বেহাত লিপ্ত একাংশ চিকিৎসা কৰ্মী। বৃহস্পতিবাৰে নিশা কোকৰাঝাৰ চিকিৎসা কেন্দ্ৰৰ ৱাৰ্ড ৱয় এজনে চিকিৎসালয়খনৰে বাহনৰ যোগেদি সৰবৰাহ কৰিছিল অবৈধ ড্ৰাগছ। ধুবুৰীৰ নিউঘাট অঞ্চলৰ পৰা তীব্ৰ বেগেৰে আহি থকা বাহনখনে শংকিত কৰিছিল ৰাইজক। বাহনখনৰ গতি বৃদ্ধিৰ ফলত সন্দেহবশত বাহনখন ৰখাই সোধ-পোছত লাগিছিল স্থানীয় ৰাইজ। সোধ-পোছৰ পাচতেই পোহৰলৈ আহে বাহনখনত ঔষধ জাতীয় ড্ৰাগছ থকাৰ তথ্য। ঘটনাৰ ক্ষোভত ৰাইজে বাহনখনৰ চালক ছাইফুল ইছলামক উত্তম-মাধ্যম শোধোৱাৰ লগতে ভাঙি লণ্ড-ভণ্ড কৰে বাহনখনো। ঘটনাস্থলীত আৰক্ষী উপস্থিত হৈ চালকজন আটক কৰাৰ লগতে জব্দ কৰে ১০০ বটল কাফ চিৰাফ। বৰ্তমানে অভিযুক্ত চালকজনক চিকিৎসালয়ত ভৰ্তি কৰাইছে আৰক্ষীয়ে।
আনহাতে, একেইদিনাই জিলাখনৰ চাপৰ আৰক্ষীয়ে চলোৱা এক অভিযানতো উদ্ধাৰ হয় বৃহৎ পৰিমাণৰ ড্ৰাগছ। চাপৰৰ হাৰ্দেমাৰাৰ চৰ এখনত ড্ৰাগছ জাতীয় ঔষধ খিনি সৰবৰাহৰ খবৰ লাভ কৰাৰ পিছতেই ঘটনাস্থলীত উপস্থিত হৈছিল বিলাসীপাৰা ৰাজহ চক্ৰ বিষয়া সহ চাপৰ আৰক্ষীৰ দল। ঘটনা স্থলীত এখন মিনি ট্ৰাকৰ পৰা আৰক্ষীয়ে উদ্ধাৰ কৰে প্ৰায় ১৬ লাখ টকা মূল্যৰ ১০০ কাৰ্টুন নিচা জাতীয় ঔষধ। মুঠৰ ওপৰত আৰক্ষীয়ে ড্ৰাগছৰ বিৰুদ্ধে অভিযান অব্যাহত ৰাখিলেও ধুবুৰী জিলাত এতিয়াও সক্ৰিয় হৈ আছে অবৈধ ড্ৰাগছৰ বৃহৎ নেটৱৰ্ক ।
