বিহালী, ১৭ জুন : বিহালীৰ এজন যুৱ ব্যৱসায়ী ৷ নাম কৃষ্ণ প্ৰসাদ ভট্টৰায় ৷ উচ্চ শিক্ষাৰে শিক্ষিত হৈয়ো যুৱ ব্যৱসায়ীগৰাকীয়ে নিজ প্ৰচেষ্টাত গঢ়ি তুলিছে এখন ফাষ্ট ফুডৰ দোকান ৷ লক্ষ্য স্বাৱলন্বী হোৱাৰ (Assam youth become self reliant with fast food shop) ৷ যাৰ বাবে চৰকাৰী চাকৰিলৈ বাট নেচাই শিক্ষিত যুৱ ব্যৱসায়ী কৃষ্ণ প্ৰসাদে প্ৰতিদিনাই ওলাই আহে নিজৰ ফাষ্ট ফুডৰ দোকানখনলৈ ৷
এই ফাষ্ট ফুডৰ দোকানখনৰ জৰিয়তে বিহালী বিধান সভা সমষ্টিৰ অন্তৰ্গত ৰাংছালী দলনী গাঁৱৰ কৃষ্ণ প্ৰসাদ ভট্টৰায়ে পোহপাল দিবলৈ সক্ষম হৈছে নিজৰ পৰিয়ালক । কৰ্মসূত্ৰে বিগত ষোল্ল বছৰে ভাৰতৰ বিভিন্ন স্থানত বিশেষকৈ দিল্লী, তামিলনাডু, কেৰালা, বেংগালুৰু আদিত আছিল দলনীৰ কৃষ্ণ প্ৰসাদ ৷অৱশেষত নিজ গৃহভূমি বিহালীলৈ ঘূৰি আহি যুৱকজনে আৰম্ভ কৰিছে এটা ক্ষুদ্ৰ ব্যৱসায় ।
দুবছৰ আগতে বিহালীৰ নাচবৰ আৰু ৰাংছালী দলনী গাঁৱত ঠেলাত ফাষ্টফুডৰ দোকানেৰে আৰম্ভ কৰিছিল এই ব্যৱসায় ৷ আৰু সেই ঠেলাৰ পৰা বৰ্তমান কৃষ্ণই কমাৰ পুখুৰী তিনিআলিত সোণটি দাসৰ মাৰ্কেট চেদত এটি কোঠা ভাড়াত লৈ স্থায়ীভাৱে আৰম্ভ কৰিছে এই ব্যৱসায় ৷ যাৰ ফলত অতি নিয়াৰিকৈ পাঁচজনীয়া পৰিয়ালটো পোহপাল দিবলৈ সক্ষম হৈছে যুৱ ব্যৱসায়ী কৃষ্ণ প্ৰসাদে ৷
ফাষ্ট ফুডৰ উপৰিও বানানা, এপল, বাদাম, মেংগ’, পাইনাপল আদি চেক আৰু জুচ বিক্ৰী কৰে যুৱ ব্যৱসায়ীগৰাকীয়ে । অসমৰ বাহিৰৰ বিভিন্ন স্থানত গৈ কৰ্মসংস্থাপন বিচাৰি ঘূৰি ফুৰাতকৈ অসমতে থাকি নিজা ব্যৱসায় কৰিলে যথেষ্ট লাভ হয় বুলি মন্তব্য কৰে বিহালী যুৱ ব্যৱসায়ী কৃষ্ণ প্ৰসাদে ।
লগতে পঢ়ক : Mushroom farming in Assam: কাঠফুলা খেতিৰে স্বাৱলম্বী হোৱা হাউলীৰ দুই যুৱক
