বঙাইগাঁও,17 জানুৱাৰীঃ 17 জানুৱাৰী শিল্পী দিৱস ৷ ৰূপকোঁৱৰ জ্যোতিপ্ৰসাদ আগৰৱালাৰ মৃত্যু তিথি ৷ সুন্দৰৰ সাধক গৰাকীক শ্ৰদ্ধাঞ্জলী জনোৱাৰ উদ্দেশ্যে ৰাজ্যজুৰি পালন কৰা হৈছে শিল্পী দিৱস ৷ শিল্পী দিৱসৰ লগত সংগতি ৰাখি দুদিনীয়া কাৰ্যসূচীৰে বঙাইগাঁও জিলাৰ চোকাপাৰাত শুকুৰবাৰৰ পৰা আৰম্ভ হৈছে অসম সাহিত্য সভাৰ বঙাইগাঁও জিলাৰ দ্বাদশ পূৰ্ণাংগ অধিৱেশন । বঙাইগাঁও জিলা সাহিত্য সভা আৰু চোকাপাৰা স্বৰ্ণ শাখা সাহিত্য সভাৰ যৌথ প্ৰচেষ্টাত ঘনদল বীণাপানী পুথিভঁৰাল আৰু সামূহিক উন্নয়ন কেন্দ্ৰত অনুষ্ঠিত হৈছে এই অধিৱেশনখন ।
কাৰ্যসূচী অনুসৰি পুৱা সাহিত্য সভাৰ জিলা সভাপতি অজিত কুমাৰ দাসে পতাকা উত্তোলন কৰে ৷ তাৰপিছত অনুষ্ঠিত স্মৃতি তৰ্পণৰ আঁত ধৰে সাহিত্য সভাৰ আজীৱন সভ্য হৰমোহন দাসে ৷ কণ্ঠশিল্পী আৰতি ৰায় ভাগৱতীয়ে শিল্পী দিৱস উপলক্ষে জ্যোতিপ্ৰসাদ আগৰৱালাদেৱৰ প্ৰতিচ্ছবিত মাল্যাৰ্পণ কৰে । তাৰপিচতে অনুষ্ঠিত হয় কাৰ্য নিৰ্বাহক সভা আৰু প্ৰতিনিধি পঞ্জীয়ন। পৰৱৰ্তী সময়ত অনুষ্ঠিত প্ৰতিনিধি সভা উদ্বোধন কৰে জিলা সাহিত্য সভাৰ প্ৰাক্তন উপ-সভাপতি কেশৱ চন্দ্ৰ ৰায়ে। বিয়লি ২ বজাত সত্ৰ আৰু গীত-মাতৰ অনুষ্ঠানত "সাম্প্ৰতিক পৰিস্থিতিত জ্যোতিপ্ৰসাদ আগৰৱালাৰ চিন্তাৰ প্ৰাসংগিকতা" শীৰ্ষক এক আলোচনা চক্ৰ অনুষ্ঠিত হয় ৷ অনুষ্ঠানটোৰ দ্বিতীয় দিনা বিভিন্ন কাৰ্যসূচীৰে অনুষ্ঠিত হ’ব জিলা সাহিত্য সভাৰ অধিৱেশন ৷
লগতে চাওকঃ5 দিনীয়া কাৰ্যসূচীৰে আৰম্ভ ঐতিহাসিক চেঙা সভা মহোৎসৱ
