চিৰাং,5 ফেব্ৰুৱাৰীঃ চিৰাঙত আমছুৰ উদ্যোগত বি টি চি-ৰ সংখ্যালঘু বিভিন্ন দল-সংগঠন আৰু বুদ্ধিজীৱীৰ মাজত নাগৰিক সভা অনুষ্ঠিত হয় ৷ চৰ্ত সাপেক্ষে তৃতীয়খন বড়ো শান্তিচুক্তি আৰু বি টি আৰ সমৰ্থন সম্বন্ধত অনুষ্ঠিত হয় সভাখন । উক্ত সভাখন চিৰাঙৰ কাজলগাঁও গড়কাপ্তানি বিভাগৰ অতিথিশালাত অনুষ্ঠিত হয় ৷ সভাত বি টি চিৰ সংখ্যালঘু লোকৰ বিভিন্ন দিশক সাঙুৰি কেইবাটাও প্ৰস্তাৱ গ্ৰহণ কৰা হয় ৷
উল্লেখিত প্ৰস্তাৱসমূহ কেন্দ্ৰ-ৰাজ্য চৰকাৰৰ লগতে বি টি চি চৰকাৰ আৰু বড়ো নেতৃত্বই কাৰ্যকৰী কৰাৰ ব্যৱস্থা গ্ৰহণ কৰিলে বড়ো শান্তি চুক্তি সম্পাদন কৰাৰ যি মূল লক্ষ্য আৰু উদ্দেশ্য সেয়া প্ৰকৃতাৰ্থত বাস্তৱায়িত হ’ব বুলি দল-সংগঠনসমূহে বিশ্বাস কৰে ৷ অন্যথা অন্যান্য জনগোষ্ঠীৰ লোকসকল সাংবিধানিক অধিকাৰৰ পৰা বঞ্চিত হ’ব যিটো কোনো কাৰণত গ্ৰহণযোগ্য নহয় ৷ সভাখনত আমছুৰ উপদেষ্টা আজিজুৰ ৰহমান, সভাপতি ৰেজাউল কৰিম সৰকাৰ, কাৰ্যকৰী সভাপতি আইনুদ্দিন আহমেদ, সাধাৰণ সম্পাদক আব্দুৰ ৰহমান বিশ্বাস, ইমতিয়াজ হুছেইন, এ বি এমছুৰ প্ৰতিষ্ঠাপক সভাপতি মইনুল হক, বৰ্তমানৰ সভাপতি শ্বেখ আশ্ৰাফুল হক, ব্ৰহ্মপুত্ৰ ভেলী চিভিল চ’ছাইটিৰ কাৰ্যকৰী সভাপতি আব্দুল বাতিন খণ্ডকাৰ, সাধাৰণ সম্পাদক ছাহজাহান তালুকদাৰ, আৰ এম চিৰ সাধাৰণ সম্পাদক ৰেজাউল সৰকাৰৰ লগতে জমিয়তৰ নেতৃবৰ্গ, বি টি এ ডি তথা বি টি আৰৰ অন্তৰ্গত এলেকাৰ সচেতন নাগৰিকসকল উপস্থিত থাকে ।
নাগৰিক সভাৰ পিচতে সংবাদমেল সম্বোধন কৰে সংখ্যালঘুৰ নেতৃবৰ্গই । সংবাদমেলখনৰ জৰিয়তে নাগৰিক সভাৰ যাৱতীয় তথ্য জনোৱাৰ লগতে নাগৰিকত্ব সংশোধনী আইন বিৰোধী আন্দোলনত গুলীবিদ্ধ হৈ গুৰুতৰভাৱে আহত হোৱা বৰপেটা জিলাৰ চেঙাৰ নৱম শ্ৰেণীৰ ছাত্ৰ ছানিদুল ইছলামৰ পৰিয়ালক আমছুৰ তৰফৰ পৰা সংগ্ৰহ কৰা 3,02,000 টকাৰ নগদ ধন আগবঢ়োৱা হয় ৷
লগতে চাওকঃঅন্ধবিশ্বাসৰ কৰাল গ্ৰাসত বিশ্বনাথৰ ডিৰিং চাহ বাগিছা
