জোনাই, ২২ নৱেম্বৰ: ধেমাজি জিলাৰ জোনাই বিধানসভা সমষ্টিৰ অন্তৰ্গত কেমিজেলৰ চিলে নদীত পকী দলং নিৰ্মাণৰ দাবীত আজি কেমি ঐৰামঘাট, জেলম গাঁৱৰ ৰাইজ আৰু কণ কণ শিক্ষাৰ্থীয়ে প্ৰতিবাদ সাব্যস্ত কৰে ৷ কেমি ঐৰামঘাট-পুৰণাজেলম সংযোগী পথত থকা চিলে নদীত স্বাধীনোত্তৰ কালৰে পৰা বছৰ ধৰি শ শ শিক্ষাৰ্থী তথা সাধাৰণ ৰাইজে বিপদসংকুলভাৱে যাতায়ত অব্যাহত ৰাখিছে । উক্ত পথচোৱাত এখন পকী দলং নিৰ্মাণ নকৰাত অঞ্চলটোৰ ৰাইজে যাতায়তৰ ক্ষেত্ৰত যথেষ্ট অসুবিধাৰ সন্মুখীন হৈ আহিছে ৷
এই নদীখনত দলং নথকা বাবে অৰুণাচল সীমান্তত থকা জোনাইৰ কেমি অঞ্চলৰ কণ কণ ছাত্ৰ-ছাত্ৰীয়ে নদীখনৰ সিপাৰে থকা অঞ্চলটোৰ একমাত্ৰ কেমি জেলম মধ্য ইংৰাজী বিদ্যালয়খনলৈ কেমি-জেলমৰ মাজেদি অৰুণাচলৰ পৰা বৈ অহা খৰস্ৰোতা চিলে নদীখন বিপদসংকুলভাৱে যায় । পিছে বাৰিষাত পাৰাপাৰৰ নাই কোনো বিকল্প পথ । ফলত নদীখনক পাৰ কৰি বিদ্যালয়লৈ যোৱাৰ পথত ছাত্ৰ-ছাত্ৰীৰ মাজত বহুবাৰ ঘটিছে অঘটনো ।
উল্লেখ্য যে এইখন চিলে নদীৰ ওপৰত এখন দলং নথকাত জোনাইৰ কেমি, ঐৰামঘাট, জামপানী আদিৰ ৰাইজে অৰুণাচলৰ অয়ান চাৰিআলি হৈ দৈনিক বিভিন্ন কাম-কাজত যোগাযোগ অব্যাহত ৰাখিছে জোনাই সদৰৰ সৈতে । ইফালে, সীমান্তৰ কেইবাখনো গাঁৱৰ ৰাইজে চিলে নদীৰ ওপৰত এখন দলং নিৰ্মাণৰ কাৰণে বহু বছৰৰ পৰাই বিধায়ক, সাংসদ পঞ্চায়ত প্ৰতিনিধি তথা চৰকাৰৰ ওচৰত আবেদন-নিবেদন কৰি আহিছে । উক্ত সমস্যাৰ সন্দৰ্ভত সংবাদমাধ্যমতো বহু বাৰ প্ৰচাৰ হৈছে ৷ ইমানৰ পিছতো আজি পর্যন্ত কোনোধৰণৰ গুৰুত্ব নিদিয়াত বুধবাৰে সীমান্ত থকা কেমি,ঐৰামঘাট আদি অঞ্চলটোৰ লগতে ছাত্ৰ-ছাত্ৰীসকলে প্ৰতিবাদ জনায় ।
ইফালে, ৰাইজে স্থানীয় বিধায়ক ভুৱন পেগু, সাংসদ প্ৰদান বৰুৱাক চিলে নদীত পকী দলং নিৰ্মাণৰ দাবী জনাই আহিছে যদিও কোনো গুৰুত্ব নিদিয়াৰ অভিযোগ উত্থাপন কৰিছে ৰাইজে ৷ উপায়ন্তৰ হৈ বিধায়ক-সাংসদৰ লগতে পঞ্চায়ত প্ৰতিনিধিৰ বিৰুদ্ধে জাঙুৰ খাই উঠিছে স্থানীয় ৰাইজৰ লগতে কণ কণ ছাত্ৰ-ছাত্ৰী ৷ প্ৰতিদিনে শংকাৰ মাজেৰে পাৰ হোৱা শিক্ষাৰ্থীয়ে উপায়ন্তৰ হৈ পকী দলং নিৰ্মাণৰ দাবীত তীব্ৰ প্ৰতিবাদ সাব্যস্ত কৰে ৷
প্ৰতিবাদী কাৰ্যসূচীত অসম চৰকাৰ হায় হায়, ডাঃ ৰণোজ পেগু হায় হায়, বিধায়ক সাংসদ হায় হায়, পঞ্চায়ত প্ৰতিনিধি হায় হায়, দলং আমাক লাগিবই আদি শ্লোগানেৰে চিলে নদীত পৰিৱেশ উত্তাল কৰি তোলে ৷ শীঘ্ৰেই পথছোৱাত চিলে নদীত পকী দলং নিৰ্মাণ কৰিবলৈ ৰাজ্য চৰকাৰৰ লগতে বিধায়ক ভুৱন পেগু আৰু সাংসদ প্ৰদান ভৰুৱাক দাবী জনাইছে স্থানীয় ৰাইজে ৷ অন্যথা তিনিওখন গাঁৱৰ ৰাইজে ভোট বৰ্জনৰ উপৰি প্ৰয়োজনত আৰুণাল ৰাজ্যৰ লগত চামিল হোৱাৰ হুংকাৰ দিয়ে ।
লগতে পঢ়ক:আলি-আয়ে-লৃগাঙত ৰাজ্যিক বন্ধ ঘোষণাৰ দাবীত প্ৰতিবাদ
