দৰং, 25 জুন : পুনৰ বিতৰ্কৰ মাজত সোমাই পৰিছে মঙলদৈ অসামৰিক চিকিৎসালয় (Mangaldoi civil hospital)। বিতৰ্কই যেন পিছ নেৰা হৈছে চিকিৎসালয়খনক । কেতিয়াবা যদি ব্লাড বেংক বিতৰ্ক, আকৌ কেতিয়াবা নৱজাতকৰ সাল সলনিৰ ঘটনা পোহৰলৈ আহিছে । এইবাৰো আকৌ নৱজাতক সলনি হোৱাৰ অভিযোগ উঠিছে চিকিৎসালয় খনৰ বিৰুদ্ধে । ভুক্তভোগী পৰিয়ালে জানিব দিয়া অনুসৰি দুদিন পূৰ্বে অৰ্থাৎ বুধবাৰে মঙলদৈ গৰাপৰি গাঁৱৰ আচমা বেগম নামৰ মহিলাগৰাকীক ভৰ্তি কৰোৱা হৈছিল মঙলদৈ অসামৰিক চিকিৎসালয় (Mangaldoi civil hospital)ত ।
প্ৰথমতে চিকিৎসালয় কৰ্তৃপক্ষই পুত্ৰ সন্তান জন্ম হোৱা বুলি কৈছিল পিতৃ-মাতৃক । তাৰপাচতে মহিলাগৰাকীয়ে সন্তান জন্ম দিয়াত চিকিৎসালয়ৰ নাৰ্চে পুত্ৰ সন্তান জন্ম হোৱা বুলি খবৰ দি কাগজত চহী কৰাই লৈছিল । নৱজাতকটোক ৰখা হৈছিল বেবী কেয়াৰ ৰুমত । কিন্তু তেতিয়াহে অথন্তৰ লাগে যেতিয়া মাতৃ গৰাকীয়ে বৃহস্পতিবাৰে গাখীৰ খুৱাবলৈ লওঁতে দেখে সন্তানটি কন্যা সন্তান । সম্প্ৰতি সন্তানটিৰ পিতৃ আজিম আলি আৰু মাতৃ আচমা বেগমৰ অভিযোগ কৰা অনুসৰি সাল সলনি কৰা হৈছে তেওঁলোকৰ সন্তান ।
ইতিমধ্যে চিকিৎসালয় কৰ্তৃপক্ষক সমগ্ৰ ঘটনাৰ সৰ্ন্দভত অভিযোগ দাখিল কৰিছে পিতৃ মাতৃয়ে । লক্ষণীয়ভাৱে এতিয়ালৈকে ঘটনাটোৰ সৰ্ন্দভত কোনো ধৰণৰ মুখ খোলা নাই চিকিৎসালয় কৰ্তৃপক্ষই । দৰাচলতে ঘটনাটো কিমান সচাঁ কিমান মিছা ৷ সম্প্ৰতি এই ঘটনাৰ সৰ্ন্দভত উচিত তদন্তৰ পাচতে প্ৰকৃত ৰহস্য পোহৰলৈ আহিব বুলি সদৰি কৰিছে নৱজাতকটিৰ পিতৃ-মাতৃয়ে ।
উল্লেখযোগ্য যে, ৰাজ্যৰ বিভিন্ন প্ৰান্তৰ চিকিৎসালয়ত সংঘটিত হৈ আহিছে এনে ধৰণৰ ঘটনা ৷ সম্প্ৰতি এনেধৰণৰ বেমেজালি সমূহ দূৰ কৰিবলৈ স্বাস্থ্য বিভাগৰ লগতে চিকিৎসালয় কৰ্তৃপক্ষক আহ্বান জনাইছে স্থানীয় সচেতন ৰাইজে ৷
লগতে পঢ়কঃ পৌৰসভাৰ সভাপতি পদকলৈ বিজেপি-ইউপিপিএলৰ মাজত টনা-আঁজোৰা
