বাক্সা,26জুলাইঃ সমস্যাই যেন লগ নেৰে ভাৰত-ভূটান সীমান্তৱৰ্তী ২ নং দোঙাৰগাঁৱৰ জনসাধাৰণক ৷ কেতিয়াবা যদি বানপানীয়ে জুৰুলা কৰিছে গাঁৱৰ সাধাৰণ ৰাইজক ,আন কেতিয়াবা আকৌ বন্যহস্তীয়ে আক্ৰমণ চলাইছে নিৰীহ গাঁওবাসীৰ মাজত ৷ দীৰ্ঘদিন ধৰি খোৱাপানী আৰু উন্নত চিকিৎসা ব্যৱস্থাৰ পৰাও বঞ্চিত হৈ আহিছে গাঁও খনৰ ৰাইজ ৷
বাৰিষাৰ উপৰিও খৰালিও ভূটানৰ পাহাৰত যদি বৰষুণ হয় তেন্তে গাঁওখনেৰে বৈ যোৱা বৰনদীয়ে নৈপৰীয়া জনসাধাৰণ ৰাইজৰ ঘৰদুৱাৰ বুৰাই পেলাই । বাৰিষা আহিলে আতংকিত হৈ পৰে নৈ পৰিয়া ৰাইজ । শেহতীয়াকৈ হৈ যোৱা বানপানীয়ে বেয়াকৈ জুৰুলা কৰি গ'ল নৈপৰীয়া সাধাৰণ ৰাইজক ৷ প্ৰায় 100 বিঘা মাটিৰ পথাৰৰ পকা ধান পানীয়ে নষ্ট কৰাৰ ফলত এতিয়া মূৰে-কপালে হাত দিছে সাধাৰণ কৃষক ৰাইজে ৷ আনহাতে, নৈৰ বুকুত জাহ গৈছে গাঁও খনৰ 150 বিঘা মাটি ৷ খহনীয়াৰ ফলত এতিয়া অন্য ঠাইলৈ ঢাপলি মেলিছে কেইবাটাও পৰিয়ালে ৷
ইয়াৰোপৰি,নিশা হ'লেই বনৰীয়া হাতীয়ে গাঁও খনত সোমাই ঘৰ দুৱাৰ ভাঙি,ভৰালৰ ধান চাউল খাই তহিলং কৰে । প্ৰায়েই বনৰীয়া হাতীৰ আক্ৰমণৰ সন্মুখীন হয় সাধাৰণ ৰাইজ । আনহাতে,গাঁও খনত নাই কোনো উন্নত খোৱা পানী আৰু চিকিৎসা ব্যৱস্থা । নৈৰ বালিচৰত গাঁত খান্দি সেই গাঁতৰ পৰাই পানী সংগ্ৰহ কৰে গাঁওবাসীয়ে ৷ কিন্তু,এই ক্ষেত্ৰত নিমাত বিভাগীয় কৰ্তৃপক্ষ ৷ গাঁওবাসীৰ সমস্যা সমাধানৰ বাবে আগবাঢ়ি অহা নাই বন বিভাগ, জল-সম্পদ বিভাগ অথবা জনস্বাস্থ্য কাৰিকৰী বিভাগ ৷ চৰকাৰৰ কোনো আচঁনিয়ে ঢুকি পোৱা নাই গাঁও খনক ৷ শীঘ্ৰেই এই সমস্যা সমূহ পূৰণৰ বাবে চৰকাৰক দাবী জনাইছে সাধাৰণ ৰাইজে ৷